The Phnom Penh Post Search

Search form




Logo of Phnom Penh Post newspaper Phnom Penh Post - អ្នកសារព័ត៌មាន​ប្តឹង​មន្ត្រី​យោធា​ពី​បទ​បង្ខាំង​មនុស្ស

អ្នកសារព័ត៌មាន​ប្តឹង​មន្ត្រី​យោធា​ពី​បទ​បង្ខាំង​មនុស្ស

អ្នកសារព័ត៌មាន​រងគ្រោះ​ឡើង​មក​ដាក់​ពាក្យបណ្តឹង​នៅ​សមាគម​អាដហុក​​។
អ្នកសារព័ត៌មាន​រងគ្រោះ​ឡើង​មក​ដាក់​ពាក្យបណ្តឹង​នៅ​សមាគម​អាដហុក​​។ រូបថត អាដហុក

អ្នកសារព័ត៌មាន​ប្តឹង​មន្ត្រី​យោធា​ពី​បទ​បង្ខាំង​មនុស្ស

បន្ទាយមានជ័យៈ អ្នក​យក​ព័ត៌មាន​​ទូរទស្សន៍​ប៉ុស្តិ៍​លេខ ៥ ម្នាក់​ប្រចាំ​ខេត្ត​បន្ទាយមានជ័យ បាន​ដាក់​ពាក្យបណ្តឹង​ទៅ​សាលាដំបូង​ខេត្ត កាលពី​ល្ងាច​ថ្ងៃ​ពុធ ប្តឹង​មេបញ្ជការ​យោធា​ស្រុក​ម៉ាឡៃ ពី​បទ​បង្ខាំង​មនុស្ស​ខុសច្បាប់ និង​បំផ្លាញ​ទ្រព្យសម្បត្តិ​ឯកជន ករណី​បំផ្លាញ​ភ័ស្តុតាង​រូបភាព និង​វីដេអូ ដែល​អ្នកសារព័ត៌មាន​រូប​នោះ ថត​បាន​ពី​សកម្មភាព​របស់​មន្ត្រី​យោធា ជួញឈើ និង​ម៉ូតូ​ខុសច្បាប់ នៅ​ច្រក​របៀង​បន្ទាយ​ទី ១ ឃុំ​ទួលពង្រ ស្រុក​ម៉ាឡៃ។

តាម​ការចុះផ្សាយ​របស់​គេហទំព័រ​អគ្គស្នងការ​នគរបាល​ជាតិ កាលពី​ថ្ងៃ ទី ២៨ ខែ​មេសា បាន​រៀបរាប់​ថា នៅ​ម៉ោង​ជាង ១០ ​ព្រឹក ថ្ងៃ​ទី ២៧ ខែ​មេសា អ្នកសារព័ត៌មាន​ក្នុង​ស្រុក ២ នាក់ ត្រូវ​បាន​​ទាហាន​សឹករង​ស្រុក​ម៉ាឡៃ​ឈរជើង​នៅ​ច្រក របៀង​បន្ទាយ​ទី ១ ស្ថិត​នៅ​ភូមិ​បន្ទាយ​ទី ១ ឃុំ​ទួលពង្រ ស្រុក​ម៉ាឡៃ ខេត្ត​បន្ទាយមានជ័យ ឃាត់​ខ្លួន និង​រថយន្ត​មួយ​គ្រឿង ខណៈ​ដែល​អ្នកសារព័ត៌មាន​ទាំង​ពីរ​នាក់ បាន​ចូល​ទៅ​យក​ព័ត៌មាន​ក្នុង​ចំណុច​នោះ​គ្រប់គ្រង​ដោយ​លោក អ៊ុក ដារ៉ាន់ ថា បង្កើត​ឲ្យ​មាន​បទល្មើស​ឆ្លងដែន​ខុសច្បាប់​យ៉ាង​អនាធិបតេយ្យ​របស់​ពលរដ្ឋ​កម្ពុជា ទៅកាន់​ប្រទេស​ថៃ។

