The Phnom Penh Post Search

Search form




Logo of Phnom Penh Post newspaper Phnom Penh Post - ឡាន​បី​បុក​គ្នា​នៅ​ស្រុក​ឈូក​ស្លាប់ ៥ នាក់​របួស ៨ នាក់

ឡាន​បី​បុក​គ្នា​នៅ​ស្រុក​ឈូក​ស្លាប់ ៥ នាក់​របួស ៨ នាក់

ឡាន​បី​បុក​គ្នា​នៅ​ស្រុក​ឈូក​ស្លាប់ ៥ នាក់​របួស ៨ នាក់

កំពតៈ យ៉ាង​ហោច​មាន​មនុស្ស​ចំនួន ៥ នាក់​បាន​ស្លាប់ និង ៨ នាក់​ទៀត​បាន​រង​របួស​ធ្ងន់​និង​ស្រាល នៅ​ក្នុង​ឧប្បត្តិ​ហេតុ​គ្រោះ​ថ្នាក់​ចរាចរណ៍​មួយ​កាល​ពី​ល្ងាច​ថ្ងៃ​ម្សិល​មិញ នៅ​ក្នុង ស្រុក​ឈូក ខេត្ត​កំពត។

លោក អ៊ឹម ឈុន ស្នងការ​រង​ខេត្ត​ទទួល​បន្ទុក​សណ្តាប់​ធ្នាប់ បាន​ឲ្យ​ដឹង​ថា គ្រោះ​ថ្នាក់​ចរាចរណ៍​នេះ​កើត​ឡើង​ដោយ​សារ​រថយន្ត​បី​គ្រឿង​បុក​គ្នា​នៅ​ចន្លោះ​ផ្លូវ​ពី កំពត ទៅ ស្រុក​ព្រៃ​នប់ ត្រង់​ចំណុច ដងទង់ នៅ​ម៉ោង​ជាង ៥ ល្ងាច​ថ្ងៃ​អាទិត្យ។ ករណី​គ្រោះ​ថ្នាក់​ដ៏​រន្ធត់​នេះ​បង្ក​ពី​រថយន្ត​ធុន​ធំ​កង់ ១៦ បាន​ប៉ះ​ទង្គិច​គ្នា​ជាមួយ​រថយន្ត​កាមរី​មួយ​គ្រឿង​ហើយ​បន្ទាប់​បាន​បន្ត​ទៅ​បុក​ពេញ​ទំហឹង​ជាមួយ​រថយន្ត​ទួរីស​ដឹក​អ្នក​ដំណើរ​មួយ​គ្រឿង​ទៀត​ដែល​បើក​ស្រប​ទិស​គ្នា​នឹង​រថយន្ត​កាមរី។

លោក​មាន​ប្រសាសន៍​ថា៖ «មក​ទល់​ពេល​នេះ​មនុស្ស ៥ នាក់​បាន​ស្លាប់​នៅ​នឹង​កន្លែង​និង ៨ នាក់​ផ្សេង​ទៀត​ដែល​រង​របួស​ត្រូវ​បញ្ជូន​មក​មន្ទីរពេទ្យ​បង្អែក​ខេត្ត»។

លោក​បន្ត​ថា ករណី​នេះ​ខាង​នគរបាល​ខេត្ត​កំពុង​តែ​ធ្វើ​ការ​ស្រាវជ្រាវ​រក​សាច់​ញាតិ​ជន​រងគ្រោះ ដែល​ពេល​នេះ​សាក​សព​ទាំង​អស់​ស្ថិត​នៅ​កន្លែង​កើត​ហេតុ​នៅ​ឡើយ ហើយ​អាជ្ញាធរ​កំពុង​ស្ទូច​រថយន្ត​ជួប​គ្រោះ​ថ្នាក់​មក​ទុក​ដោះ​ស្រាយ​តាម​ផ្លូវ​ច្បាប់​នៅ​ពេល​ក្រោយ។

បើ​តាម​លោក​ស្នងការ​រង​រូប​នេះ​ឲ្យ​ដឹង​ដែរ​ថា ជន​រង​គ្រោះ​ភាគ​ច្រើន​អាច​ជា​ប្រជា​ពលរដ្ឋ​ដែល​រស់​នៅ​ក្នុង ឃុំ​ដងទង់ ស្រុក​ឈូក នេះ​ព្រោះ​រថយន្ត​នេះ​រត់​ឈ្នួល​ពី ដងទង់ ទៅ កំពង់សោម។

លោក​ថា អ្នក​ស្លាប់​សុទ្ធ​តែ​ជា​បុរស​ឯ​អ្នក​របួស ៨ នាក់​មាន​ស្ត្រី​ម្នាក់​ក្នុង​នោះ​មាន​ម្នាក់​របួស​ធ្ងន់​ធ្ងរ ដែល​មិន​ទាន់​ដឹង​ថា តើ​អាច​សង្គ្រោះ​បាន​ឬ​យ៉ាង​ណា​ទេ។

សមត្ថកិច្ច​នៅ​កន្លែង​កើត​ហេតុ​អះអាង​ថា អ្នក​បើក​បរ​រថយន្ត​ទួរីស​ស្លាប់​ដោយ​កៀប​ជាប់​នឹង​រថយន្ត​ខណៈ​អ្នក​បើក​បរ​រថយន្ត​ធុន​ធំ​បង្ក​ហេតុ​បាន​រត់​គេច​ខ្លួន​បាត់៕

អត្ថបទគួរចាប់អារម្មណ៍