កណ្តាលៈ អ្នកសារព័ត៌មានបរទេស២រូបត្រូវសមត្ថកិច្ចឃាត់ខ្លួនមួយរយៈពេលខ្លីនៅរោងចក្រកាត់ដេរមួយក្នុងខេត្តកណ្តាលកាលពីថ្ងៃអង្គារម្សិលមិញហើយត្រូវបានបញ្ជាឲ្យលុបនូវរូបថតដែលខ្លួនបានថត។ នេះបើតាមសមត្ថកិច្ចនគរបាលបានអះអាងឲ្យដឹងម្សិលមិញ។
នាយ ប៉ុស្តិ៍នគរបាលឃុំសិតត្បូរលោក ម៉ី សារិន បានថ្លែងថា អ្នកកាសែតបរទេសទាំងពីរនាក់ដែលធ្វើការឲ្យកាសែតកាណាដាឈ្មោះ The Globe and Mail ត្រូវបានឃាត់ខ្លួនប្រហែលកន្លះម៉ោងនៅរោងចក្រកាត់ដេរ Dignity Knitter Limited បន្ទាប់ពីពួកគេចូលទៅក្នុងរោងចក្រនោះដោយមិនមានការអនុញ្ញាតជាមុន។
លោក ម៉ី សារិន បានថ្លែងថា៖ «ពួកគេបានចូលតាមច្រកទ្វារតូចរបស់រោងចក្រនៅពេលដែលកម្មករកំពុងចេញពីរោងចក្រតាមទ្វារធំហើយសន្តិសុខរោងចក្រមិនបានប្រទះឃើញពួកគេនៅពេលអ្នកទាំងនោះដើរចូលទៅក្នុងរោងចក្រនេះទេ»។
លោកថា ៖ «នៅពេលសន្តិសុខរោងចក្រឃើញពួកគេកងសន្តិសុខបានហៅពួកគេឲ្យទៅអង្គុយនៅបន្ទប់របស់សន្តិសុខហើយធ្វើការព្រមាននិងបានឲ្យពួកគេសន្យាមិនចូលមកក្នុងរោងចក្រឬថតរូបនៅក្នុងរោងចក្រដោយមិនមានការអនុញ្ញាតបែបនេះទៀតទេ»។
យោងតាម លោក ម៉ី សារិន បានឲ្យដឹងទៀតថាអ្នកគ្រប់គ្រងរោងចក្របានសូមឲ្យអ្នកទាំងពីរលុបរូបថតទាំងអស់ដែលពួកគេបានថតរួចហើយហើយឲ្យចុះហត្ថលេខាលើលិខិតសុំទោសមួយដោយធ្វើការសុំទោសលើសកម្មភាពរបស់ពួកគេ។
លោក សុន ហេង ជាអ្នកគ្រប់គ្រងម្នាក់ដែលឃាត់ខ្លួនអ្នកកាសែតទាំងពីររូបនេះបានថ្លែងថា លោកធ្វើដូច្នេះគឺមកពីអ្នកទាំងពីរចូលមកក្នុងបរិវេណរបស់រោងចក្រដោយពុំមានការសុំអនុញ្ញាត។លោក ហេង បានថ្លែងបន្តថា៖ «មិនមែនតែអ្នកកាសែតទេ សូម្បីតែអាជ្ញាធរក៏មិនត្រូវបានអនុញ្ញាតឲ្យចូលរោងចក្រដែរប្រសិនបើពួកគេមិនបានសុំការអនុញ្ញាតពីយើងមុននោះ»។
លោកបានថ្លែងបន្តថា បន្ទាប់ពីនាំអ្នកកាសែតទាំងពីរនាក់នេះទៅបន្ទប់សន្តិសុខលោកបានសូមពិនិត្យរូបថតនិងឲ្យពួកគេលុបរូបមួយចំនួន។ លោកបានពន្យល់ថា ករណីនេះបានបញ្ចប់នៅពេលអ្នកទាំងពីរបានធ្វើការសុំទោសរួចហើយ។
នៅពេលទាក់ទងតាមទូរស័ព្ទអ្នកកាសែត The Globe and Mail ឈ្មោះ Mark MacKinnon បានថ្លែងថា លោក និងអ្នកថតរូបម្នាក់បានរកមើលដើម្បីសុំចូលប៉ុន្តែទ្វារនោះមិនឃើញមាននរណាម្នាក់យាមសោះ។
លោក Mark MacKinnon ដែលធ្វើការឲ្យកាសែត Globe ប្រចាំទីក្រុងប៉េកាំងប្រទេសចិនបានថ្លែងបន្តថា ៖ «គ្មាននរណាម្នាក់នៅទីនោះឡើយ»។ លោកបានបញ្ជាក់ថា៖ «ទ្វារបើកចំហចោលហើយមានស្លាកសញ្ញាសរសេរថា ស្វាគមន៍ភ្ញៀវ»។
លោកបានថ្លែងបន្តថា បន្ទាប់ពី១០នាទីក្រោយមកអ្នកទាំងពីរបានត្រឡប់មកវិញហើយអ្នកគ្រប់គ្រងម្នាក់បានដើរទៅរកពួកគេហើយចាប់ផ្តើមស្រែករួចក៏បានបិទទ្វារ។
លោកបានបន្តថា ៖ «អស់រយៈពេលជាង៩០នាទីពួកគេបដិសេធមិនព្រមឲ្យពួកយើងចាកចេញវិញ។ រាល់ពេលដែលយើងព្យាយាមចង់ចេញ ពួកគេមករារាំងយើង។ ពួកគេចង់ឃើញរូបថតដែលយើងបានថតប៉ុន្តែយើងមិនបានថតច្រើនទេ ...ពួកគេខឹងខ្លាំងណាស់។ ខ្ញុំមិនដឹងថា ហេតុអ្វីពួកគេមានការភ័យខ្លាចខ្លាំងបែបនេះទេ»។
លោកបន្តថា ៖ «ខ្ញុំមិនគិតថា វាជាឧប្បត្តិហេតុអន្តរជាតិមួយទេ ប៉ុន្តែខ្ញុំគិតថា វាជាករណីឈ្លើយខ្លាំងណាស់»៕ PS
រាយការណ៍បន្ថែមៈ Abby Seiff