គេហទំព័រ​ដដែល​នេះ បាន​បន្ត​ថា ពេល​អ្នកសារព័ត៌មាន​ទាំង​ ២ នាក់​បើក​រថយន្ត​ត្រឡប់​មក​វិញ ស្រាប់តែ​ទ្វារច្រក​ចូល​ ត្រូវ​បាន​បិទ ហើយ​មន្ត្រី​យោធា​ដែល​ដឹកនាំ​ដោយ​លោក វី វណ្ណៈ មេ​ប៉ុស្តិ៍​បន្ទាយ ទី ១ ​បាន​ចេញ​មក​រារាំង​ដំណើរ និង​ទាក់ទង​ទៅ​លោក អ៊ុក ដារ៉ាន់ មេបញ្ជាការ​យោធា​ស្រុក បាន​មក​ដល់​ដែរ និង​បាន​បញ្ជា​ឲ្យ​កូនចៅ​របស់​ខ្លួន​​យក​ទូរស័ព្ទ​អ្នកសារព័ត៌មាន​ទាំងនោះ លុប​ចោល​មុន​នឹង​ដោះលែង និង​បាន​ព្រមាន​ខ្លាំង​លើ​អ្នកសារព័ត៌មាន​ទាំង​ពីរ​នាក់​នោះ ដែល​មាន​ឈ្មោះ កែវ វុទ្ធី បម្រើការ​ស្ថានីយ​ទូរទស្សន៍​ប៉ុស្តិ៍​លេខ​ ៥ និង​លោក ប៊ុត សារុន បម្រើការ​សារព័ត៌មាន​កោះ​សន្តិភាព​ប្រចាំ​ខេត្ត​បន្ទាយមានជ័យ​។

លោក កែវ វុទ្ធី អ្នកយកព័ត៌មាន​របស់​ទូរទស្សន៍​ប៉ុស្តិ៍​លេខ ៥ និង​ជា​ដើមបណ្តឹង បាន​ឲ្យ​ដឹង​ពី​ម្សិលមិញ​ថា ដំបូង​ឡើយ គោលដៅ​នៃ​ការចុះ​ទៅ​យក​ព័ត៌មាន​នោះ គឺ​ទាក់ទង​នឹង​រឿង​ពលករ​ខ្មែរ ៣ នាក់ លួច​ឆ្លងដែន​ទៅ​ទឹកដី​ថៃ តែ​ត្រូវ​បាន​ទាហាន​ថៃ​បាញ់​គំរាម និង​បញ្ជូន​ត្រលប់​មក​វិញ​តែ​ប៉ុណ្ណោះ ប៉ុន្តែ​នៅពេល​ទៅ​ដល់​ទីតាំង​នោះ ស្រាប់តែ​លោក បាន​ប្រទះ​ឃើញ​នូវ​សកម្មភាព​របស់​មន្ត្រី​យោធា​ច្រក​បន្ទាយ​ទី ១ នេះ បើក​ឲ្យ​មាន​បទល្មើស​ទិញ​លក់​ម៉ូតូ​គេចពន្ធ​ពី​ថៃ និង​បទល្មើស​ជួញដូរ​ឈើ ទើប​លោក ថត​យក​រូបភាព និង​វីដេអូ​ទុកជា​ឯកសារ។

លោក​ថា៖ «ខ្ញុំ​បាន​ឃើញ​នូវ​សកម្មភាព​​របស់​ចោរ​ថៃ យក​ម៉ូតូ​មក​លក់​ឲ្យ​ខាង​ទាហាន​ខ្មែរ​យើង ហើយ​បាន​ឃើញ​នូវ​ការយក​ឈើ​ប្រភេទ​លេខ​ពីរ​ដែល​មាន​ឈើបេង និង​ធ្នង់ ទៅ​ប្រទេស​ថៃ​ផង​ដែរ»​។

