The Phnom Penh Post Search

Search form

Logo of Phnom Penh Post newspaper Phnom Penh Post - ស្លាប់​៣​នាក់​ក្នុង​ថ្ងៃ​តែ​មួយ​នៅ​ស្រុក​ជើង​ព្រៃ

ស្លាប់​៣​នាក់​ក្នុង​ថ្ងៃ​តែ​មួយ​នៅ​ស្រុក​ជើង​ព្រៃ

ស្លាប់​៣​នាក់​ក្នុង​ថ្ងៃ​តែ​មួយ​នៅ​ស្រុក​ជើង​ព្រៃ

កំពង់ចាមៈ យ៉ាង​ហោច​ណាស់​មាន​មនុស្ស​បី​នាក់​បាន​ស្លាប់​ដោយ​ករណី​មនុស្ស​ឃាត ចង​ករ​ធ្វើ​អត្តឃាត​និង​លង់​ទឹក នៅ​ថ្ងៃ​ដំបូង​នៃ​ពិធី​បុណ្យ​ចូល​ឆ្នាំ​ថ្មី​នៅ​ស្រុក​ជើង​ព្រៃ។

លោក ប្រាក់ សុខ​ធឿន អធិការ​រង​ស្រុក​ជើង​ព្រៃ បាន​ឲ្យ​ដឹង​ថា ករណី​មនុស្ស​ឃាត បាន​កើត​ឡើង ក្នុង​ភូមិ​ផ្ដៅ​ជុំ​ខាង​កើត ឃុំ​ផ្ដៅ​ជុំ ដែល​ករណី​នេះ បុរស​វ័យ ២៥ ឆ្នាំ ឈ្មោះ ប៊ៀង ប៊ន ដែល​ក្រុម​គ្រួសារ​អះអាង​ថា ជា​មនុស្ស​វិកល​ចរិត បាន​វាយ​យុ​វជន​វ័យ ១៧ ឆ្នាំ ម្នាក់ ឈ្មោះ ខាន់ សេង​ហួត និង​ដំបង​ឈើ​ជ្រុង បណ្ដាល​ឲ្យ​ស្លាប់​នៅ​នឹង​កន្លែង។

លោកបាន​ថ្លែងថា៖ «ករណី​នេះ ភាគី​គ្រួសារ​ជន​រងគ្រោះ និង​គ្រួសារ​ជន​ដៃ​ដល់ បាន​ព្យាយាម​សម្រុះ​សម្រួល​គ្នា ក្រៅ​ប្រព័ន្ធ​តុលាការ ​ប៉ុន្តែ​សមត្ថកិច្ច​យើង បាន​ឃាត់​ខ្លួន​ជន​ដៃ​ដល់ និង​បញ្ជូន​ទៅ​តុលាការ តាម​នីតិវិធី​ច្បាប់ ព្រោះ​នេះ​ជា​បទ​ល្មើស​ព្រហ្ម​ទណ្ឌ»។

កាលពីថ្ងៃ​ទី​១៥ខែមេសា តុលា​ការ​ខេត្តកំពង់​ចាម បាន​សម្រេច​បង្គាប់​ឲ្យ​នាំ​ខ្លួន​ជន​ដៃ​ដល់​ទៅ​ឃុំ​ខ្លួន​ជា​បណ្ដោះ​អាសន្ន ​ក្នុង​ពន្ធនាគារ​ខេត្ត ព្រោះ​ជន​ដៃ​ដល់ ពុំ​មាន​លិខិត​បញ្ជាក់​អំពី​អាការ​នៃ​ជំងឺ​សរសៃ​ប្រសាទ។ ប៉ុន្តែ បើ​យោង​តាម​លោក​ឆៃ គឹម​ឈុន នាយ​នគរបាល​ប៉ុស្តិ៍​ឃុំ ផ្ដៅ​ជុំ បាន​ឲ្យ​ដឹង​កាលពី​ម្សិល​មិញថា នៅ​ថ្ងៃទី ១៦ ខែ​មេសា​ឪពុកជន​សង្ស័យ លោក​មាស ប៊ៀង អាយុ ៦៧ ឆ្នាំ បាន​យក​លិខិត​បញ្ជាក់ ពី​មន្ទីរ​ពេទ្យ​រុស្ស៊ី​ទៅ​បង្ហាញ​មន្ត្រី​តុលាការ ហើយ មន្ត្រី​តុលា​ការ ក៏​បាន​ដោះ​លែង​ជន​សង្ស័យ​នៅ​ក្រៅ​ឃុំ​ជា​បណ្ដោះ​អាសន្ន។

