The Phnom Penh Post Search

Search form




Logo of Phnom Penh Post newspaper Phnom Penh Post - សាំយ៉ុង​បុក​នឹង​រថយន្ត​ក្រុង​នៅ​លើ​ផ្លូវ​ជាតិ​លេខ​១ ស្លាប់​៤នាក់​របួស​១៣​នាក់




សាំយ៉ុង​បុក​នឹង​រថយន្ត​ក្រុង​នៅ​លើ​ផ្លូវ​ជាតិ​លេខ​១ ស្លាប់​៤នាក់​របួស​១៣​នាក់

សាំយ៉ុង​បុក​នឹង​រថយន្ត​ក្រុង​នៅ​លើ​ផ្លូវ​ជាតិ​លេខ​១ ស្លាប់​៤នាក់​របួស​១៣​នាក់

121105_10
កិច្ចប្រជុំរំលែកបទពិសោធ ការត្រួតពិនិត្យការបើកបរក្រោមជាតិស្រវឹង និងការមិនពាក់មួកពេលយប់ ន.ប.ជ.ក

ព្រៃវែងៈ មនុស្ស​ចាស់​ក្មេង​៤នាក់​បាន​ស្លាប់​និង​១៣​នាក់​ទៀត​របួស​ធ្ងន់​ស្រាល​នៅ​ក្នុង​គ្រោះ​ថ្នាក់ ចរាចរណ៍​រវាង​រថយន្ត​សាំយ៉ុង​រត់​ឈ្នួល​បុក​នឹង​រថយន្ត​ក្រុង​ដឹក​អ្នក​ទេសចរ​វៀត​ណាម​ដែល​បើក​បរ​បញ្ច្រាស​ទិស​គ្នា​លើ​កំណាត់​ផ្លូវ​ជាតិ​លេខ​១ ក្នុង​ស្រុក​ព្រះ​ស្តេច ខេត្ត​ព្រៃវែង កាល​ពី​ថ្ងៃ​សៅរ៍។

លោក ហ៊ីង ហាក់ អធិការ​នគរបាល​ស្រុក​ព្រះ​ស្តេច​បាន​ឲ្យ​ដឹង​ពី​ម្សិលមិញ​ថា គ្រោះ​ថ្នាក់​ចរាចរណ៍​នេះ​កើត​ឡើង​នៅ​រសៀល​ថ្ងៃ​ទី៣ ខែ​វិច្ឆិកា រវាង​រថយន្ត​សាំ​យ៉ុង​ដឹក​អ្នក​ដំណើរ​ពាក់​ស្លាក​លេខ​ភ្នំពេញ​2P-8467 និង​រថយន្ត​ក្រុង​ដឹក​អ្នក​ទេសចរ​វៀតណាម​ក្រុម​ហ៊ុន​វ៉ាន​រិច ពណ៌ខៀវ ពាក់​ស្លាក​លេខ​ភ្នំពេញ 2A-3232។

លោក​ឲ្យ​ដឹង​ថា គ្រោះ​ថ្នាក់​ចរាចរណ៍​ដែល​កើត​ឡើង​នៅ​ភូមិ​ក្រាំង​ក្អុក ឃុំ​កំពង់​សឹង ស្រុក​ព្រះ​ស្តេច​គឺ​បង្ក​ឡើង​ដោយ​រថយន្ត​សាំយ៉ុង​បើក​វ៉ា​ប្រជែង​គេ​ពី​ទិស​ខាង​កើត​ទៅ​អ្នក​លឿង ហើយ​ក៏​ជ្រុល​ចង្អូត​ទៅ​បុក​ជាមួយ​រថយន្ត​ក្រុង ដែល​បើក​ពី​លិច​ទៅ​កើត​យ៉ាង​ពេញ​ទំហឹង​បណ្តាល​ឲ្យ​អ្នក​ជិះ​នៅ​ក្នុង​រថយន្ត​សាំយ៉ុង​នោះ​ស្លាប់​៤នាក់​និង​រង​របួស​ធ្ងន់​ស្រាល​១២​នាក់។ រីឯ​អ្នក​បើក​រថយន្ត​ក្រុង​ជន​ជាតិ​ខ្មែរ​រង​របួស​ធ្ងន់។