លោក វុទ្ធី បាន​ហៅ​គេ​គំរាម និង​ការលុបបំបាត់​ភស្តុតាង​ទាំងនោះ ជា​ការគុំកួន​របស់​លោក អ៊ុក ដារ៉ាន់ មកលើ​រូប​លោក ដោយ​ហេតុ​ថា រូបលោក​ ធ្លាប់​បាន​ចុះ​ផ្សាយ​នូវ​ទង្វើ​បំពាន​ច្បាប់​របស់​មន្ត្រី​ទាហាន នេះ​ម្តង​ហើយ​កាលពី​ខែ​មុន។

លោក​ថា៖ «ពេល​លោក អ៊ុក ដារ៉ាន់ មក​ដល់ គាត់​និយាយ​ដាក់​ខ្ញុំ​ថា លោកឯង​ហ្នឹង​ឬ​នៅ​ប៉ុស្តិ៍​លេខ ៥ ដែល ថា​ខ្ញុំ​រកស៊ី​ឈើគ្រញូង ការផ្សាយ​នោះ មាន​ភ័ស្តុតាង​ឯកសារ​​អី​បញ្ជាក់?»។

ទាក់ទិន​នឹង​ការ​ចោទប្រកាន់​នេះ​ លោក អ៊ុក ដារ៉ាន់ បាន​បដិសេធ​ឆ្លើយតប​ពី​ម្សិលមិញ​នេះ​ ទោះ​តេ​ចូល​ច្រើន​ដង ក៏​គាត់​មិន​លើក។

យ៉ាងណា​ក៏ដោយ​ អគ្គស្នងការ​​នគរបាល​ជាតិ បាន​ដកស្រង់​សម្តី លោក អ៊ុក ដារ៉ាន់ ដែល​បាន​អះអាង​ផ្ទុយ​ពី​ការលើក​ឡើង​របស់​លោក វុទ្ធី ដោយ​ថា លោក មិន​បាន​ឲ្យ​កូនចៅ​របស់​លោក​ឃាត់​អ្នកសារព័ត៌មាន​នោះ​ទេ ហើយ​ក៏​​មិន​បាន​ចាប់​យក​ទូរស័ព្ទ​លុប​រូបភាព​ដែរ គ្រាន់តែ​សាកសួរ​ពួកគេ​ទៅ​ណា​មក​ណា ព្រោះ​ខ្លាច​ពួកគេ​ចូល​ទៅ​ទឹកដី​ថៃ មាន​​បញ្ហា។

លោក​បាន​បញ្ជាក់​ថា វត្តមាន​របស់ លោក​នៅ​ទី​នេះ គ្រាន់តែ​ជា​អ្នកសម្របសម្រួល​ប៉ុណ្ណោះ។

អភិបាល​ខេត្ត​​បន្ទាយមានជ័យ​ លោក គោ ស៊ុំសារឿត បាន​ឲ្យ​ដឹង​ថា លោក​ មិន​ទទួល​សេចក្តី​រាយការណ៍​ណា​មួយ​ពី​ថ្នាក់​ក្រោម​ចំពោះ​រឿង​នេះ​ទេ បើ​ទោះបី​ជា​មាន​ការ​ចុះផ្សាយ​ក្នុង​សារព័ត៌មាន​ព្រោងព្រាត​ក្តី។​

លោក​ថា៖ «ករណី​នេះ ទាល់តែ​មាន​ការអង្កេត ព្រោះ​ការអះអាង​របស់​ភាគី​ទាំង​ពីរ​ គឺ​ខុសៗ​គ្នា​ ថ្នាក់​ខេត្ត មិន​មាន​សមត្ថកិច្ច​នោះ​ទេ ​ព្រោះតែ​មិន​បាន​ទទួល​បណ្តឹង បើ​ជនរងគ្រោះ​បាន​ដាក់​ទៅ​តុលាការ​ហើយ​នោះ ខាង​តុលាការ​នឹង​ចាត់ការ​លើ​រឿង​នេះ​»។

