The Phnom Penh Post Search

Search form

Logo of Phnom Penh Post newspaper Phnom Penh Post - អាដហុក ពោធិ៍សាត់ ស្នើ​ឲ្យ​ខេត្ត​ជួយ​ពលករ​ត្រូវ​គេ​បោក




អាដហុក ពោធិ៍សាត់ ស្នើ​ឲ្យ​ខេត្ត​ជួយ​ពលករ​ត្រូវ​គេ​បោក

អាដហុក ពោធិ៍សាត់ ស្នើ​ឲ្យ​ខេត្ត​ជួយ​ពលករ​ត្រូវ​គេ​បោក

130910_07b
ពលករខ្មែរដែលរងការជួញដូរទៅក្រៅប្រទេសត្រូវបានសង្គ្រោះ បានវិលមកស្រុកវិញ ម៉ៃ វីរៈ

ពោធិ៍សាត់ៈ សមាគម​ការពារ​សិទ្ធិ​មនុស្ស អាដហុក ខេត្តពោធិ៍សាត់ បាន​ដាក់​របាយ​ការណ៍​ស្តី​ពី​ករណី​ជួញ​ដូរ​មនុស្ស​ជូន​លោក​អភិបាល​ខេត្ត នេះ​ឲ្យ​អន្តរាគមន៍​ជួយ​ដល់​ពលករ ពល​ការិនី​ដែល​ត្រូវ​ក្រុមហ៊ុន​នាំ​ពលករ​មួយ​ចំនួន បោក​ប្រាស់​ប្រាក់​កាស​និង​មាន​ពលករ​មួយ​ចំនួន​បាន​បាត់​ខ្លួន​គ្មាន​បាន​ដំណឹង​សោះ​មក​ដល់​ពេល​នេះ​ក៏​មាន។

យោង​តាម​របាយ​ការណ៍​ដែល ភ្នំពេញ ប៉ុស្តិ៍ ទទួល​បាន​កាល​ពី​ម្សិលមិញ បាន​កត់​សម្គាល់​ថា ក្នុង​រយៈ​ពេល​បី​ខែ​ចាប់​ពី​ដើម​ខែ មិថុនា ដល់​ខែ សីហា ឆ្នាំ ២០១៣ នេះ​សមាគម អាដហុក ទទួល​បាន​ពាក្យ​បណ្តឹង​ចំនួន ៨ ច្បាប់​ដែល​មាន​ជន​រងគ្រោះ​ចំនួន ២២ នាក់ ក្នុង​នោះ​មាន​ស្រី្ត​ចំនួន ៦ នាក់ ដែល​បាន​ប្តឹង​ឲ្យ​ជួយ​អន្តរាគមន៍​ជាប់​ពាក់​ព័ន្ធ​ជាមួយ​ក្រុមហ៊ុន នាំ​ពលករ​ចំនួន ៤។

របាយ​ការណ៍​ដដែល​ថា ពលករ ពល​ការិនី​ទាំង​នេះ​បាន​ចាញ់​បោក​ក្រុមហ៊ុន អ៊ឹង រិទ្ធី គ្រុប ដែល​បាន​បញ្ជូន​ពល​ការិនី​ទៅ​ធ្វើ​ការ​តាម​ផ្ទះ​នៅ​ប្រទេស ម៉ាឡេស៊ី កាល​ពី​ឆ្នាំ ២០០៩ ដែល​ពួកគេ ២ នាក់​បាន​បាត់​ដំណឹង​តាំង​ពី​ខែ មេសា ឆ្នាំ ២០១៣ រហូត​មក​ដល់​ពេល​នេះ។ ក្រុមហ៊ុន អេស.ខេ.អិម.អិម អ៊ីនវេសមេន គ្រុប បាន​បញ្ជូន​ពលកា​រិនី​ចំនួន ៣ នាក់ ទៅ​ធ្វើការ​នៅ​ប្រទេស​ថៃ​កាល​ពី​ខែ មិថុនា ឆ្នាំ ២០១២ លុះ​មក​ដល់​ខែ កក្កដា ឆ្នាំ ២០១៣ ពួក​គេ​ត្រូវ​តម្រួត​ថៃ​ចាប់​ឃុំ​ខ្លួន​រហូត​ដល់​ខែ កញ្ញា​នេះ ទើប​ដោះ​លែង​មក​ស្រុក​វិញ។

