The Phnom Penh Post Search

Search form




Logo of Phnom Penh Post newspaper Phnom Penh Post - អធិការ​រង​ក្រុង​កំពង់​ចាម​ត្រូវ​អាជីវករ​ប្តឹង​បី​បទ​ប្រើ​អាវុធ​ភ្ជង់​គំរាម

អធិការ​រង​ក្រុង​កំពង់​ចាម​ត្រូវ​អាជីវករ​ប្តឹង​បី​បទ​ប្រើ​អាវុធ​ភ្ជង់​គំរាម

អធិការ​រង​ក្រុង​កំពង់​ចាម​ត្រូវ​អាជីវករ​ប្តឹង​បី​បទ​ប្រើ​អាវុធ​ភ្ជង់​គំរាម

កំពង់ចាមៈ អធិការ​រង​នគរបាល​ក្រុង​កំពង់​ចាម ត្រូវ​អាជីវករ​ផ្សារ​បឹង​កុក​ម្នាក់​ដាក់​ពាក្យ​ប្តឹង​ពី​បទ​ប្រើ​អាវុធ​គំរាម​ក្នុង​ជម្លោះ​ឯកជន កាល​ពី​ថ្ងៃ​ទី៨ ខែ​វិច្ឆិកា​នោះ ត្រូវ​កង​រាជ​អាវុធ​ហត្ថ​ខេត្ត​បញ្ជូន​បន្ត​ទៅ​តុលាការ​ខេត្ត​ហើយ។

លោក ឆាយ គឹមសុន ស្នងការ​នគរបាល​ខេត្ត​កំពង់​ចាម​បាន​ឲ្យ​ដឹង​ថា លោក​អធិការ​រង​នគរ​បាល​ក្រុង​កំពង់​ចាម សេង លក្ម្សី មិន​ត្រូវ​ឃាត់​ខ្លួន​នោះ​ទេ បន្ទាប់​ពី​រង​ការ​ចោទ​ក្នុង​ជម្លោះ​និង​ត្រូវ​គេ​ចោទ​ថា​បាន​ប្រើ​ប្រាស់​កាំភ្លើង​ភ្ជង់​គំរាម។

លោកបន្តថា ៖«លោក សេង លក្ម្សី កំពុង​តែ​ស្ថិត​ក្នុង​ការ​ស៊ើប​អង្កេត​នៅ​ឡើយ ហើយ​លោក​នៅ​តែ​បំពេញ​តួនាទី​ដដែល ប៉ុន្តែ​សំណុំ​រឿង​ដែល​គេ​ប្តឹង​គាត់​នោះ​ត្រូវ​បញ្ជូន​ទៅ​តុលាការ​ពី​ថ្ងៃ​សុក្រ»។

លោក ឡេង សុខា មន្ត្រី​នៃ​បញ្ជាការ​ដ្ឋាន​កង​រាជ​អាវុធ​ហត្ថ​ខេត្ត​កំពង់ចាម​បាន​ប្រាប់​ឲ្យ​ដឹង​ថា លោក សេង លក្ម្សី អាយុ​២៥​ឆ្នាំ ត្រូវ​លោក កេង កាយ​ឡេង អាយុ​៣៤​ឆ្នាំ​ជា​អាជីករ​ប្តឹង​ចោទ​ពី​បទ​ប្រើ​កាំ​ភ្លើង​គំរាម ។ លោក​ថា​តាម​បណ្តឹង គឺ​អាជីវករ​រូប​នោះ បាន​ឈ្លោះ​ជាមួយ​ម្តាយ​ក្មេក​និង​បង​ថ្លៃ​លោក លក្ម្សី ហើយ​ថា លោក​អធិការ​រង​ដក​កាំភ្លើង​ភ្ជង់​ក្បាល​គូ​ទំនាស់​តែ​មិន​ផ្ទុះ​អាវុធ​ទេ។​លោក​ថា៖​«ខ្ញុំ​មិន​បាន​ឃាត់​ខ្លួន​ឬ​កសាង​សំណុំ​រឿង​ចោទ​ប្រកាន់​គាត់​ទេ គឺ​គ្រាន់​តែ​ទទួល​បណ្តឹង​និង​បញ្ជូន​បន្ត​ទៅ​តុលាការ​ប៉ុណ្ណោះ »។

លោកសេង លក្ម្សី ដែល​រង​ការ​ចោទ​បាន​បំភ្លឺ​ថា មាន​ជម្លោះ​រវាង​គ្រួសារ​ខាង​ប្រពន្ធ​លោក​ជាមួយ​អាជីវករ​នោះ​មែន ហើយ​លោក​បាន​ចូល​ទៅ​ឃាត់​ប៉ុន្តែ​ចៃដន្យ​កាំភ្លើង​នៅ​នឹង​ចង្កេះ​បាន​ជ្រុះ​ហើយ​លោក​រើស​មក​កាន់។​លោក​បន្ត​ថា៖​«គេ​ចោទ​ថា ខ្ញុំ​ដក​កាំភ្លើង​ភ្ជង់​គំរាម​នោះ​មិន​ពិត​ទេ ជា​សមត្ថកិច្ច​ខ្ញុំ​ដឹង​ថា ការ​ប្រើ​កាំភ្លើង​ក្រៅ​ពី​ការ​បំពេញ​តួនាទី គឺ​ខុស​ច្បាប់»។

ព្រះ​រាជ​អាជ្ញាអម​សាលា​ដំបូង​ខេត្ត​និង​ភាគី​ដើម​បណ្តឹង មិន​អាច​ទាក់​ទង​បាន​ទេ​ពី​ម្សិល​មិញ៕

អត្ថបទគួរចាប់អារម្មណ៍