កាលពី​ថ្ងៃ​ទី ២៩ ខែ​មេសា សមាគម​ការពារ​សិទ្ធិមនុស្ស​អាដហុក ​បាន​ប្រកាស​ថ្កោលទោស​ចំពោះ​ការគំរាមកំហែង​ពី​សំណាក់​ទាហាន​តាម​ព្រំដែន និង​​ស្នើឲ្យ​ស្ថាប័ន​ពាក់ព័ន្ធ ចាត់វិធាន ការផ្លូវច្បាប់ ដើម្បី​រក​យុត្តិធម៌ និង​ការពារ​សិទ្ធិ​សេរីភាព ជូន​អ្នក​សារព័ត៌មាន​ក្នុង​ពេល​បំពេញភារកិច្ច​ការងារ​មាន​ប្រសិទ្ធភាព និង​សុវត្ថិភាព តាម​វិជ្ជាជីវៈ ដោយ​គ្មាន​ការគំរាមកំហែង​ ខណៈ​ដែល​ទិវា​សេរីភាព​សារព័ត៌មាន​អន្តរជាតិ ថ្ងៃ​ទី ៣ ខែ​ឧសភា កំពុង​ខិត​ជិត​ចូល​មក​ដល់​។

បើ​តាម​លោក កែវ វុទ្ធី បណ្តឹង​របស់​លោក ត្រូវ​បាន​ប្រថាប់ត្រា​ដោយ​មន្ត្រី​សាលាដំបូង​ខេត្ត ទទួល​យក​ហើយ ដោយ​មាន​មេធាវី​របស់​អង្គការ​អាដហុក ជួយ​ក្នុង​ការការពារ​ក្តី​នេះ៕

អត្ថបទគួរចាប់អារម្មណ៍

  • កោះកុងៈ កូនអណ្តើក​ហ្លួង​ចំនួន ៣០ ​ក្បាល​បាន​ញាស់​ចេញពី​សម្បុក​នៅលើ​ឆ្នេរ​ខ្សាច់​សិប្បនិម្មិត​ក្នុង​មជ្ឈមណ្ឌល​អភិរក្ស​សត្វ​ល្មូន​ខេត្តកោះកុង កាលពី​សប្តាហ៍​កន្លងទៅ ហើយ​នេះ​គឺជា​លើក​ទី​ ២ ​ហើយ ដែល​អណ្តើក​ហ្លួង​ចិញ្ចឹម​ក្នុង​មជ្ឈមណ្ឌល​នេះ​បាន​ពង​កូន​។ នេះ​បើតាម​អង្គការ​សមាគម​អភិរក្ស​សត្វព្រៃ​នៅ​កម្ពុជា (WCS)​។

  • ភ្នំពេញៈ ការបញ្ចូល​មីក្រូ​សារជាតិ​ក្នុង​អង្ករ គឺជា​ជំហាន​ចម្បង​មួយ​ក្នុងការ​ដោះស្រាយ​បញ្ហា​អាហារូបត្ថម្ភ​ក្នុង​ប្រទេស​កម្ពុជា ដែល​ប្រជាជន​ភាគច្រើន​ទទួលទាន​បាយ ក្នុង​បរិមាណ​ច្រើន​ជា​រៀងរាល់ថ្ងៃ​។ នេះ​បើតាម​មន្ត្រី​ក្រុមប្រឹក្សា​ស្តារ​អភិវឌ្ឍន៍​វិស័យ​កសិកម្ម និង​ជនបទ​។

