The Phnom Penh Post Search

Search form




Logo of Phnom Penh Post newspaper Phnom Penh Post - ស្ត្រី​ស្រវឹង​ខួប​ម្នាក់​ចាក់​សាំង​ដុត​ផ្ទះ​ឯង​ឆេះ​ខ្ទេច




ស្ត្រី​ស្រវឹង​ខួប​ម្នាក់​ចាក់​សាំង​ដុត​ផ្ទះ​ឯង​ឆេះ​ខ្ទេច

ស្ត្រី​ស្រវឹង​ខួប​ម្នាក់​ចាក់​សាំង​ដុត​ផ្ទះ​ឯង​ឆេះ​ខ្ទេច

ភ្នំពេញៈ ស្រ្តី​មេផ្ទះ​ផឹក​ស្រា​ស្រវឹង​ខួប​និង​ឈ្លោះ​ជាមួយ​ប្តី​ម្នាក់ បាន​ទិញ​សាំង​២​លីត្រ​ចាក់​ដុត​ផ្ទះ​ខ្លួន​ឯង​ឆេះ​ខ្ទេច​សល់​តែ​ជើង​សសរ ខណៈ​ប្តី​និង​កូន​ចេញ​ពី​ផ្ទះ​ទៅ​រក​បេះ​ស្លឹក​អម្ពិល​លក់ និង​ចំពេល​ដែល​អភិបាល​ខណ្ឌ​ចុះ​សម្ពោធ​ផ្លូវ​បេតុង​មួយ​ខ្សែ​នៅ​ក្នុង​សង្កាត់​សាក់​សំពៅ ខណ្ឌ​ដង្កោ កាល​ពី​ព្រឹក​ថ្ងៃ​ទី​២១ កុម្ភៈ ម្សិលមិញ។

លោក ថោង សុគង់ នាយ​នគរបាល​ប៉ុស្តិ៍​សាក់​សំពៅ​ឲ្យ​ដឹង​ថា​ផ្ទះ​ឈើទំហំ​៦x៨​ម៉ែត្រ ខ្ពស់​ផុត​ពី​ដី​ប្រក់​ហ្វីប្រូ​ស៊ី​ម៉ងត៍​ ត្រូវ​ស្រ្តី​ជា​ម្ចាស់​ផ្ទះ​ដែល​ជា​មនុស្ស​ស្រវឹង​ខួប ទៅ​ទិញ​សាំង​២​លីត្រ​ចាក់​ដុត​ឆេះ​ខ្ទេច នៅ​សល់​តែ​ជើង​សសរ​តែ​មិន​រាល​ដល់​ផ្ទះ​អ្នក​ដទៃ។

លោកមេប៉ុស្តិ៍ប្រាប់​ថា ស្រ្តី​ដុត​ផ្ទះ​ឯង ឈ្មោះ ជេត ម៉ៅ អាយុ​៤១​ឆ្នាំ ឯ​ប្តី​ឈ្មោះ ជា ចាន់ អាយុ​៥០ឆ្នាំ មាន​កូន​ក្នុង​បន្ទុក​៣​នាក់​នៅ​ភូមិ​ខ្វិត សង្កាត់​សាក់​សំពៅ ខណ្ឌ​ដង្កោ រាជធានី​ភ្នំពេញ។

លោកឲ្យ​ដឹង​ដែរ​ថា សមត្ថកិច្ច​នៅ​មិន​ទាន់​ដឹង​ពីមូល​ហេតុ​ទេ​ព្រោះ​ម្ចាស់​ផ្ទះ​ជាអ្នក បង្ក​នោះ​ជា​មនុស្ស​ញៀន​ស្រា ហើយ​តែង​តែ​បង្ក​ជម្លោះ​ក្នុង​គ្រួសារ​រាល់​ថ្ងៃ រហូត​ប្តី​លែង​និយាយ​ស្តី​កើត។​លោកថា មុន​កើត​ហេតុ​គេ​ឃើញ​ស្រ្តី​នោះ​មាន​សភាព​ស្រវឹង​ខ្លាំង​រក​កល​នឹង​ដួល ម្តងៗ តែ​គេ​មិន​ចាប់​អារម្មណ៍​ទេ ព្រោះ​ជា​ទម្លាប់​របស់​នាង​ទៅ​ហើយ តែ​មិន​ដឹង​ជា​យ៉ាង​ម៉េច ក៏​ស្រាប់​តែ​នាង​យក​សាំង​ទៅ​ចាក់​ដុត​ផ្ទះ​បែប​នេះ។