លោក គឹម ឈុន បញ្ជាក់​ថា៖ «បច្ចុប្បន្ន ជន​សង្ស័យ​កំពុង​ត្រូវ​បាន​ក្រុម​គ្រួសារ ឃុំ​នៅ​ក្នុង​ផ្ទះ​ព្រោះ​ខ្លាច​ចេញ​ទៅ​ក្រៅ​វាយ​សម្លាប់​គេ​ទៀត»។

ចំណែកអ្នកស្រី ខាន់ ហ៊ាន ជា​ម្ដាយ​មីង​ជន​រងគ្រោះ បាន​ថ្លែង​ថា គាត់​មិន​ចង់​ប្ដឹង​ប្ដល់​អ្វី​វែង​ឆ្ងាយ​នោះ​ទេ គឺ​សុំ​ឲ្យ​តែ​ភាគី​គ្រួសារ​ជន​ដៃ​ដល់ ជួយ​ឧបត្ថម្ភ​ថវិកា​ចំនួន ២០០០ ដុល្លារ  ដើម្បី​រៀប​ចំ​ពិធី​បុណ្យសព​ឲ្យ​ក្មួយ​របស់​អ្នកស្រី​ឲ្យ​បាន​សមរម្យ ប៉ុន្តែ​ភាគី​គ្រួសារ​ជន​ដៃ​ដល់​មិន​ព្រម។

អ្នកស្រីបន្ត​ថា៖«គេ​ថា​គេ​មាន​លទ្ធភាព​ត្រឹម​តែ ១៥០០ ដុល្លារ ដូច្នេះ​ខ្ញុំ​មិន​ព្រម​ទេ ហើយ​ខ្ញុំ​ក៏​មិន​ជឿ​ថា ជន​ដៃ​ដល់​នោះ ជា​មនុស្ស​វិកល​ចរិត​ដែរ ព្រោះ​កន្លង​មក​យើង​ខ្ញុំ​មិន​ដែល​ដឹង​ថា ជន​ដៃ​ដល់​មាន​ជំងឺ​សរសៃ​ប្រសាទ​នោះ​ទេ»។

លោកមាស ប៊ៀងមិន​អាច​ទំនាក់​ទំនង​សុំ​ការ​អធិប្បាយ​បាន​ទេ។

ចំណែក​នៅ​ឯ​ភូមិ​ត្រពាំង​ទឹម ឃុំ​ព្រីងជុំ បុរស​ម្នាក់​បាន​ចងក ក្នុង​ផ្ទះ​ធ្វើ​អត្តឃាត បន្ទាប់​ពី​តូច​ចិត្ត​នឹង​ក្រុម​គ្រួសារ ស្ដី​បន្ទោស បន្តិច​បន្តួច។ លោក​ប្រាក់ សុខ​ធឿន បាន​ឲ្យ​ដឹង​ថា ជន​ចង​កធ្វើ​អត្តឃាត​នោះ ឈ្មោះ​សុច ស៊ីន អាយុ ៣០ ឆ្នាំ មាន​មុខ​របរ​ជា​កម្មករ​ចម្ការ​កៅស៊ូ។ ដោយ​ឡែក​នៅភូមិ​តា​សែន ឃុំ សូទិព កុមារា​ឈ្មោះ​មាន មាស អាយុ ១០ ឆ្នាំ បាន​លង់​ទឹក​ស្លាប់ ​នៅ​ក្នុង​ស្រះ ក្បែរ​ផ្ទះ ខណៈ​ឪពុក​ម្ដាយ​របស់​គេ​ជាប់​រវល់ ជួយ​រៀប​ចំ​ពិធី​លេង​ល្បែង​កម្សាន្ត​នៅ​ឯវត្ត៕

អត្ថបទគួរចាប់អារម្មណ៍