តាម​របាយ​ការណ៍​នេះ​នៅ​មាន​ករណី​ផ្សេង​ទៀត ដូចជា នៅ​ក្រុមហ៊ុន ចម្ប៉ា មែន ផៅវ័រ គ្រុប និង​ក្រុមហ៊ុន ប៊ូរ៉ូ ខេមបូឌា ដែល​ត្រូវ​ពលករ ពលការិនី​ចោទ​ថា ក្រុមហ៊ុន​ទាំង​នេះ​បាន​បោក​ប្រាស់​យក​ប្រាក់​ជាច្រើន​រយ​ដុល្លារ​ជាមួយ​នឹង​ការ​ធានា​នាំ​ទៅ​ធ្វើ​ការ​នៅ​ប្រទេស ថៃ ដែល​រហូត​មក​ដល់​ពេល​នេះ ពួក​គេ​មិន​ទាន់​បាន​ចាក​ចេញ​ទៅ​នៅ​ឡើយ។

លោក ភួង សុធា មន្ត្រី​សម្រប​សម្រួល​សមាគម​សិទ្ធិ​មនុស្ស អាដហុក ប្រចាំ​ខេត្ត ពោធិ៍សាត់ បាន​បង្ហាញ​ពី​ការ​ព្រួយ​បារម្ភ​លើ​សុវត្ថិភាព​របស់​ពលករ ពលការិនី ដែល​ក្លាយ​ជា​ជន​រងគ្រោះ ហើយ​លោក​បាន​ស្នើ​ឲ្យ​លោក​អភិបាល​ខេត្ត ពោធិ៍សាត់ អន្តរាគមន៍​រក​ដំណោះស្រាយ​លើ​ករណី​ទាំង​អស់​នេះ។

លោក ភួង សុធា ថ្លែង​ថា៖ «អាដហុក មាន​កង្វល់​ជា​ខ្លាំង​ចំពោះ​ទង្វើ​របស់​ភាគី​ក្រុមហ៊ុន ដែល​ធ្វើ​ឲ្យ​ពលករ ពលការិនី​ក្លាយ​ជា​ជន​រងគ្រោះ​ម្នាក់ ហើយ​ម្នាក់​ទៀត ដោយ​មិន​ទាន់​មាន​ដំណោះស្រាយ​សម​ស្រប​ណា​មួយ​សម្រាប់​ពួក​គេ​សោះ»។

លោក​បន្ត​ទៀត​ថា អាដហុក រំពឹង​ថា លោក​អភិបាល​ខេត្ត​នឹង​រក​ដំណោះស្រាយ​មួយ​ដែល​មាន​ប្រយោជន៍​ឲ្យ​ដល់​ជន​រងគ្រោះ និង​ចាត់​វិធានការ​នានា ទៅ​លើ​ក្រុមហ៊ុន​ទាំង​នោះ ដែល​កេង​ចំណេញ​ហួស​ហេតុ​ទៅ​លើ​ពលករ ពលការិនី។

លោក ខូយ សុខា អភិបាល​ខេត្ត ពោធិ៍សាត់ មិន​អាច​ទាក់​ទង​សុំ​ការ​អធិប្បាយ​បញ្ជាក់​ពី​លិខិត​សុំ​អន្តរាគមន៍ របស់ អាដហុក បាន​ទេ កាល​ពី​ម្សិលមិញ៕

អត្ថបទគួរចាប់អារម្មណ៍