The Phnom Penh Post Search

Search form




Logo of Phnom Penh Post newspaper Phnom Penh Post - សំណុំ​រឿង​ជនជាតិ​នូវែលសេឡង់​ត្រូវ​ឧទ្ធរណ៍​លើក​ទៅ​ជម្រះ​ជា​លើក​ទី៣




សំណុំ​រឿង​ជនជាតិ​នូវែលសេឡង់​ត្រូវ​ឧទ្ធរណ៍​លើក​ទៅ​ជម្រះ​ជា​លើក​ទី៣

សំណុំ​រឿង​ជនជាតិ​នូវែលសេឡង់​ត្រូវ​ឧទ្ធរណ៍​លើក​ទៅ​ជម្រះ​ជា​លើក​ទី៣

20140508_10
ជនជាប់ចោទពីបទរំលោភក្មេងស្រី៥នាក់ ពេលឡើងសវនាការឧទ្ធរណ៍ គឹម សារុំ

ភ្នំពេញៈ សំណុំ​រឿង​បុរស​ជនជាតិ​នូវែលសេឡង់ ពាក់ព័ន្ធ​ករណី​ចាប់​រំលោភ​ជា​ប្រព័ន្ធ​លើ​ក្មេង​អ្នក​បម្រើ ៥​នាក់ នៅ ខេត្ត​សៀមរាប ពី​ថ្ងៃ​ពុធ ត្រូវ​សាលា​ឧទ្ធរណ៍​ប្រកាស​លើក​យក​ទៅ​ជំនុំ​ជម្រះ​ឡើង​វិញ​នៅ​ថ្ងៃ ទី២១ ខែ​ឧសភា ដោយ​សារ​តែ​ការ​ជំនុំ​ជម្រះ ២ លើក​មុន​មាន​វិសមិតភាព​លើ​ចៅក្រម (ចៅក្រម​ដដែល)។

លោក ប៉ុល សំអឿន ប្រធាន​ក្រុម​ប្រឹក្សា​ជំនុំ​ជម្រះ​សាលា​ឧទ្ធរណ៍​ប្រកាស​ក្នុង​សវនាការ​ថា សំណុំ​រឿង​របស់​ជន​ជាប់​ចោទ ឈ្មោះ Graham Robert cleghorn អាយុ ៦៧​ឆ្នាំ ជនជាតិ នូវែលសេឡង់ ដែល​ត្រូវ​ប្រកាស​សាល​ដីកា​នៅ​ថ្ងៃ ទី​៧ ឧសភា តែ​មិន​អាច​ធ្វើ​ទៅ​បាន​ទេ ដោយសារ​ដំណើរការ​ជំនុំ​ជម្រះ​លើក​មុន​មាន​វិសមិតភាព​ចៅក្រម​ហេតុ​ដូច្នេះ​ត្រូវ​លើក​ទៅ​ធ្វើ​ការ​ជំនុំ​ជម្រះ​ឡើង​វិញ នៅ​ថ្ងៃ ទី​២១ ខែ​ឧសភា ខាង​មុខ។

លោក ឌុន វិបុល មេធាវី ការពារ​សិទ្ធិ​ជន​ជាប់​ចោទ បាន​ឲ្យ​ដឹង​នៅ​ក្រៅ​បន្ទប់​សវនាការ​ថា ករណី​ដែល​ចៅក្រម​ប្រកាស​ឲ្យ​ជំនុំ​ជម្រះ​រឿង​នេះ​ឡើង​វិញ​ព្រោះ ថា រឿង​នេះ​ត្រូវ​តុលាការ​កំពូល​បង្វិល​មក​ឧទ្ធរណ៍​វិញ ហើយ​សាលា​ឧទ្ធរណ៍​បាន​បើក​សវនាការ ២​លើក កាត់​ក្តី​កំបាំង​មុខ​មួយ​លើក​និង​កាត់​ក្តី​នៅ​ចំពោះ​មុខ​លើក ទី២ នៅ​ថ្ងៃ ទី​៣០ ខែ​មេសា កន្លង​ទៅ។

