កំពង់ចាមៈ នគរបាលខេត្តកំពង់ចាមកំពុងតាមស្វែងរកបុរសម្នាក់ដែលសង្ស័យថា បានវាយប្រហារទឹកអាស៊ីតទៅលើមនុស្សពីរនាក់ កាលពីយប់ថ្ងៃចន្ទនៅក្នុងស្រុកមេមត់។
លោក ដែន រិទ្ធី មេប៉ុស្តិ៍ឃុំជាំក្រវៀន ស្រុកមេមត់ បានថ្លែងពីម្សិលមិញថា ជនរងគ្រោះភេទប្រុសម្នាក់អាយុ៣២ឆ្នាំ បានទទួលរងការរលាកយ៉ាងធ្ងន់ធ្ងរនៅលើផ្ទៃមុខ ហើយផ្នែកខ្លះទៀតនៅលើរាងកាយ ប៉ុន្តែ គាត់អាចដើរនិងនិយាយបាននៅឡើយ។ ដៃគូរបស់គាត់ដែលមានអាយុ៣២ឆ្នាំដូចគ្នា បានទទួលរងរបួសរលាកស្រាលនៅលើខ្នង។
លោក រិទ្ធី ជឿថា ជនសង្ស័យមានឈ្មោះ ជា ថេង អាយុ២៣ឆ្នាំ គឺជាអតីតសង្សាររបស់ស្រ្តីនោះ គាត់ប្រហែលជាខឹងនឹងទំនាក់ទំនងថ្មីរវាងអតីតសង្សាររបស់ គាត់ជាមួយនឹងបុរសម្នាក់ទៀត។
បើយោងតាម លោក រិទ្ធី ឈ្មោះ ជា ថេង បានយកទឹកអាស៊ីតនោះដាក់នៅក្នុងចានជ័រ ហើយបានលបចូលទៅផ្ទះរបស់អ្នកទាំងពីរហើយជះទឹកអាស៊ីតនោះតាម បង្អួច ទៅលើអ្នកទាំងពីរខណៈកំពុងដេកនៅលើអង្រឹង។
លោកបន្តថា ជនរងគ្រោះត្រូវបានបញ្ជូនទៅគ្លីនិកសុខភាព ហើយបន្ទាប់មកបញ្ជូនបន្តទៅមន្ទីរពេទ្យបង្អែកខេត្ត។
លោកបន្តថា៖«យើងសន្និដ្ឋានជាបឋមថាជាស្នេហាត្រីកោណ ពីព្រោះជនសង្ស័យស្រឡាញ់ជនរងគ្រោះ ប៉ុន្តែជនរងគ្រោះទៅរស់នៅជាមួយបុរសផ្សេង។ នេះជាហេតុធ្វើឲ្យជនសង្ស័យមានកំហឹង»។
លោក ដែន រិទ្ធី បានបញ្ជាក់ឲ្យដឹងថា កម្លាំសមត្ថកិច្ចពីក្រសួងមហាផ្ទៃបានចុះទៅដល់កន្លែងកើតហេតុ នោះរួចហើយ ក្នុងគម្រោងនៃយុទ្ធនាការអប់រំអំពីច្បាប់អាស៊ីតថ្មី៕ PS