លោក​បាន​បន្ត​ថា ជន​រង​គ្រោះ ស្លាប់​ទាំង​៤​នាក់​មាន​ទី​លំនៅ​ក្នុង​ភូមិ១ ឃុំ​ព្រែក​ខ្សាយ​«ខ» ស្រុក​ពាមរក៍ ខេត្ត​ព្រៃវែង​មាន​ឈ្មោះ ឌឹក រតនៈ ភេទ​ប្រុស​អាយុ​២៤​ឆ្នាំ ជា​តៃកុង​ឡាន​កៀប​ជាប់​នៅ​ក្នុង​រថយន្ត ២- ឌឿន ថុនា ភេទ​ប្រុស អាយុ​៦ឆ្នាំ ៣-ឌឿន នឿន ភេទ​ប្រុស អាយុ៤​ឆ្នាំ និងទី៤-​ឈ្មោះស្រី ខួច អាយុ​៧ឆ្នាំ បាន​បោក​ទង្គិច​បែក​ក្បាល​បាក់​ដៃជើង​និង​បាក់​កស្លាប់ ពេល​បញ្ជូន​ទៅ​សង្គ្រោះ​នៅ​មន្ទីរ​ពេទ្យ​បង្អែក​អ្នក​លឿង ហើយ​មាន​១២​នាក់​ទៀត​រង​របួស​ធ្ងន់​ស្រាល។

លោក បញ្ជាក់ថា៖ «រថយន្ត​ក្រុង​របស់​ក្រុម​ហ៊ុន​វ៉ានរិច​៤៥​កៅអី បាន​រក្សា​ទុក​នៅ​អធិការ​ដ្ឋាន​នគរបាល​ស្រុក​ព្រះ​ស្តេច រីឯ​រថយន្ត​សាំយ៉ុង​បាន​រក្សា​ទុក​នៅ​ប៉ុស្តិ៍​នគរបាល​ឃុំ​កំពង់​សឹង ដោយ​ខាង​សមត្ថកិច្ច​ជំនាញ​កំពុង​ចាត់​ការ​ទៅ​តាម​ផ្លូវ​ច្បាប់»។

ស្រ្តី​ជន​ជាតិ​វៀតណាម​បម្រើ​ការ​នៅ​ក្រុមហ៊ុន​រថយន្ត​ដឹក​អ្នក​ដំណើរ​វ៉ាន​រិច ពី​ម្សិល​មិញ​បាន​ប្រាប់​ថា តៃកុង​បើក​រថយន្ត​ក្រុង​ឈ្មោះ រិទ្ធ ជា​ជនជាតិ​ខ្មែរ​រង​របួស​ជើង​និង​ក្បាល​មិន​បញ្ជូន​ទៅ​ព្យាបាល​នៅ​វៀត​ណាម​ទេ រីឯ​រថយន្ត​ដែល​ខូច​ខាត​ផ្នែក​មុខ​ស្ទើរ​ទាំង​ស្រុង​នោះ ខាង​នគរបាល​ចរាចរ​កំពុង​ឃាត់​ទុក។

ស្រ្តីម្នាក់​បញ្ជាក់​ថា ៖ «រថយន្ត​របស់​ក្រុម​ហ៊ុន​ត្រូវ​នគរបាល​អូស​យក​ទៅ​ទុក​នៅ​ការិយា​ល័យ​នគរបាល​ស្រុក​ព្រះ​ស្តេច មិន​ដឹង​ថា ថៅកែ​ក្រុម​ហ៊ុន​ទាមទារ​សំណង​បែប​ណា​ទេ​ពី​ភាគី​ម្ខាង​ទៀត»។

ក្រុម​អ្នក​ដំណើរ​រង​គ្រោះ​មិន​អាច​ទាក់​ទង​បញ្ជាក់​ពី​ករណី​នេះ​បាន​ទេ​កាល​ពី​ម្សិល​មិញ។

បើតាម​ការ​ឲ្យ​ដឹង ក្នុង​កិច្ច​ប្រជុំ​ស្តីពី​ការ​ចែក​រំលែក​បទ​ពិសោធ ការ​ត្រួត​ពិនិត្យ​ករណី​បើកបរ ក្រោម​ឥទ្ធិពល​នៃ​ជាតិ​ស្រវឹង និង​ការ​មិន​ពាក់​មួក​សុវត្ថិភាព​ពេល​យប់ ដែល​ធ្វើ​ឡើង​នៅ​ថ្ងៃ​ទី​២​ខែ​តុលា នៅ​អគ្គ​ស្នង​ការ​ដ្ឋាន​នគរបាល​ជាតិ អត្រា​គ្រោះ​ថ្នាក់​ចរាចរណ៍​ផ្លូវ​គោក និង​អ្នក​បាត់បង់​ជីវិត ក្នុង​រយៈពេល​១១​ខែ ឆ្នាំ​២០១២​នេះ មាន​ការ​ថយ​ចុះ បើ​ធៀប​ទៅ​នឹង​រយៈពេល​ដូច​គ្នា​ក្នុង​ឆ្នាំ​២០១១ ដោយ​ក្នុង​ឆ្នាំ​២០១២​នេះ គ្រោះ​ថ្នាក់​ចរាចរណ៍​កើត​ឡើង​ចំនួន​៣ ៩៥៣​លើក និង​បណ្តាល​ឲ្យ​ស្លាប់​មនុស្ស​១៧៤៨​នាក់។

