The Phnom Penh Post Search

Search form

Logo of Phnom Penh Post newspaper Phnom Penh Post - ឡាន​ដឹក​កម្មករ​ទៅ​ធ្វើ​ការ​ដាច់​រ៉ូទីល​ក្រឡាប់ របួស​២៣​នាក់​នៅ​កំពង់​ត្រឡាច




ឡាន​ដឹក​កម្មករ​ទៅ​ធ្វើ​ការ​ដាច់​រ៉ូទីល​ក្រឡាប់ របួស​២៣​នាក់​នៅ​កំពង់​ត្រឡាច

ឡាន​ដឹក​កម្មករ​ទៅ​ធ្វើ​ការ​ដាច់​រ៉ូទីល​ក្រឡាប់ របួស​២៣​នាក់​នៅ​កំពង់​ត្រឡាច

130228_10a
កម្មកររោងចក្រកាត់ដេរដែលទម្លាប់ជិះរថយន្តប្រជ្រៀតគ្នាបែបនេះ តែងជួបគ្រោះថ្នាក់ញឹកញាប់ ហេង ជីវ័ន

កំពង់ឆ្នាំងៈ កម្មករ កម្មការិនី​រោងចក្រ​កាត់​ដេរ​ចំនួន​២៣​នាក់ បាន​រង​របួស​ធ្ងន់ និង​ស្រាល​ពេល​ធ្វើ​ដំណើរ​តាម​រថយន្ត ទៅ​ធ្វើ​ការ កាល​ពី​ម៉ោង​ជាង​៧​ព្រឹក​ថ្ងៃ​ទី២៧ កុម្ភៈ ហើយ​បាន​ជួប​គ្រោះ​ថ្នាក់​ចរាចរណ៍​ក្រឡាប់​ឡាន​ព្រោះ​ដាច់​រ៉ូទីល នៅ​ភូមិស្នង​មុំ ឃុំ​ថ្ម​ឥដ្ឋ ក្នុង​ស្រុក​កំពង់ត្រឡាច។

ភ្លាមៗនោះអ្នក​រងរបួស​ត្រូវ​បាន​បញ្ជូន​ទៅ​សង្គ្រោះ​បន្ទាន់​នៅ​មន្ទីរពេទ្យ​បង្អែក​ស្រុក​កំពង់​ត្រឡាច​ហើយ​អ្នក​របួស​ធ្ងន់​៥នាក់​និង​អ្នក​ របួស​ស្រាល​១៣​នាក់ ត្រូវ​ក្រុម​គ្រួសារ​បញ្ជូន​បន្ត​មក​ព្យាបាល​នៅ​មន្ទីរ​ពេទ្យ​ក្រុង ភ្នំពេញ​ខ្លួន​ឯង។

លោក មាស ស៊ី​ភិន អធិការ​រង​នគរ​បាលស្រុក​កំពង់​ត្រឡាច​បាន​បញ្ជាក់​ពី​ម្សិលមិញ​ថា ​កម្មករ កម្មការិនី​ទាំង​នោះ​ជិះ​រថយន្ត​ទៅ​ធ្វើ​ការ​ព្រឹកម្សិល ចៃដន្យ​រថយន្ត​នោះ​ដាច់​រ៉ូទីល បណ្តាល​ឲ្យ​ក្រឡាប់​ជះ​កម្មករ​រាយ​ប៉ាយ​ពេញ​ដី របួស​គ្រប់ៗ​គ្នា ដែល​៥​នាក់​របួស​ធ្ងន់ និង​១៥នាក់​របួស​ស្រាល។

លោកបន្ទោសថា៖ «ដោយសារ​រថយន្ត​ផ្ទុក​កម្មករ​ប្រជ្រៀត​គ្នា​ខ្លាំង នៅ​ពេល​ជួប​គ្រោះ​ថ្នាក់​ធ្វើ​ឲ្យ​ដួល​សង្កត់​គ្នា រួចជះ​ខ្ទាត​ចេញ​ពី​រថយន្ត​ដោយ​មិន​ដឹង​ខ្លួន ខណៈ​មិន​បាន​ប្រុង​ប្រយ័ត្ន​ជា​មុនផង ទើប​បណ្តាល​ឲ្យ​មាន​អ្នក​របួស​ច្រើន​បែប​នេះ ​តែ​សំណាង​ដែរ​ដែល​មិន​ត្រូវ​រថយន្ត​សង្កត់​ស្លាប់​នោះ»។