  • ភ្នំពេញ: ក្នុង​ចំណោម​ភោជនីយដ្ឋាន​ពោរពេញ​ដោយ​សិល្បៈ​ចម្អិន​ម្ហូបអាហារ ការ​គិតគូរ​ពី​និរន្តរភាព​បរិស្ថាន​ភព​ផែន​ដី និង​បង្កប់​រឿង​រ៉ាវ​ប្រពៃណី​វប្បធម៌​ដ៏​អស្ចារ្យ​នៅ​អេស្ប៉ាញ ប៉េរូ​សហរដ្ឋអាមេរិក​ ថៃ ដាណឺម៉ាក​ នូវែលសេឡង់ ចិន ជប៉ុន អ៊ីតាលី និង​ម៉ិកស៊ិក អាហារ​នៅ​​ផ្ទះ​ប្រពៃណី​បុរាណ​មួយ​​​តាម​ដង​ទន្លេ​មេគង្គ

  • ភ្នំពេញៈ ទាំង​អ្នកនយោបាយ អ្នកវិភាគ និង​ស្ថាប័ន​គណៈកម្មាធិការ​ជាតិ​រៀបចំ​ការបោះឆ្នោត​បានចាត់ទុក​ដំណើរការ​ឃោសនា​រក​សំឡេងឆ្នោត ក្នុង​រយៈពេល ៣ ​ថ្ងៃ​របស់​គណបក្ស​នយោបាយ ដែល​បាន​ចុះបញ្ជី​បេក្ខជន​ចូលរួម​បោះឆ្នោត​ជ្រើសរើស​ក្រុមប្រឹក្សាឃុំ សង្កាត់​អាណត្តិ​ទី​ ៥ ដែល​នឹង​ប្រព្រឹត្តទៅ​នៅ​ថ្ងៃទី​ ៥ ខែមិថុនា ថា មាន​ភាពចាស់ទុំ​ផ្នែក​នយោបាយ និង​មិនមាន​អំពើហិង្សា​ណាមួយ​កើតឡើង​នោះ

  • ភ្នំពេញៈ សាលាឧទ្ធរណ៍​ភ្នំពេញ​នៅ​ថ្ងៃទី​ ២៣ ​ឧសភា បានប្រកាស​សាលដីកា​កំបាំង​មុខមន្ត្រី​សមាគម​ការពារ​សិទ្ធិមនុស្ស​អាដហុក​ ៤ ​រូប និង​អតីត​មន្ត្រី​ ១ ​រូប​ទៀត​សម្រេច​តម្កល់​សាលក្រម​របស់​សាលាដំបូង​រាជធានី​ភ្នំពេញ​ដដែល បន្ទាប់ពី​បាន​កាត់ក្តី​ឱ្យ​ពួកគេ​ជាប់ពន្ធនាគារ​ក្នុង​ម្នាក់​ ៥ ​ឆ្នាំ តែ​ឱ្យ​អនុវត្ត​ទោស ​១៤ ​ខែ​ពាក់ព័ន្ធ​បទចោទ​សូកប៉ាន់​សាក្សី និង​សមគំនិត​សូកប៉ាន់​សាក្សី​ដល់​ នាង ខុម ចាន់តារាទី ហៅ​ ស្រីមុំ​។

  • បន្ទាយមានជ័យៈ ក្នុង​មួយ​ថ្ងៃៗ​មាន​ប្រជាពលរដ្ឋ​នៅតាម​ព្រំដែន ជាពិសេស​ពលករ​ខ្មែរ​ពី ​៤០០ ទៅ​ ៥០០​ នាក់​បាន​ទៅ​ស្នើសុំ​ធ្វើ​បណ្ណ​ឆ្លងដែន ដើម្បី​បាន​ចូលទៅ​ធ្វើការ ឬ​លក់ដូរ​ស្របច្បាប់ នៅក្នុង​ប្រទេស​ថៃ បន្ទាប់ពី​ភាគី​ទាំង​ ២​ បាន​ឯកភាព​គ្នា​បើក​ច្រកព្រំដែន​ឡើងវិញ កាលពី​ថ្ងៃទី​ ១ ខែឧសភា ក្នុង​កម្រិត​ថ្នាក់​តំបន់​។