តាម​របាយ​ការណ៍​ក្នុង​គេហទំព័រ​អគ្គស្នង​ការ​នគរបាល​ជាតិ ស្តីពី​លទ្ធផល​នៃ​ការ​អនុវត្ត​ច្បាប់​លើ​ករណី​បើកបរ​ក្រោម​ឥទ្ធិពល នៃ​ជាតិ​ស្រវឹង និង​មិន​ពាក់​មួក​សុវត្ថិភាព​ពេល​យប់​បាន​បញ្ជាក់​ថា នៅ​ក្នុង​ឆ្នាំ​២០១២​នេះ (គិត​ពី​ថ្ងៃ​ទី​១១​ខែ​វិច្ឆិកា​ឆ្នាំ​២០១១​ដល់​ថ្ងៃ​ទី​១០​ខែ​តុលា ២០១២) គ្រោះ​ថ្នាក់​ចរាចរណ៍​កើត​ឡើង​ចំនួន​៣ ៩៥៣​លើក បើ​ធៀប​នឹង​រយៈ​ពេល​ដូច​គ្នា​ក្នុង​ឆ្នាំ​២០១១ មាន​ចំនួន ៤ ៧៣៣​លើក ថយ​ចុះ ៧៨០​លើក ស្មើ​១៦​ភាគរយ​បណ្តាល​ឲ្យ​ស្លាប់​មនុស្ស​១ ៧៤៨​នាក់ លើ​១ ៧៥៥​នាក់ ថយ​ចុះ​០៧ នាក់ ស្មើ០,៤​ភាគរយ របួស​ធ្ងន់​៣ ៩៥៤​នាក់ លើ​៤ ៦៦១​នាក់ ថយ​៧០៧​នាក់ ស្មើ​១៥​ភាគរយ និង​របួស​ស្រាល​ចំនួន​២ ៨២៩​នាក់ លើ​៣ ៥២៦​នាក់ ថយ​ចុះ ៦៩៧​នាក់ ស្មើ​២០​ភាគរយ។

ប្រភព​នេះ​បញ្ជាក់​ដែរ​ថា មូលហេតុ​ដែល​បណ្តាល​ឲ្យ​មាន​គ្រោះ​ថ្នាក់​ច្រើន​ជាង គឺ​មក​ពី​ការ​បើកបរ​លើស​ល្បឿន ដែល​មាន​រហូត​ដល់​ទៅ​៤៧​ភាគរយ ក្រៅពី​នេះ​មិន​គោរព​សិទ្ធិ​អាទិភាព​១៥​ភាគរយ ស្រវឹង​១១​ភាគរយ ប្រជែង ៩ ភាគរយ ប្រហែស ៧ ភាគរយ​មិន​ប្រកាន់​ស្តាំ​៤​ភាគរយ កត្តា​យាន​យន្ត​២​ភាគរយ មិន​គោរព​ភ្លើង​សញ្ញា​២​ភាគរយ សុខ​ភាព ២ ភាគរយ និង​កត្តា​ផ្សេងៗ ៣ ភាគរយ។ ក្នុង​នោះ អ្នក​ជិះ​ម៉ូតូ​មិន​ពាក់​មួក​សុវត្ថិភាព​ក្នុង​ពេល​មាន​គ្រោះ​ថ្នាក់ មាន​៣៥ ភាគរយ៕

អត្ថបទគួរចាប់អារម្មណ៍

  • ស្ដង់ដា​គណនេយ្យ ជា​ធាតុ​ផ្សំ​ដ៏សំខាន់​មួយ​ក្នុង​ក្របខ័ណ្ឌ​គណនេយ្យ និង​ការរាយការណ៍​ហិរញ្ញវត្ថុ ព្រមទាំង​ជួយ​សម្រួល​ដល់​ក្រុមហ៊ុន​/​សហគ្រាស និង​ថ្នាក់ដឹកនាំ​របស់​ក្រុមហ៊ុន ដើម្បី​កំណត់​ឱ្យ​បាន​ច្បាស់លាស់​ពី​ស្តង់ដា​ដែល​ក្រុមហ៊ុន​បាន​ប្រើប្រាស់​សម្រាប់​ការរៀបចំ​របាយការណ៍​ហិរញ្ញវត្ថុ​។