លោកថ្លែងថា៖ «គ្រួសារ​នោះ​ក្រីក្រ​ផ្សែ​ផ្សំ​លក់​ដី​បាន​ធ្វើ​ផ្ទះ​ដែល​នៅ​ដាច់​ពីគេ ហើយ​ពេល​ឆេះ​នោះ ទាំង​សមត្ថកិច្ច​និង​អ្នក​ភូមិ​ភាគ​ច្រើន បាន​ទៅ​ចូល​រួម​ពិធី​សម្ពោធ​ផ្លូវ​បេតុង​មួយ​ខ្សែ នៅ​ឆ្ងាយ​ពី​កន្លែង​ឆេះ ទើប​មិន​មាន​នរណា​ជួយ​ទាន់​ពេល»។

លោកបន្ត ថា ស្រ្តី​ដែល​ដុត​ផ្ទះ​ខ្លួន​ឯង​នោះ ដោយសារ​តែ​ញៀន​ស្រា​បាន​ក្លាយ​ជា​មនុស្ស​ស្ទើរ​ឡប់​សតិ​ទៅ​ហើយ ហើយ​អ្នក​ស្រុក​អ្នក​ភូមិ​រួម​ទាំង​ប្តី​ស្រ្តី​នោះ​ផង​គេ​លែង​ប្រកាន់ គាត់​ទៅហើយ។

លោក ថោង គង់ បាន​បញ្ជាក់​ថា គ្រួសារ​មួយ​នេះ​ក្រីក្រ​និង​ដើរ​បូត​ស្លឹក​អម្ពិល​លក់ ដោយ​ពេល​ខ្លះ​ទៅ​បេះ​ទាំង​ពីរ​នាក់​ប្តី​ប្រពន្ធ​និង​ពេល​ខ្លះ​ប្តី​ទៅ​ជាមួយ​កូនៗ​ចេញ​បាត់ៗ​ពី​ផ្ទះ នៅ​តែ​ស្រ្តី​នោះ​ម្នាក់​ឯង​នៅ​ផ្ទះ​ដែល​ចាត់​ថា នេះ​សំណាង​ដែរ ដែល​ស្រ្តី​នោះ​មិន​វង្វេង​ដុត​ខ្លួនឬ​ផ្ទះ​អ្នកដទៃ។

លោកប្រាប់ ឲ្យ​ដឹង​ថា ស្រ្តី​ដុត​ផ្ទះ​ឯង​នេះ ក្រោយ​បង្ក​ហេតុ​ខាង​អធិការ​នគរបាល​ខណ្ឌ​ស្តីទី មិន​បាន​បញ្ជា​ឲ្យ​លោក​ឃាត់​ខ្លួននោះ​ទេ ព្រោះ​ដោយ​យល់​ថា ស្រ្តី​​បង្ក​ជា​មនុស្ស​ញៀន​ស្រា និង​ឡប់​សតិ​មិន​ដឹង​ខុស​ត្រូវ​រហូត​ដុត​ផ្ទះ​ឯង​បែប​នេះ បើ​ឃាត់​ខ្លួន​ក៏​មិន​ដឹង​ជា​ដាក់​ទោស​បែប​ម៉េច​ដែរ។

លោកប្រាប់ថា ទាំង​ប្តីនិង​កូនៗ​ព្រម​ទាំង​សាច់​ញាតិ​បាន​ត្រឹម​តែ​ឈរ​មើល​ជើង​សសរ​នាំ​គ្នា​យំ​ស្តាយ​ស្រណោះ​ផ្ទះ និយាយ​អីក៏​លែង​ចេញ​ដែរ ឯ​សមត្ថកិច្ច​ក៏​មិន​ដឹង​សួរ​នាំ​ស្រ្តី​នោះ​រក​មូល​ហេតុ​យ៉ាង​ម៉េច​ដែរ ព្រោះ​អី​នាង​ឡប់​សតិ​លែង​ដឹង​អី​ទៅ​ហើយ។​

លោក ជា ចាន់ ប្តី​ស្ត្រី​បង្កហេតុ​មិន​អាច​ទាក់ទង​បានទេ៕

អត្ថបទគួរចាប់អារម្មណ៍