The Phnom Penh Post Search

Search form




Logo of Phnom Penh Post newspaper Phnom Penh Post - សមត្ថកិច្ច​ស្រុក​ស្អាង​ចាប់​អ្នក​ប្រើ​ឧបករណ៍​ឆក់​ត្រី ៩ នាក់ បញ្ជូន​ទៅ​សាលា​ដំបូង​ខេត្ត




សមត្ថកិច្ច​ស្រុក​ស្អាង​ចាប់​អ្នក​ប្រើ​ឧបករណ៍​ឆក់​ត្រី ៩ នាក់ បញ្ជូន​ទៅ​សាលា​ដំបូង​ខេត្ត

សមត្ថកិច្ច​ស្រុក​ស្អាង​ចាប់​អ្នក​ប្រើ​ឧបករណ៍​ឆក់​ត្រី ៩ នាក់ បញ្ជូន​ទៅ​សាលា​ដំបូង​ខេត្ត

130201_10
អ្នកប្រើឧបករណ៍ឆក់ត្រី នៅឃុំប្រាសាទ ស្រុកស្អាង ដែលចាប់បញ្ជូនទៅតុលាការ សហការី

កណ្តាលៈ ជន​សង្ស័យ​ប្រើ​ឧបករណ៍​ឆក់​ត្រី​ខុស​ច្បាប់​៩​នាក់ ដែល​សមត្ថកិច្ច​ជលផល និង​នគរបាល​ស្រុក​ស្អាង​ចាប់​ឃាត់​ខ្លួន ក្នុង​ពេល​វិល​ត្រឡប់​ពី​ឆក់​ត្រី​នៅ​ឃុំ​ប្រាសាទ ស្រុក​ស្អាង ​កាល​ពីថ្ងៃ​ទី​៣០ ខែ​មករា បាន​បញ្ជូន​ទៅ​កាន់​សាលា​ដំបូង​ខេត្ត កាល​ពី​ម្សិលមិញ​ដើម្បី​បន្ត​នីតិវិធី​ច្បាប់។

លោក សេង សុជាតិ អធិការ​នគរបាល​ស្រុក​ស្អាង​បាន​ឲ្យ​ដឹង​ថា ជន​សង្ស័យ​ទាំង​៩​នាក់ ត្រូវ​សមត្ថកិច្ច​ចម្រុះ​ចុះ​ឃាត់​ខ្លួន​ក្នុង​ពេល​ជិះ​ទូក​ត្រឡប់​មក​ ពី​ឆក់​ត្រី​ ជាមួយ​នឹង​ឧបករណ៍​ឆក់​ល្មើស​​ច្បាប់​ ​និ​ងបាន​បញ្ជូន​ទៅ​តុលាការ​ខេត្ត​ហើយ បន្ទាប់​ពី​បាន​ឃុំ​ខ្លួន​បណ្តោះ​អាសន្ន​នៅ​អធិការ​ដ្ឋាន​នគរបាល​ស្រុក ស្អាង​ដើម្បី​កសាង​សំណុំ​រឿង​រួច។​

លោក​ថ្លែងថា ជន​ទាំង​នោះ​ពិត​មែន​តែ​ពួក គេ​នេសាទ ក្នុង​ដែន​នេសាទ​ទុក​បម្រុង​សម្រាប់​​ប្រជា​ពលរដ្ឋ ដែល​រាជ​រដ្ឋាភិបាល​បាន​អនុញ្ញាត​សម្រាប់​ធ្វើ​ការ​នេសាទ​ជា លក្ខណៈ​គ្រួសារ​ពិត​មែន តែ​ឧបករណ៍​ឆក់​ដែល​ពួក​គេ​ប្រើ​ជា​វត្ថុតាង​គឺ​ខុស​ច្បាប់ ។

លោក​បញ្ជាក់​ថា៖ «​ច្បាប់​បាន​ហាម​ឃាត់​មិន​ឲ្យ​មាន​ការ​នេសាទ​ត្រី​បែប​នេះ​ទេ ព្រោះ​វា​មិន​ត្រឹម​តែ​ងាប់​ត្រី​ធំ​ទេ សូម្បី​តែ​កូន​ត្រី​តូចៗ និង​ជីវ​ចម្រុះ​ផ្សេងៗ​ទៀត ក៏​ងាប់​អស់​និង​ធ្វើ​ឲ្យ​ផុត​ពូជ​ត្រី​ថែម​ទៀត​ផង​»។

