The Phnom Penh Post Search

Search form




Logo of Phnom Penh Post newspaper Phnom Penh Post - អតីត​ទាហាន​ខ្មែរ​ក្រហម​នៅ​ភ្នំ​វល្លិ​ប្តឹង​មក​ឧទ្ធរណ៍​រឿង​ជម្លោះ​ដីធ្លី

អតីត​ទាហាន​ខ្មែរ​ក្រហម​នៅ​ភ្នំ​វល្លិ​ប្តឹង​មក​ឧទ្ធរណ៍​រឿង​ជម្លោះ​ដីធ្លី

អតីត​ទាហាន​ខ្មែរ​ក្រហម​នៅ​ភ្នំ​វល្លិ​ប្តឹង​មក​ឧទ្ធរណ៍​រឿង​ជម្លោះ​ដីធ្លី

កំពតៈ អតីត​ទាហាន​ខ្មែរ​ក្រហម​ភ្នំ​វល្លិ ២៦ គ្រួសារ បាន​ជំទាស់​និង​ដាក់​ពាក្យ​ប្តឹង​ទៅ​សាលា​ឧទ្ធរណ៍​តប​ទៅ​នឹង​សាលក្រម​សាលាដំបូង​ខេត្ត​កំពត​ដែល​សម្រេច​ឲ្យ​ពួក​គាត់​ចាញ់​ក្តី​ជម្លោះ​ដី​ធ្លី និង​ដាក់​ពន្ធនាគារ​ម្នាក់២​ឆ្នាំ និង​ឲ្យ​ចេញ​សំណង​រួម​១៨​លាន​រៀល ថែម​ទៀត។

លោក ឃុត ឃាន តំណាង​ម្នាក់​ក្នុង​ចំណោម​៤នាក់ ដែល​ត្រូវ​សាលា​ដំបូង​ខេត្ត​កំពត​ចេញ​ដីកា​ចាប់​ខ្លួន​កាលពី​ម្សិលមិញ​បាន​ប្រាប់​ថា ពួក​គាត់​មាន​ឈ្មោះ មាស អាង  ស៊ ចេង យ៉ាវ រុណ​និង​ផាន់ សារ៉េត ដែល​ជា​តំណាង​ឲ្យ​អតីត​ទាហាន​ខ្មែរ​ក្រហម​ភ្នំ​វល្លិ​ទាំង​២៦​គ្រួសារ​នោះ​កំពុង​រង​ការ​បង្គាប់​ឲ្យ​ចាប់​ខ្លួន​បន្ទាប់​ពី​តុលាការ​ចេញ​សាលក្រម​ឲ្យ​ចាញ់​ក្តី​កាល​ពី​ដើម​ខែ​វិច្ឆិកា​នេះ ក្នុង​រឿង​ទាមទារ​ដី​៥៨​ហិកតា នៅ​ភូមិ​ត្រពាំង​ព្រីង​ខាង​ជើង ស្រុក​ទឹក​ឈូ។

លោក​បន្ត​ឲ្យ​ដឹង​ថា ដី​ទំនាស់​គឺជា​ដី​ដែល​អតីត​ទាហាន​ខ្មែរ​ក្រហម​កាន់កាប់​តាំងពី​ឆ្នាំ​១៩៩៤ បន្ទាប់​ពី​ធ្វើ​សមាហរណកម្ម​តាម​ការ​ស្នើ​សុំ​របស់​អតីត​មេបញ្ជាការ​រង​លោក ឈូក រិន ស្នើ​ទៅ​អាជ្ញាធរ​ស្រុក​កំពត​ជំនាន់​លោក មាស សាផន ដែល​បាន​ចុះ​ហត្ថលេខា​ទទួល​ស្គាល់​ឲ្យ​ពួក​គាត់​ធ្វើ​ស្រែ​ដាំ​ដំណាំ​ចិញ្ចឹម​គ្រួសា​រហូត​មក។ប៉ុន្តែ ក្រោយ​មក​ក៏ត្រូវ​អង្គភាព​កងទ័ព​ដឹកនាំ​ដោយ​លោក​ពៅ ណាត ជា​មេក្រុម​ចំណុះ​ឲ្យ​វរសេនា​តូច​លេខ១ ក្រុង​កែប ដឹក​នាំ​កម្លាំង​ចុះ​មក​រឹបអូស​យក។លោក​ឲ្យ​ដឹង​បន្ត​ថា នៅ​ថ្ងៃទី​២៩ តុលា ២០០៥ ស្រាប់​តែ​មាន​ដីកា​ពី​តុលាការ​និង​ឈ្មោះ ពុធ ធាវី ប្តឹង​ពួក​គាត់​ទាំង​២៦​គ្រួសារ​ថា បាន​រំលោភ​យក​ដី​គេ​ចំនួន​៣០​ហិកតា ហើយ​នៅ​ចុង​ឆ្នាំ​២០០៧ តុលាការ​កោះហៅ​ពួក​គាត់​១៨​គ្រួសារ​ឲ្យ​ចូល​បំភ្លឺ តែ​ដោយ​ពួក​គាត់​មាន​ចុង​សន្លឹក​និង​ឯកសារ​គ្រប់គ្រាន់ ព្រះរាជ​អាជ្ញារង តុប ឈុនហេង ក៏​សម្រេច​តម្កល់​រឿង​មិន​ចាត់​ការ។ លោក​បន្ត​ថា៖ «លោក​រដ្ឋ​មន្ត្រី ក្រសួង​យុត្តិធម៌ អង្គ​វង្ស វឌ្ឍានា បាន​ចារ​លើ​លិខិត​ពួក​គាត់​ឲ្យ​ចៅក្រម​បង្ហាញ​អង្គហេតុ​ឲ្យ​ច្បាស់​លាស់​មុន​នឹង​សម្រេច​ចោទ​ប្រកាន់​ពលរដ្ឋ តែ​តុលាការ​មិន​ចាត់​ការ​ណា​មួយ​ទេ​មក​ដល់​ពេល​នេះ»។

