The Phnom Penh Post Search

Search form




Logo of Phnom Penh Post newspaper Phnom Penh Post - អគ្គិភ័យ​ឆ្លង​ចរន្តអគ្គិសនី​ឆេះ​បន្ទប់​ស្នាក់នៅ​របស់​កម្មករ​ ៣០០ ​នាក់

អគ្គិភ័យ​ឆ្លង​ចរន្តអគ្គិសនី​ឆេះ​បន្ទប់​ស្នាក់នៅ​របស់​កម្មករ​ ៣០០ ​នាក់

Content image - Phnom Penh Post

អគ្គិភ័យ​ឆ្លង​ចរន្តអគ្គិសនី​ឆេះ​បន្ទប់​ស្នាក់នៅ​របស់​កម្មករ​ ៣០០ ​នាក់

ភ្នំពេញៈ មនុស្ស​ពីរ​នាក់​ជា​ឪពុក​ និង​កូន​ប្រុស​បាន​រងរបួស​ជា​ទម្ងន់​ក្នុង​ករណី​អគ្គិភ័យ​កន្លែង​ស្នាក់​នៅ​របស់​កម្មករ​ប្រមាណ​ជា​ ៣០០ ​នាក់​ក្នុង​បុរី​ពិភពថ្មី​ក្នុង​សង្កាត់​ភ្នំពេញ​ថ្មី​ខណ្ឌ​សែនសុខ​កាលពី​ព្រឹក​ព្រលឹម​ថ្ងៃ​អង្គារ​ម្សិលមិញ​នេះ​ដោយសារ​ឆ្លង​ចរន្ត​អគ្គិសនី​។

លោក​ កែវ សទ្ធោតន៌ នាយ​ប៉ុស្តិ៍​សង្កាត់​ភ្នំពេញ​ថ្មី​បាន​ឲ្យ​ដឹង​ថា​កន្លែង​ស្នាក់នៅ​ដែល​ធ្វើ​ពី​ស័ង្កសី​ជញ្ជាំង​កុងប្លាកេ​ដែល​មាន​ទំហំ​ ៤០ ​ម៉ែត្រ​គុណ​នឹង​ ៦០ ​ម៉ែត្រ​ត្រូវ​បាន​ឆេះ​ខ្ទេច​ទាំង​ស្រុង​ និង​បាន​ធ្វើឲ្យ​មនុស្ស​ពីរ​នាក់​រងរបួស​រលាក​ពេញ​ខ្លួន​ផង​ដែរ​ប៉ុន្តែ​ត្រូវ​បាន​បញ្ជូន​ទៅ​មន្ទីរពេទ្យ​កាល់ម៉ែត​ជួយ​សង្គ្រោះ​ផង​ដែរ។

លោក​ថា៖ «ក្រៅពី​មាន​អ្នក​របួស​ក្នុង​នោះ​មាន​ម៉ូតូ​ចំនួន​ ៥ ​គ្រឿង​ កង់​ចំនួន​​ ១១ ​គ្រឿង និង​ម៉ូតូ​កង់បី​ ១ ​គ្រឿង​ត្រូវ​បាន​ឆេះ​ផង​ដែរ។ ក្នុង​ការ​ពន្លត់​នេះ​ដែរ​កម្លាំង​សមត្ថកិច្ច​ពន្លត់​អគ្គិភ័យ​បាន​ប្រើប្រាស់​ឡាន​ទឹក​អស់​ចំនួន​ ១១ ​គ្រឿង​ដោយ​បាន​បាញ់​ទឹក​សរុប​ចំនួន​ ១៥ ​ស៊ីទែន​បាញ់​ពន្លត់​អស់​ទាំង​ស្រុង​នៅ​ម៉ោង​ជិត​ ៧ ​ព្រឹក»។

លោក​ គង់ សុវណ្ណា នាយ​ការិយាល័យ​គ្រប់គ្រង​អាវុធ​ជាតិ​ផ្ទុះ និង​អគ្គិភ័យ​នៃ​ក្រសួង​មហាផ្ទៃ​បាន​ប្រាប់​កាសែត​ភ្នំពេញ​ប៉ុស្តិ៍​កាលពី​ថ្ងៃ​អង្គារ​ម្សិលមិញ​ថា​ចាប់ពី​ខែ​មករា​ដល់​ខែ​មិថុនា​ឆ្នាំ​ ២០១៥ ​នេះ​មាន​ករណី​អគ្គិភ័យ​កើត​មាន​ឡើង​ចំនួន​ ៣៤៩ ​លើក​ដែល​ករណី​នេះ​មាន​ការ​ថយ​ចុះ​ចំនួន​ ២៤ ​លើក​បើ​ប្រៀបធៀប​នឹង​រយៈពេល​ដូច​គ្នា​កាលពី​​ឆ្នាំ​មុន។

លោក​បាន​ថ្លែង​ទៀត​ថា៖ «ចំនួន​អ្នក​ស្លាប់​មាន​ ១៤ ​នាក់​ថយ​ចុះ​ ៣ ​នាក់​ចំនួន​អ្នក​របួស​មាន​ចំនួន​ ១៦ ​នាក់​ក្នុង​នោះ​ថយ​ចុះ​ចំនួន​ ៥ ​នាក់ និង​មាន​ការ​ខូចខាត​ផ្ទះ​ចំនួន​ ៣-៥៦ ​ខ្នង​ផ្ទះ និង​តូប​ចំនួន​ ៥៣៤ ​តូប​នៅក្នុង​ផ្សារ​ប្រមាណ​ជា​ ៤ ​ផ្សារ​»៕

អត្ថបទគួរចាប់អារម្មណ៍