អ្នកបើកបរ រថយន្ត​ឈ្មោះ នេត ភី អាយុ៣១ឆ្នាំ នៅ​ភូមិ​ស្ពាន​ដែក ឃុំ​ថ្លក​វេន ស្រុក​សាមគ្គី​មាន​ជ័យ ប្រាប់​ថា គេ​បាន​បើក​ឡាន​ប្រមូល​កម្មករ​តាម​ភូមិ​ លុះ​ចេញ​មក​ដល់​ចំណុច​កើត​ហេតុ​ ក៏​ដាច់​រ៉ូទីល​ក្រឡាប់​ ហើយ​បាន​សមត្ថកិច្ច​និង​អ្នក​ស្រុក ហៅ​ឡាន​សង្គ្រោះ​បន្ទាន់​នៅ​មន្ទីរ​ស្រុក​កំពង់​ត្រឡាច​មក​ដឹកអ្នក​របួស​ភ្លាមៗ។

មន្ត្រី​នគរបាល​ស្រុក​អះអាងថា​ អ្នក​បើក​​រថយន្ត​ពុំ​មាន​ទោស​ពៃរ៍​អីទេ ព្រោះ​ជា​ឧប្បតិ្ត​ហេតុ​ចៃដន្យ ប៉ុន្តែ គ្រាន់​តែ​ហៅមក​សួរ​នាំ​ដើម្បី​ធ្វើ​កំណត់​ហេតុ​ប៉ុណ្ណោះ។

វេជ្ជបណ្ឌិត មុំ ហេង ប្រធាន​មន្ទីរ​ពេទ្យ​បង្អែក​កំពង់​ត្រឡាច​ឲ្យ​ដឹង​ថា មន្ទីរ​ពេទ្យ​បាន​ទទួល​អ្នក​របួស​ទាំង​២៣​នាក់​ភ្លាមៗ​ដែរ ក្នុង​នោះ អ្នក​របួស​ធ្ងន់​៥នាក់​បាក់​ឆ្អឹង​និង​ត្រូវ​ក្បាល​ធ្ងន់ធ្ងរ ដែល​មន្ទីរ​ពេទ្យ​គ្មាន​លទ្ធ​ភាព​សង្គ្រោះ និង​បាន​បញ្ជូន​បន្ត​មក​មន្ទីរពេទ្យ​នៅ​ទី​ក្រុង​ភ្នំពេញ ហើយ​ថា អ្នក​របួស​ស្រាល​៥​នាក់ បាន​នៅ​ព្យាបាល​ក្នុង​មន្ទីរពេទ្យ​លោក។

លោក ស ម៉ូរ៉ា ប្រធាន​សហជីព​កម្មករ​ចំណី​អាហារ​និង​សេវាកម្ម​កម្ពុជា​ពន្យល់​ថា ករណី​នេះ​បើ​ខាង​រោងចក្រ​មិន​ទាន់​បង់​ប្រាក់​របប​បេឡា​ជាតិ​សន្តិសុខ សង្គម​ទេ គឺវា​នៅ​ក្នុង​បន្ទុក​របស់​ថៅកែ​ជា​អ្នក​ចេញ​សំណង​លើ​ការ​ព្យាបាល​ជូន កម្មករ តែ​បើ​រោងចក្រ​ជា​សមាជិក​បេឡា​ជាតិ​សន្តិសុខ​សង្គម គឺ​ខាង​បេឡា​ជាតិ ជា​អ្នក​ចេញ​សំណង​ដល់​កម្មករ​រងគ្រោះ៕

អត្ថបទគួរចាប់អារម្មណ៍