The Phnom Penh Post Search

Search form




Logo of Phnom Penh Post newspaper Phnom Penh Post - ស្រ្តី​បឹងកក់-បុរី​កីឡា​ជាប់​ឃុំ​នឹង​បើក​សវនាការ​ចុង​ខែ​នេះ

ស្រ្តី​បឹងកក់-បុរី​កីឡា​ជាប់​ឃុំ​នឹង​បើក​សវនាការ​ចុង​ខែ​នេះ

ស្រ្តី​បឹងកក់-បុរី​កីឡា​ជាប់​ឃុំ​នឹង​បើក​សវនាការ​ចុង​ខែ​នេះ

121213_09a
កុមារាបឹងកក់ម្នាក់នេះ ស្រែកទាមទារឲ្យតុលាការដោះលែងម្ដាយចេញពីពន្ធនាគារ នាពេលកន្លងមក ម៉េង គីមឡុង

ភ្នំពេញៈ តុលាការ​រាជ​ធានី​ភ្នំពេញ នឹង​បើក​សវនាការ​ជំនុំ​ជម្រះ​ករណី​ស្ត្រី​សកម្មជន​ដីធ្លី​ក្នុង​សហគមន៍​ បឹងកក់ និង​បុរីកីឡា ពីរ​នាក់ គឺ​អ្នក​ស្រី យ៉ោម ​បុប្ផា និង​អ្នក​ស្រី​ទឹម សាក់មុន្នី ​ដែល​កំពុង​ជាប់​ឃុំ​ខ្លួន​នៅ​ក្នុង​ពន្ធនាគារ​ព្រៃ​ស នាថ្ងៃ​ពុធ សប្ដាហ៍​ទី ៣ នៃ​ខែ​ធ្នូ​នេះ​។

គិត​មក​ទល់​ពេល​នេះ ការ​ឃុំ​ខ្លួន​មុន​ការ​ជំនុំ​ជម្រះ​លើ​ស្ត្រី​ទាំង​ពីរ​មាន​រយៈ​ពេល​ជាង​បី​ខែ​ហើយ។

អ្នក​ស្រី យ៉ោម​ បុប្ផា ដែល​ជា​សកម្មជន​ដី​ធ្លី​ដ៏​សកម្ម​ក្នុង​សហគមន៍​បឹងកក់ ត្រូវ​បាន​កម្លាំង​សមត្ថកិច្ច​ចាប់​ខ្លួន​ កាល​ពី​ថ្ងៃ​ទី​៤ ខែ​កញ្ញា ឆ្នាំ​២០១២​ ហើយ​ត្រូវ​បាន​តុលាការ​រាជ​ធានី​ភ្នំពេញ​សម្រេច​ឲ្យ​ឃុំ​ខ្លួន​ជា​បណ្ដោះ​ អាសន្ន​នៅ​ពន្ធនាគារ​ព្រៃស​យ៉ាង​តក់​ក្រហល់ ដោយ​ចោទ​ប្រកាន់​ពី​បទ«​ហិង្សា​ដោយ​ចេតនា មាន​ស្ថាន​ទម្ងន់​ទោស»។  ចំណែក​អ្នក​ស្រី ទឹម​ សាក់មុន្នី ដែល​ជា​សកម្ម​ជន​ដីធ្លី​ក្នុង​សហគមន៍​បុរីកីឡា ក៏​ត្រូវ​បាន​តុលាការ​រាជធានី​ភ្នំពេញ​​សម្រេច​ឃុំ​ខ្លួន​ផង​ដែរ​ដោយ​ចោទ​ពី ​បទ​«ប្រកាស​បំភ្លៃ​ការ​ពិត»។

លោក ហម ស៊ុនរិទ្ធិ មេធាវី​មក​ពី​អង្គការ​សិទ្ធិមនុស្ស​លីកាដូ ដែល​ការ​ពារ​ក្ដី​ឲ្យ​ស្ត្រី​ទាំង​ពីរ​ខាង​លើ​នេះ​បាន​ប្រាប់​ភ្នំពេញ​ ប៉ុស្តិ៍​កាលពី​ម្សិល​មិញ​ថា នៅ​រសៀល​ម៉ោង​២​ ថ្ងៃទី​២៦ ខែ​ធ្នូ​ខាង​មុខ​ សាលា​ដំបូង​រាជធានី​ភ្នំពេញ នឹង​ធ្វើ​ការ​ជំនុំ​ជម្រះ​លើ​ករណី​កូន​ក្ដី​ទាំង​ពីរ​នាក់​របស់​លោក។

