The Phnom Penh Post Search

Search form




Logo of Phnom Penh Post newspaper Phnom Penh Post - ស្ត្រី​ម្នាក់​មក​ពី​ស្វាយរៀង ឆ្លង​ទន្លេ​នៅ​តូប​ក្នុង​ផ្សារ​កណ្តាល

ស្ត្រី​ម្នាក់​មក​ពី​ស្វាយរៀង ឆ្លង​ទន្លេ​នៅ​តូប​ក្នុង​ផ្សារ​កណ្តាល

ស្ត្រី​ម្នាក់​មក​ពី​ស្វាយរៀង ឆ្លង​ទន្លេ​នៅ​តូប​ក្នុង​ផ្សារ​កណ្តាល

ភ្នំពេញៈ ស្រ្តី​ម្នាក់​មក​ពី ខេត្ត​ស្វាយរៀង បាន​សម្រាល​កូន​ប្រុស​មួយ​ទម្ងន់ ២,៤ គីឡូក្រាម នៅ​តូប​មួយ ក្នុង ផ្សារ​កណ្តាល រាជធានី​ភ្នំពេញ កាល​ពី​រំលង​អធ្រាត្រ​ឆ្លង​ចូល​ថ្ងៃ​អង្គារ។ ស្រ្តី​រូប​នោះ​ឈ្មោះ ជូ សុខាន់ អាយុ ២៣​ឆ្នាំ រស់​នៅ ភូមិ​ត្របែក ឃុំ-ស្រុក​ស្វាយ​ជ្រុំ ខេត្ត​ស្វាយ​រៀង។

លោក គឹម ភក្តី អាយុ ២៥​ឆ្នាំ ត្រូវ​ជា​ប្តី​រក​ស៊ី​ធាក់​ស៊ីក្លូ បាន​ប្រាប់​ថា ប្រពន្ធ​គាត់​ឡើង​មក​ភ្នំពេញ ១ សប្តាហ៍​ហើយ ដើម្បី​សួរ​សុខ​ទុក្ខ​គាត់ តែ​មិន​បាន​ដឹង​ថា ដល់​ថ្ងៃ​ខែ​ត្រូវ​ឆ្លង​ទន្លេ​ទេ ព្រោះ​ច្រឡំ​ថា ត្រូវ​គ្រប់ ខែ​វិច្ឆិកា។ លោក​បន្ត​ថា៖ «ពួក​ខ្ញុំ​ក្រ​ណាស់ រាល់​ថ្ងៃ ខ្ញុំ​ដើរ​ដេក​តាម​សំយាប​ផ្ទះ​គេ ហើយ​អំឡុង ១ សប្តាហ៍​ដែល​ប្រពន្ធ​មក​លេង​នេះ គឺ​នាង​ដេក​នៅ​លើ​តូប​លក់​អីវ៉ាន់​របស់​គេ​ក្នុង​ផ្សារ​នេះ»។

លោក ភក្តី និយាយ​ថា៖ «យប់​នោះ​គ្រាន់​តែ​ប្រពន្ធ​ខ្ញុំ​ស្រែក​ថា ឈឺ​ពោះ មិន​បាន ១ នាទី​ផង កូន​ក៏​កើត​មក​តែ​ម្តង តែ​បាន​បង​ប្អូន​នៅ​ក្បែរ​នោះ គាត់​ជួយ​បញ្ជូន​ទៅ​ពេទ្យ​កាល់ម៉ែត​ភ្លាមៗ ដើម្បី​ពិនិត្យ​និង​សម្អាត ក្រោយ​មក​យើង​ក៏​ត្រឡប់​មក​ស្នាក់​នៅ​ក្នុង​ផ្សារ​វិញ ព្រោះ​គ្មាន​ប្រាក់​គ្រប់​គ្រាន់​នឹង​ដេក​ពេទ្យ»។

ទោះ​យ៉ាង​ណា​ក្តី លោក ភក្តី ប្រាប់​ថា ក្រោយ​លេច​ឮ​ព័ត៌មាន មាន​សប្បុរសជន​ជាច្រើន រួម​មាន​ប្រជា​ពលរដ្ឋ ប្រធាន​គណៈកម្មការ​ផ្សារ អភិបាល ខណ្ឌ​ដូនពេញ និង​ក្រុម​ការងារ​លោក​ស្រី​ឧប​នាយក​រដ្ឋ​មន្រ្តី មែន សំអន បាន​ផ្តល់​ប្រាក់ និង​សម្ភារ​និង​ចំណី​អាហារ ជា​បន្ត​បន្ទាប់។ លោក​ថា៖ «លោក​ជំទាវ (ម៉ែន សំអន) បាន​រ៉ាប់​រង​ចំណាយ​ទាំង​ស្រុង ហើយ​នាំ​ប្រពន្ធ​កូន​ខ្ញុំ មក​សម្រាក​នៅ​មន្ទីរពេទ្យ​កាល់ម៉ែត វិញ ចំនួន ១ សប្តាហ៍។ ចំណែក​ប្រាក់​ដែល​សេស​សល់ ខ្ញុំ​នឹង​យក​ទៅ​សង​បំណុល នៅ ខេត្ត​ស្វាយរៀង»។

គួរ​រំឭក​ថា កាល​ពី​យប់​ថ្ងៃ ទី០៣ ខែ​កញ្ញា ឆ្នាំ​២០១៤ ស្ត្រី​ម្នាក់​ក៏​បាន​សម្រាល​កូន​នៅ​តាម​ផ្លូវ​នៅ​លើ​ស្ពាន​លេខ ១ ស្ថិត​ក្នុង ភូមិ​ទួលក្រសាំង ស្រុក​ស្អាង ខេត្ត​កណ្តាល ដែរ ដោយ​សារ​តែ​ភាព​ក្រីក្រ ហើយ​គាត់​ឈឺ​ពោះ​ខ្លាំង ធ្វើ​ឲ្យ​បុរស​ជា​ប្តី​ដឹក​មក​មន្ទីរពេទ្យ ក្រុង​តាខ្មៅ មិន​ទាន់។

ស្ត្រី​ម្នាក់​នោះ​មាន​ឈ្មោះ ម៉ែន ចាន់ថា អាយុ ២៧​ឆ្នាំ ប្តី​ឈ្មោះ សយ សៅ អាយុ ៤៣​ឆ្នាំ ជា​កសិក​ររស់​នៅ ភូ​មិក្បាល​កោះ ឃុំ​កោះ​ខ្សាច់​ទន្លា ស្រុក​ស្អាង ខេត្ត​កណ្តាល។ កូន​ស្រី​ដែល​ទើប​សម្រាល គឺជា​កូន ទី៣ ឯ​មូល​ហេតុ​មិន​អាច​មក​មន្ទីរពេទ្យ​ទាន់​គឺ​មក​ពី​ភាព​ក្រីក្រ៕

អត្ថបទគួរចាប់អារម្មណ៍