ប៉ុន្តែ​ការ​ជំនុំ​ជម្រះ​ទាំង​ពីរ​លើក​នេះ មាន​សមាសភាព​ចៅក្រម​ជា​មនុស្ស​ដដែលៗ។ តាម​នីតិវិធី​នៃ​ការ​ជំនុំ​ជម្រះ​បើ​មាន​ចៅក្រម ៣​នាក់ ក្នុង​នោះ​មាន​ម្នាក់​បន្ត​មក​ជម្រះ​លើក​ក្រោយ​ទៀត គឺ​មិន​អនុញ្ញាត​ទេ។

លោក​បញ្ជាក់​ថា៖ «រឿង​នេះ​ត្រូវ​កាត់​ក្តី​ឡើង​វិញ គឺ​ប្តូរ​សមាសភាព​ចៅក្រម​ថ្មី។ កាត់​លើក​មុន​សាលា​ឧទ្ធរណ៍​តម្កល់​ទោស​កូន​ក្តី​ខ្ញុំ ២០ ឆ្នាំ​ដដែល​តែ​វា​អយុត្តិធម៌​និង​ខុស​បច្ចេកទេស​ទៀត​ផង។ សាលក្រម​កូន​ក្តី​ខ្ញុំ ចៅក្រម​មើល​អត់​អស់​ពី​សមាសភាព​ចៅក្រម​កាត់​ក្តី ហើយ​ណា​មួយ​ច្រើន​ឆ្នាំ​ទៀត ធ្វើ​ឲ្យ​ចៅ​ក្រម​ភ្លេច​ហើយ​គាត់​ចូល​មក​កាត់​ម្តង​ទៀត»។

សមាសភាព​ក្រុម​ប្រឹក្សា​ជំនុំ​ជម្រះ​សំណុំ​រឿង​នេះ​ឡើង​វិញ នៅ​មិន​ទាន់​ប្រកាស​ឲ្យ​ដឹង​នៅ​ឡើយ កាល​ពី​ម្សិលមិញ។

តាម​អង្គហេតុ លោក Graham Robert cleghorn ត្រូវ​នារី ៥​នាក់ ប្តឹង​មក​សមត្ថកិច្ច​ប្រឆាំង​ការ​ជួញ​ដូរ​មនុស្ស ខេត្ត​សៀមរាប ឲ្យ​ចាប់​ខ្លួន​នៅ​ថ្ងៃ ទី​២៣ ខែ​តុលា ឆ្នាំ​២០០៣ នៅ​ជាយ ក្រុង​សៀមរាប ពី​បទ​លួង​លោម​រំលោភ​ជា​ប្រព័ន្ធ​លើ​ពួក​គេ​ដែល​ជា​អ្នក​បម្រើ​នៅ​ផ្ទះ​គាត់​ដែល​មាន​អាយុ​ចាប់​ពី ១៥ឆ្នាំ ដល់ ១៩​ឆ្នាំ ជា​ថ្នូរ​នឹង​ប្រាក់​ម្នាក់ ២០ ដុល្លារ​ក្នុង ១​ខែ ចន្លោះ​ពី ឆ្នាំ​២០០១ ដល់ ២០០៣។ សំណុំ​រឿង​នេះ​នៅ ខែ​កុម្ភៈ ឆ្នាំ​២០០៤ ត្រូវ​សាលា​ដំបូង ខេត្ត​សៀមរាប កាត់​ទោស​ដាក់​ពន្ធនាគារ​ជន​ជាប់​ចោទ ២០ ឆ្នាំ​ពី​បទ​រំលោភ​សេព​សន្ថវៈ និង​ប្រើ​ប្រាស់​អាវុធ​ខុស​ច្បាប់​និង​ឲ្យ​សង​ជំងឺ​ចិត្ត​ជន​រងគ្រោះ​ចំនួន ២ ម៉ឺន​ដុល្លារ​អាមេរិក៕

អត្ថបទគួរចាប់អារម្មណ៍