លោក បាន​ឲ្យ​ដឹង​ថា៖«មន្ត្រី​តុលាការ​រាជ​ធានី​ភ្នំពេញ បាន​ផ្ដល់​ឯកសារ​ស្ដី​ពី​កាល​បរិច្ឆេទ​នៃ​ការ​បើក​សវនា​ការ​ជំនុំ​ជម្រះ នេះ​កាលពី​មួយ​សប្ដាហ៍​មុន ចំពោះ​ករណី​អ្នកស្រី យ៉ោម ​បុប្ផា ដោយ​ឡែក​ករណី​អ្នក​ស្រី ទឹម សាក់​មុន្នី ខ្ញុំ​ទើប​តែ​ទទួល​បាន​ដំណឹង​ កាល​ពី​ប៉ុន្មាន​ម៉ោង​មុន​នេះ​ថា ឲ្យ​យក​ឯកសារ»។

លោក​បន្ត​ថា៖«នៅ​ថ្ងៃ​ បើក​សវនាការ​ជំនុំ​ជម្រះ​ខាង​មុខ​នេះ​ខ្ញុំ​នឹង​ខិតខំ​ប្រឹងប្រែង​ឲ្យ​អស់​ពី ​សមត្ថភាព​ដើម្បី​ជួយ​ទាមទារ​ភាព​យុត្តិធម៌​តាម​ផ្លូវ​ច្បាប់​ឲ្យ​ពួក​គាត់​ »។

លោក លួស សាខន ដែល​ជា​ប្ដី​របស់​អ្នក​ស្រី យ៉ោម​ បុប្ផា បាន​ប្រាប់​ភ្នំពេញ ប៉ុស្តិ៍​ថា បច្ចុប្បន្ន​ប្រពន្ធ​របស់​គាត់​មាន​សភាព​ស្គម​ស្គាំង និង​ស្លេក​ស្លាំង ព្រោះ​តែ​គាត់​មាន​បញ្ហា​ជំងឺ​ខ្សោយ​បេះដូង និង​ក្រពះ ហើយ​ថែម​ទាំង​រស់​នៅ​ក្នុង​បរិស្ថាន​មិន​ល្អ កង្វះ​អាហារូបត្ថម្ភ ព្រម​ទាំង​មាន​ការ​ឈឺចាប់​ចំពោះ​ការ​ចោទ​ប្រកាន់​ទាំង​អយុត្តិធម៌​ពី សមត្ថកិច្ចផង​ដែរ​។

លោក​បាន​ប្រាប់​ឲ្យ​ដឹង​ទៀត​ថា កាលពី​ពីរ​ខែ​មុន​ប្រពន្ធ​របស់​គាត់​បាន​ប្រាប់​ថា នាង​នឹង​«សម្លាប់​ខ្លួន»​នៅ​ក្នុង​ពន្ធនាគារ​ ប្រសិន​បើ​មន្ត្រី​អនុរក្ស​ពន្ធនាគារ​ នៅ​តែ​បង្ខំ​ឲ្យ​ផ្ដិត​មេដៃ​នៅ​លើ​បន្ទះ​ក្ដារ​តូច​មួយ​ដែល​សរសេរ​អំពី​ករណី​ដែល ​ត្រូវ​បាន​គេ​ចោទ​ប្រកាន់​មក​លើ​នាង និង​តម្រូវ​ឲ្យ​នាង​ដាច់​ខាត​ត្រូវ​តែ​ពាក់​ក្ដារ​បន្ទះ​នោះ​នៅ​នឹង​ក របស់​នាង​។

លោក លួស សាខន នៅ​តែ​អះអាង​ថា៖​«ភរិយា​ខ្ញុំ និង​ខ្ញុំពិត​ជា​មិន​បាន​ប្រព្រឹត្ត​ដូច​ការ​ចោទ​ប្រកាន់​នោះ​ទេ»៕

អត្ថបទគួរចាប់អារម្មណ៍