The Phnom Penh Post Search

Search form




Logo of Phnom Penh Post newspaper Phnom Penh Post - ស្លាប់ ៣ ចូល​ពេទ្យ ៣៣ នាក់​សង្ស័យ​ពុល​សាច់​ឆ្កែ

ស្លាប់ ៣ ចូល​ពេទ្យ ៣៣ នាក់​សង្ស័យ​ពុល​សាច់​ឆ្កែ

ស្លាប់ ៣ ចូល​ពេទ្យ ៣៣ នាក់​សង្ស័យ​ពុល​សាច់​ឆ្កែ

ក្រចេះ៖ គិត​ត្រឹម​ល្ងាច​ម្សិលមិញ​នេះ យ៉ាង​ហោច​មាន​មនុស្ស ៣ នាក់​បាន​ស្លាប់ ចំណែក ៣៣ នាក់​ទៀត​កំពុង​សម្រាក​ព្យាបាល​នៅ​មន្ទីរពេទ្យ​បង្អែក​ស្រុក ស្នួល ដែល​ករណី​នេះ សមត្ថកិច្ច បាន​សន្និដ្ឋាន​ជា​ជំហាន​ដំបូង​ថា មក​ពី​ពុល​សាច់ឆ្កែ និង​ស្រា។

តាម​របាយការណ៍​ប៉ូលិស​ស្រុក ស្នួល ហេតុការណ៍​នេះ បាន​កើត​ឡើង​នៅ​យប់​ថ្ងៃ​អាទិត្យ និង​ឈាន​ចូល​ដល់​ព្រឹក​ថ្ងៃ​ចន្ទ។ ជន​រងគ្រោះ​ស្លាប់ មាន​ឈ្មោះ ជា រ៉េត ភេទប្រុស អាយុ ៧៦ ឆ្នាំ, ឈ្មោះ ប្រឹង សារ៉ន ភេទស្រី អាយុ ៣៥ ឆ្នាំ និង​ឈ្មោះ ប៊ិន ឡៃគេង ភេទស្រី អាយុ ៥៧ ឆ្នាំ ចំណែក​អ្នក​រងគ្រោះ តែ​មិន​ស្លាប់​និង​កំពុង​ទទួល​ការ​ព្យាបាល​នៅ​មន្ទីរ​ពេទ្យ​បង្អែក​ស្រុក ស្នួល មាន​សរុប ៣២ នាក់​និង​ម្នាក់​ទៀត​ត្រូវ​គេ​បញ្ជូន​ទៅ​ពេទ្យ​ខេត្ត។

អធិការ​នគរបាល​ស្រុក​ស្នួល លោក ចាន់ សុគីម បាន​ឲ្យ​ដឹង​តាម​ការ​ស្រាវជ្រាវ​ថា នៅថ្ងៃ​កើត​ហេតុ​ដំបូង ទី៦ ខែ​ធ្នូ ម៉ោង ១០​ព្រឹក ជន​រងគ្រោះ​ឈ្មោះ ជា រ៉េត បាន​ឃើញ​ឆ្កែ​មួយ​ក្បាល​ស្លាប់ ដែល​ត្រូវ​ជន​មិន​ស្គាល់​មុខ​បំពុល​ថ្នាំ តែ​ជន​រងគ្រោះ មិន​បាន​ដឹង​ទេ ក៏​យក​ឆ្កែ​នោះ​មក​ផ្ទះ​ឲ្យ​កូន​ប្រសា​របស់​ខ្លួន ឈ្មោះ​ ប៊ិន ឡៃគេង ធ្វើ​ម្ហូប​និង​ចែក​ជូន​អ្នក​ជិត​ខាង​បរិភោគ​ពេល​ល្ងាច។

លោកថា៖ «ជន​រងគ្រោះ ជា រ៉េត បាន​ពុល​បែក​ពពុះ​មាត់​ស្លាប់​នៅ​ម៉ោង ១០ យប់ ចំណែក​អ្នក​ភូមិ ដែល​ទទួល​បាន​សាច់​ឆ្កែ​ចម្អិន​រួច​ក៏​បាន​មក​កំដរ​សព និង​បាន​បន្ត​ហូប​សាច់​ឆ្កែ​នោះ​ទៀត ដោយ​មិន​ដឹង​ថា​ពុល​ទេ»។

លោក​បាន​បន្ត​ថា នៅ​ថ្ងៃ​បន្ទាប់​ទី ៧ ខែ​ធ្នូ ម្សិលមិញ ដោយសារ​ជាតិ​ពុល​ធ្វើ​ទុក្ខ ស្ត្រី​ឈ្មោះ ប៊ិន ឡៃគេង ជា​កូន​ប្រសា​ជន​រងគ្រោះ ជា រ៉េត ក៏​បាន​ស្លាប់​ភ្លាមៗ​នៅ​ម៉ោង ១១ ព្រឹក រីឯ​អ្នក​ជិត​ខាង​ម្នាក់​ទៀត​ឈ្មោះ ប្រឹង សារ៉ន បាន​ស្លាប់​នៅ​ម៉ោង​ ១ រសៀល ខណៈ​អ្នក​ជិត​ខាង ៣៣ នាក់​បាន​ចាប់​ផ្តើម​បែក​ពពុះ​មាត់ និង​ក្អួត​ចង្អោរ​ធ្ងន់ធ្ងរ ប៉ុន្តែ​ត្រូវ​បញ្ជូន​ទៅ​ពេទ្យ​ទាន់​ពេល។

លោក សុគីម បញ្ជាក់​ថា៖ «ការ​ពុល​នេះ​គឺ​មាន​ទាំង​ចាស់ និង​ក្មេង ប៉ុន្តែ​អ្នក​ហូប​តិច ពុលតិច អ្នក​ហូប​ច្រើន ពុល​ខ្លាំង តែ​មក​ទល់​ពេល​នេះ ស្ថាន​ភាព​មិន​ធ្ងន់ធ្ងរ​ខ្លាំង​ទេ គ្រាន់​តែ​នៅ​ក្អួត​ចង្អោរ​ខ្លះ​ប៉ុណ្ណោះ»។

បើតាម លោក​អធិការ​ស្រុក ការ​សន្និដ្ឋាន​ដំបូង ករណី​ពុល នេះ គឺ​មក​ពី​ការ​បរិភោគ​សាច់​ឆ្កែ ដែល​ត្រូវ​បាន​ជន​មិន​ស្គាល់​មុខ​ដាក់​ថ្នាំ​បំពុល តែ​យ៉ាង​ណា លោក​ថា សមត្ថកិច្ច​ជំនាញ បាន​បញ្ជូន​នូវ​សាក​សព​ជន​រងគ្រោះ សាច់ឆ្កែ និងស្រា ដែល​អ្នក​ភូមិ​បរិភោគ​នោះ ទៅ​កាន់​មន្ទីរ​សុខាភិបាល​ខេត្ត ក្រចេះ ដើម្បី​ធ្វើ​កោសល្យ​វិច័យ និង​បញ្ជាក់​ពី​មូល​ហេតុ​ឲ្យ​ច្បាស់​លាស់​នៅ​ពេល​ក្រោយ៕

អត្ថបទគួរចាប់អារម្មណ៍