លោក​បន្ត​ថា តែ​ពេល​នេះ​ត្រូវ​តុលាការ​ខេត្ត​កំពត​ចេញ​សាលក្រម​សម្រេច​ឲ្យ​ស្ត្រី​ឈ្មោះ ហៀវ លន ថា​ជា​ម្ចាស់​ដី​ដែល​បាន​ប្តឹង​ពី​ឆ្នាំ​២០០៩ ឈ្នះ​ក្តី​និង​ឲ្យ​ពួក​គាត់​ជាប់​ពន្ធនាគារ​ទៀត​ផង។

លោក អ៊ឹម ផាន់ណា មេធាវី​ការពារ​ក្តី​ឲ្យ​អតីត​ទាហាន​ខ្មែរ​ក្រហម​ទាំង​២៦​គ្រួសារ​បាន​ឲ្យ​ដឹង​ថា កូន​ក្តី​គាត់​ត្រូវ​សាលា​ដំបូង​ខេត្ត​កាត់​ក្តី​ឲ្យ​ចាញ់​អ្នក​ស្រី​ហៀវ លន់ និង​បាន​ដាក់​ទោស​ឲ្យ​ម្នាក់ៗ​ជាប់​ពន្ធនាគារ​២ឆ្នាំ​និង​ពិន័យ​រួម​ជា​ប្រាក់​១៨​លាន​រៀល​ថែម​ទៀត។

លោក មាស សាផន អតីត​អភិបាល​ស្រុក​កំពត បាន​ប្រាប់​ថា ពលរដ្ឋ​ជា​អតីត​ខ្មែរ​ក្រហម​នៅ​ភូមិ​បុះញិញ ឃុំ​កូន​សត្វ ស្រុក​កំពត ទាំង​នោះ​ក្រោយ​ពី​ផ្តាច់​ខ្លួន​អាជ្ញាធរ​បាន​បែងចែក​ដី​ជូន​ពួក​គាត់​ក្នុង​១​គ្រួសារ​៥ហិកតា​ឲ្យ​រស់នៅ​និង​អាស្រ័យ​ផល​និង​មាន​ចុង​សន្លឹក​សម្គាល់​កាន់កាប់​ផង។

ប្រធាន​ក្រុម​យុវជន​ស្ម័គ្រចិត្ត​វាស់វែង​ដី​ធ្លី របស់​នាយក​រដ្ឋ​មន្ត្រី លោក ស តារ៉ា ប្រាប់​ពី​ម្សិលមិញ​ថា លោក​កំពុង​តែ​វាស់វែង​ដី​ដែល​អ្នក​ស្រី ហៀវ លន់ ជា​ម្ចាស់​កម្មសិទ្ធិ​ហើយ​និង​មាន​ការ​ឯកភាព​ពី​លោក​អភិបាល​ខេត្ត​កំពត​ផង។

លោក ខូយ ឃុនហួរ អភិបាល​ខេត្ត​កំពត​ពី​ម្សិលមិញ​ប្រាប់​ថា ដី​នោះ​មិន​ពាក់ព័ន្ធ​នឹង​អតីត​ទាហាន​ខ្មែរ​ក្រហម​ទេ ហើយ​ថា អ្នក​ខ្លះ​បាន​លក់​ដី​នោះ​បន្ត​អស់​ដែរ ប៉ុន្តែ​ពលរដ្ឋ​ដែល​ជា​អ្នក​ភូមិ​ចាស់​ពួក​គាត់​មាន​ដី​ធំៗ​ណាស់ ឯ​អ្នក​តវ៉ា​និង​ធ្លាប់​ប្តឹង​ទៅ​តុលាការ​នោះ គឺជា​មនុស្ស​ដែល​ទិញ​ដី​បន្ត​ពី​គេ និង​មាន​មន្ត្រី​នគរបាល​ពាក់​ស័ក្តិ​៥នៅ​ខេត្ត​កំពត​ជា​អ្នក​លក់​ឲ្យ​អ្នក​ទាំង​នោះ។

លោក​បន្ត​ថា៖ «ពេល​នេះ​ខ្ញុំ​កំពុង​រក​មុខ​មន្ត្រី​នគរបាល​នោះ ដើម្បី​ចាត់​ការ​តាម​ច្បាប់​ព្រោះ​គាត់​យក​ដី​គេ​ទៅ​លក់​បន្ត»៕

អត្ថបទគួរចាប់អារម្មណ៍