លោក​អធិការ​រំឭក​ថា ​សមត្ថកិច្ច​ចម្រុះ​បាន​ចុះ​ល្បាត​តាម​ទូក​ ហើយ​ប្រទះ​ឃើញ​ពួក​គេ នៅ​​ម៉ោង​ប្រមាណ ៤ ទៀប​ភ្លឺ នៅ​ចំណុច​អូរ​បៃ ស្ថិត​ក្នុង​ភូមិ​លេខ​១​ ឃុំ​ប្រាសាទ​ ស្រុក​ស្អាង​ ក្នុង​ខេត្ត​កណ្តាល ពេល​កំពុង​បើក​កាណូត​បន្តក​ន្ទុយ​គ្នា​មក​ពី​ឆក់​ត្រី​នៅ​បឹង​ធម្មជាតិ ក្នុង​ភូមិ​សាស្ត្រ​ជា​អតីត​ឡូត៍​នេសាទ​ក្នុង​ឃុំ​ប្រាសាទ។

លោក ប្រាប់​ដែរ​ថា ក្រៅ​ពី​ជន​សង្ស័យ​ទាំង​៩នាក់​នោះ​ សមត្ថកិច្ច​រឹប​អូស​បាន​ទូក​ចំនួន​៥​គ្រឿង​ អាំងវុលទ័រ​៤គ្រឿង​ អាគុយ​៤០​អំពែរ​ចំនួន​៦គ្រឿង និង​ដង​ឆក់​ចំនួន ៤ គូ។

លោក ឃឹម ពេញ ប្រធាន​ស្នាក់​ការ​ជលផល​ស្រុក​ស្អាង​ថ្លែង​ថា ជន​សង្ស័យ​ទាំង​៩នាក់ ក្រោយ​ពី​ឃាត់​ខ្លួន​សមត្ថកិច្ច​នគរបាល​ស្រុក​ស្អាង​បាន​ឃុំ​ខ្លួន​និង ​កសាង​សំណុំ​រឿង​រួច​អស់​ហើយ ​ហើយក៏​បាន​បញ្ជូន​ទៅ​សាលា​ដំបូង​ខេត្ត​ហើយ​ កាលពី​ម្សិលមិញ។

លោក​ថ្លែង​បន្ត​ថា​៖​ «យើង​មាន​ការ​អប់រំ​ដល់​ប្រជាពល​រដ្ឋ​រាល់​លើក ​ដោយ​ផ្សព្វផ្សាយ​ពី​ច្បាប់​ជល​ផល​ផង ប៉ុន្តែ​ពួក​គាត់​នៅ​តែ​មិន​គោរព​និង​អនុវត្ត​តាម​ច្បាប់​ដែល​បាន​កំណត់​ទេ និង​នៅ​តែ​លួច​ប្រព្រឹត្ត​បទ​ល្មើស​ជា​ដដែល យើង​ឆ្ងល់​ថា ​ហេតុ​អី​ក៏​ពួក​គាត់​មិន​ប្រើ​ឧបករណ៍​ដែល​ច្បាប់​មិន​ហាម​ឃាត់ ហើយ​ដែល​ពួក​គាត់​ក៏​មាន​សិទ្ធិ​ស្រប​ច្បាប់​វិញ»។

លោក​ថា ​ ជន​សង្ស័យ​ ប្រសិន​បើ​តុលាការ​រក​ឃើញ​ថា មាន​ពាក់ព័ន្ធ​នឹង​បទ​ល្មើស​នេសាទ​មែន​នោះ ពួក​គេ​អាច​នឹង​ត្រូវ​ជាប់​គុក​ ពី​៣​ទៅ​៥​ឆ្នាំ និង​ពិន័យ​ជា​ប្រាក់​ទៅ​តាម​ច្បាប់​ជលផល​​។

លោក​ព្រះ​រាជ​អាជ្ញា​អមសាលា​ដំបូង​ខេត្ត កណ្តាល និង​ក្រុម​ជន​ជាប់​ចោទ​ពាក់ព័ន្ធ​នឹង​ករណី​នេះ មិន​អាច​ទាក់​ទង​បាន​ទេ កាល​ពី​ម្សិលមិញ៕

អត្ថបទគួរចាប់អារម្មណ៍