The Phnom Penh Post Search

Search form




Logo of Phnom Penh Post newspaper Phnom Penh Post - ហូប​សាច់​ឆ្កែ​ពុល​ស្លាប់​ឡើង​ដល់ ៥ នាក់

ហូប​សាច់​ឆ្កែ​ពុល​ស្លាប់​ឡើង​ដល់ ៥ នាក់

ហូប​សាច់​ឆ្កែ​ពុល​ស្លាប់​ឡើង​ដល់ ៥ នាក់

ក្រចេះ: អ្នក​ភូមិ​​ពីរ​នាក់​ផ្សេង​ទៀត​បាន​ស្លាប់​កាលពី​ម្សិលមិញ​ធ្វើ​ឲ្យ​អ្នក​ស្លាប់​កើនឡើង​ដល់ ៥ នាក់ និង​ជិត ៤០ នាក់​ទៀត​ត្រូវ​បាន​បញ្ជូន​ទៅ​សង្គ្រោះ​នៅ​មន្ទីរពេទ្យ​ពាក់ព័ន្ធ​នឹង​ករណី​រើស​ឆ្កែ​ដែល​គេ​បំពុល​ងាប់​យក​មក​ស្ល​ហូប​កាលពី​ថ្ងៃ​ចន្ទ​នៅ​ឃុំ​ស្នួល​។

តាម​របាយការណ៍​របស់​ប៉ូលិស​ស្រុក​ស្នួល​ចេញ​កាលពី​ម្សិលមិញ​បាន​ឲ្យ​ដឹង​ថា​ករណី​ពុល​សាច់ឆ្កែ​នៅក្នុង​ភូមិ​ស្នួល​វត្ត​កើត ស្រុក​ស្នួល​គិត​ត្រឹម​ល្ងាច​ថ្ងៃ​អង្គារ​ម្សិលមិញ​គឺ​មាន​មនុស្ស​ពីរ​នាក់​ទៀត​បាន​ស្លាប់​ចំណែក ៧ នាក់​ត្រូវ​បញ្ចូន​ទៅ​ព្យាបាល​នៅ​មន្ទីរពេទ្យ​បង្អែក​ខេត្ត។

តាម​របាយការណ៍​នោះ​ជនរងគ្រោះ​ស្លាប់​មាន​ឈ្មោះ លីន ឈាង ភេទ​ប្រុស អាយុ ៦៥ ឆ្នាំ ស្លាប់​នៅ​មន្ទីរពេទ្យ​បង្អែក​ខេត្ត និង​ឈ្មោះ អ៊ឹម សិរីបុត្រ ភេទ​ប្រុស អាយុ ៤១ ឆ្នាំ ស្លាប់​នៅ​នឹង​ផ្ទះ​របស់​ខ្លួន​ម៉ោង ៤ ទៀបភ្លឺ​ក្នុង​ភូមិ​ក្បាលស្នួល ឃុំ​ស្នួល។

អធិការ​នគរបាល​ស្រុក​ស្នួល​លោក ចាន់ សុគីម បាន​ឲ្យ​ដឹង​ថា​រហូត​មក​ទល់​ល្ងាច​ម្សិលមិញ​អ្នក​ពុល​ស្លាប់​សរុប​មាន​ចំនួន ៥ នាក់ ស្រី ២ ប្រុស ៣ នាក់ ចំណែក​អ្នក​មិន​ស្លាប់​តែ​កំពុង​ទទួល​ការ​ព្យាបាល​មាន​សរុប ៣៨ នាក់។

លោក​ថ្លែង​ថា៖ «តាម​ស្ថានភាព និង​អាការ​អ្នក​ហូប​តិច ក្អួត និង​ចុកពោះ​តិច​អ្នក​ហូប​ច្រើន​អាការ​ក៏​ធ្ងន់ធ្ងរ​ទៅ»។

បើ​តាម​លោក សុគីម រហូត​មក​ទល់​ពេល​នេះ​ការ​ធ្វើ​កោសល្យ​វិច័យ​ទៅ​លើ​សាច់​ឆ្កែ​ពុល​នោះ​នៅ​មិន​ទាន់​មាន​លទ្ធផល​នៅ​ឡើយ​ទេ​ចំណែក​ការ​កំណត់​អត្តសញ្ញាណ​ជន​ដែល​ដាក់​ថ្នាំ​បំពុល​ឆ្កែ​នោះ​ក៏​មិន​ទាន់​រកឃើញ​នៅ​ឡើយ​ដែរ។

នាយ​ប៉ុស្តិ៍​ស្នួល លោក ថៃ លីធន បាន​ឲ្យ​ដឹង​ថា​បច្ចុប្បន្ន​កម្លាំង​សមត្ថកិច្ច​បាន​កំពុង​ធ្វើការ​ផ្សព្វផ្សាយ​ដោយ​ចាក់​មេក្រូ​ជូន​ដំណឹង​ដល់​ប្រជាពលរដ្ឋ​ដែល​រស់នៅ​ម្តុំ​ចំណុច​កើត​ហេតុ និង​ប្រជាពលរដ្ឋ​ដែល​បាន​ទទួល​ទាន​សាច់​ឆ្កែ​នោះ​មក​ទទួល​ការ​ពិនិត្យ និង​ព្យាបាល​ដោយ​ឥត​គិត​ថ្លៃ​នៅ​មណ្ឌល​សុខភាព​បង្អែក​ស្រុក​ស្នួល។

លោក​ថា៖ «មិន​ដឹង​ថា​មាន​មនុស្ស​ប៉ុន្មាន​នាក់​ឲ្យ​ច្បាស់​ថា​បាន​ទទួល​ទាន​សាច់​ឆ្កែ​នោះ​ទេ​។ ក្រោយ​ការ​ប្រកាស​យើង​ឃើញ​មាន​មនុស្ស ៤ នាក់​ទៀត​មក​ពិនិត្យ​ស្នើសុំ​ថ្នាំ​ព្យាបាល​»​។

គួរ​រំឭក​ថា​ហេតុការណ៍​ពុល​សាច់​ឆ្កែ​ដែល​បណ្តាល​ឲ្យ​មនុស្ស​ជាច្រើន​នាក់​ស្លាប់ និង​ត្រូវ​បញ្ជូន​ទៅ​ព្យាបាល​នេះ​កើតឡើង​​ដោយសារ​ជនរងគ្រោះ​ស្លាប់​ឈ្មោះ ជា រ៉េត អាយុ ៧៦ ​ឆ្នាំ​ បាន​រើស​យក​ឆ្កែ​​ងាប់​​មួយ​ក្បាល​ដោយសារ​ការ​ដាក់​ថ្នាំ​បំពុល​ពី​ជន​មិន​ស្គាល់​មុខ​មក​ចម្អិន​ហូប និង​ចែកចាយ​ដល់​អ្នក​ភូមិ​ហូប​កាលពី​ថ្ងៃ​ចន្ទ​។

ដោយសារ​ តែ​ជីវភាព​ក្រីក្រ​ប្រជាពលរដ្ឋ​ខ្មែរ​ជាច្រើន​នៅ​ជនបទ​តែងតែ​ហូប​នូវ​អ្វី​ដែល​ពួកគាត់​អាច​ហូប​បាន​ដោយ​មិន​បាន​គិត​ពី​ផលប៉ះពាល់​ដល់​សុខភាព​ឡើយ​៕

អត្ថបទគួរចាប់អារម្មណ៍