  • ភ្នំពេញ: អស់​រយៈពេល​ជិត​ ១១ ​ខែ បន្ទាប់ពី​ការដាក់​លក់​ដំណាក់កាល​ទី​ ១ ​ប្រកប​ដោយ​ជោគជ័យ​កាលពី​ខែធ្នូ​ឆ្នាំមុន Forest Harmony ជា​ក្រុមហ៊ុន​វិនិយោគ​រួម​រវាង​វិនិយោគិន​ក្នុង​ស្រុក និង​វិនិយោគិន​ជនជាតិ​បារាំង​កាលពី​ថ្ងៃ​សៅរ៍ បាន​ប្រកាស​បើក​ដំណើរការ​គម្រោង​អភិវឌ្ឍន៍​ដំណាក់កាល​ទី​ ២ ​របស់ខ្លួន​មាន​ឈ្មោះ​ថា Golf Harmony រួមមាន ទីលាន​វាយ​កូនហ្គោល និង​គម្រោង​អគារ​ខុនដូ​។

  • ភ្នំពេញ៖ បន្ទាប់​ពី​​​ការ​​ប្រឡង​​ប្រណាំង​​​ថត​វីដេអូ ​​ដើម្បី​ផ្សព្វផ្សាយ​​ពី​សក្តានុពល​នៃ​តំបន់​សហគមន៍​​​​ទេសចរណ៍ និង​​​​​អេកូ​ទេសចរណ៍​ ​បាន​រៀបចំ​​ ២ រដូវកាល​មក​​ហើយ​​ ខណៈ​​ការ​ប្រឡង​ប្រណាំង​រដូវកាល​ទី​៣ ​​​ឆ្នាំ ​២០២០​ ក៏​បាន​មក​​ដល់​​​។

  • ភ្នំពេញៈ រដ្ឋមន្ត្រីក្រសួង​អប់រំ​យុវជន និង​កីឡា​លោក​ ហង់ជួន ណារ៉ុន បានអនុញ្ញាត​ជា​​គោលការណ៍​ឱ្យ​គ្រឹះស្ថានសិក្សា​ឯកជន​ទាំងអស់​អាច​ដំណើរការឡើង​វិញ​នូវ​សេវា​រថយន្ត​ដឹក​សិស្ស សេវា​បណ្ណាល័យ សកម្មភាព​អប់រំ​កាយ និង​កីឡា និង​សេវា​អាហារដ្ឋាន ប៉ុន្តែ​ត្រូវអនុវត្ត​នូវ​គោលការណ៍​ប្រតិបត្តិ​ស្តងដា​ (SOP) ​ឱ្យ​ម៉ឺងម៉ាត់​។

  • តាកែវៈ មន្ត្រី​ការពារ​ទេសភាព​បឹង​ព្រែកល្ពៅ​ឱ្យ​ដឹងថា សម្បុក​សត្វ​ចង្កៀលខ្យង​ជាង​ ២ ០០០ ​សម្បុក​ បានបង្ហាញ​វត្តមាន​ជា​លើកដំបូង​ក្នុង​រយៈពេល​ជាង​ ១៥ ​ឆ្នាំ​ ដែល​នេះ​ជា​កំណត់ត្រា​ថ្មី​ដែល​ពុំ​ធ្លាប់មាន​នៅក្នុង​តំបន់​ការពារ​ទេសភាព​បឹង​ព្រែកល្ពៅ​ ស្ថិត​ក្នុងស្រុក​បុរីជលសា និង​ស្រុក​កោះអណ្តែត ខេត្តតាកែវ​។

  • ស្ទឹងត្រែង/ភ្នំពេញៈ គ្រឿងញៀន​ប្រភេទ​មេតំហ្វេតាមីន​ (ice) ​ចំនួន​ ៤១ ​គីឡូក្រាម​ត្រូវ​បាន​មន្ត្រី​អាវុធហត្ថ​ខេត្ត​ស្ទឹងត្រែង​បញ្ជូន​ទៅ​សាលាដំបូង​ខេត្ត​នាថ្ងៃទី​ ២៤ តុលា បន្ទាប់ពី​បង្ក្រាប​នៅ​ស្រុក​បុរី​ឣូរស្វាយសែនជ័យ​ពី​ថ្ងៃ​ទី​ ២៣ តុលា ខណៈ​ម្ចាស់​កំពុង​រត់គេច​ខ្លួន​។