The Phnom Penh Post Search

Search form




Logo of Phnom Penh Post newspaper Phnom Penh Post - អាជ្ញាធរ​ស្វាយរៀង ឃាត់​ខ្លួន​បុរស​ជា​ប្តី​គាំទ្រ​បក្ស​ប្រឆាំង វ៉ៃ​ប្រពន្ធ​គាំទ្រ​បក្ស​ប្រជាជន​របួស

អាជ្ញាធរ​ស្វាយរៀង ឃាត់​ខ្លួន​បុរស​ជា​ប្តី​គាំទ្រ​បក្ស​ប្រឆាំង វ៉ៃ​ប្រពន្ធ​គាំទ្រ​បក្ស​ប្រជាជន​របួស

អាជ្ញាធរ​ស្វាយរៀង ឃាត់​ខ្លួន​បុរស​ជា​ប្តី​គាំទ្រ​បក្ស​ប្រឆាំង វ៉ៃ​ប្រពន្ធ​គាំទ្រ​បក្ស​ប្រជាជន​របួស

ស្វាយរៀងៈ នគរបាល​នៅ​ក្នុង​ខេត្ត​ស្វាយរៀង បាន​ចាប់​ខ្លួន​បុរស​ម្នាក់​ដែល​គេ​រាយការណ៍​ថា ជា​អ្នក​គាំទ្រ​គណបក្ស​សង្គ្រោះ​ជាតិ (CNRP)​ជា​គណបក្ស​ប្រឆាំង ក្រោម​ការ​ចោទ​ប្រកាន់​ពី​បទ​បង្ក​ហិង្សា​លើ​ប្រពន្ធ​គាត់​ដែល​ជា​សមាជិក​គណបក្ស​ប្រជាជន​កម្ពុជា​(CPP)​ដែល​កំពុង​កាន់​អំណាច។

លោក សម សំអុល អធិការ​នគរបាល​ស្រុក​រមាសហែក បាន​ឲ្យ​ដឹង​ថា ក្រុម​មន្ត្រី​នគរបាល​បាន​ចាប់​ខ្លួន​បុរស​ឈ្មោះ ពៅ ម៉េ អាយុ​៤០ឆ្នាំ បន្ទាប់​ពី​គាត់​វាយ​ប្រពន្ធ​នឹង​ដំបង​ឲ្យ​រង​របួស​ធ្ងន់​នៅ​ក្នុង​ជម្លោះ ក្នុង​គ្រួសារ​កាល​ពី​យប់​ថ្ងៃ​អាទិត្យ។

លោក សម សំអុល បាន​ថ្លែង​ថា ឈ្មោះ ពៅ ម៉េ ដែល​ធ្លាប់​ជា​សមាជិក​គណបក្ស​ប្រជាជន​នោះ បាន​ប្តូរ​ចិត្ត​ងាក​មក​គាំទ្រ​គណបក្ស​សង្គ្រោះ​ជាតិ​វិញ​បន្ទាប់​ពី​មាន​ជម្លោះ​មួយ​ចំនួន ហើយ​ត្រូវ​អាជ្ញាធរ​ដែន​ដី​កោះ​ហៅ​គាត់​ទៅ​ធ្វើ​ការ​អប់រំ នៅ​ពេល​គាត់​មាន​ជម្លោះ​ក្នុង​គ្រួសារ​និង​ដុត​ផ្ទះ​កន្លង​មក​។​លោក សំអុល បញ្ជាក់​ដែរ​ថា ៖ «គាត់​ស្រវឹង ហើយ​បាន​យក​ដំបង​វាយ​ទៅ​លើ​ក្បាល​ប្រពន្ធ​គាត់​នៅ​ក្នុង​ជម្លោះ​ពាក្យ​សម្ដី​គ្នា​។ បន្ទាប់​មក​ត្រូវ​សមត្ថកិច្ច​ចាប់​ខ្លួន​ពី​បទ​បង្ក​អំពើ​ហិង្សា​ដោយ​ចេតនា​ទៅ​លើ​ប្រពន្ធ​គាត់»។

តាម​លោក សំអុល អះអាង​តាម​របាយ​ការណ៍​ពី​អាជ្ញាធរ​ភូមិ​បូស ឃុំ​ត្រស់​ឲ្យ​ដឹង​ថា ជន​រងគ្រោះ​ឈ្មោះ វ៉ា សំអុន អាយុ​៣៨​ឆ្នាំ​ជា​សមាជិក​គណបក្ស​ប្រជាជន​កម្ពុជា តែង​មាន​ជម្លោះ​ក្នុង​គ្រួសារ​ជាមួយ​ប្ដី​ពិសេស​នៅ​ពេល​អ្នក​ស្រី​ទៅ​ចូល​រួម​ក្នុង​វេទិកា​ឬ​កិច្ច​ប្រជុំ​ជាមួយ ក្រុម​មន្ត្រី​គណបក្ស​ប្រជាជន។ លោក​បន្ថែម​ថា ឈ្មោះ ពៅ ម៉េ ដែល​ពិការ​ជើង​ម្ខាង​តែង​ស្រវឹង​ស្រា​និង​បង្ក​ជម្លោះ​ជាមួយ​ប្រពន្ធ​គាត់​ជា​ញឹក​ញាប់។

លោក​អធិការ​ថ្លែង​ថា៖«​បើ​តាម​មេ​ភូមិ ឈ្មោះ ពៅ ម៉េ ជា​អ្នក​គាំទ្រ​គណបក្ស​សង្គ្រោះ​ជាតិ ហើយ​ប្រពន្ធ​គាត់​ជា​សមាជិក​គណបក្ស​ប្រជាជន​»។ លោក​បន្ត​ថា ប្រពន្ធ​គាត់​អ្នក​ស្រី វ៉ា សំអុន ត្រូវ​បាន​នាំ​ទៅ​សង្គ្រោះ​នៅ​មន្ទីរពេទ្យ​បង្អែក​ស្រុក។

លោក រៀល ខេមរិន្រ្ទ ប្រធាន​ក្រុម​ការងារ​គណបក្ស​សង្គ្រោះ​ជាតិ ប្រចាំ​ខេត្ត​ស្វាយរៀង​បាន​ថ្លែង​ថា លោក​បាន​ស៊ើប​អង្កេត​ករណី​នេះ​បន្ទាប់​ពី​មាន​ការ​រាយការណ៍​ពី​ហេតុការណ៍​នេះ​តែ​លោក​បដិសេធ​ថា ឈ្មោះ ពៅ ម៉េ មិន​មែន​ជា​សមាជិក​គណបក្ស​សង្គ្រោះ​ជាតិ​ទេ។

លោក រៀល ខេមរិន្រ្ទ បន្ត​ថា​៖«គាត់​មិន​មែន​ជា​សមាជិក​យើង​ទេ តែ​សាច់​ញាតិ និង​មិត្តភក្តិ​គាត់​ជា​សមាជិក​យើង​។ យើង​បាន​សុំ​ឲ្យ​គាត់​(ពៅ ម៉េ) ចូល​រួម​នឹង​យើង​ដែរ តែ​គាត់​មិន​ទាន់​សម្រេច​ចិត្ត​នៅ​ឡើយ»។

អ្នក​ស្រី នេត គឹមឆន មន្ត្រី​អង្កេត​ការណ៍​របស់​ខុមហ្វ្រែល​ប្រចាំ​ខេត្ត​ស្វាយរៀង​បាន​ថ្លែង​ថា អ្នក​ស្រី​មិន​ទាន់​ដឹង​ពី​ឧប្បត្តិហេតុ​នេះ​នៅ​ឡើយ​ទេ ព្រោះ​អ្នក​ស្រី​ទើប​ត្រឡប់​ពី​ចូល​រួម​វគ្គ​បណ្ដុះ​បណ្ដាល​ក្នុង​ខេត្ត កំពង់ចាម ប៉ុន្តែ ថា​អ្នក​ស្រី​នឹង​ស៊ើប​អង្កេត​ពី​ករណី​នេះ​ថា តើ​វា​ជា​អំពើ​ហិង្សា​ក្នុង​គ្រួសារ ឬ​ក៏​មាន​ការ​ពាក់​ព័ន្ធ​នឹង​នយោបាយ៕ PN

អត្ថបទគួរចាប់អារម្មណ៍