The Phnom Penh Post Search

Search form




Logo of Phnom Penh Post newspaper Phnom Penh Post - អ្នក​ជីក​ទំពាំង​ម្នាក់​ជាន់​មីន​ដាច់​ជើង​ទាំង​ពីរ​នៅ ប៉ៃលិន

អ្នក​ជីក​ទំពាំង​ម្នាក់​ជាន់​មីន​ដាច់​ជើង​ទាំង​ពីរ​នៅ ប៉ៃលិន

អ្នក​ជីក​ទំពាំង​ម្នាក់​ជាន់​មីន​ដាច់​ជើង​ទាំង​ពីរ​នៅ ប៉ៃលិន

ប៉ៃលិនៈ គ្រាប់​មីន​មួយ​គ្រាប់​ផ្តាច់​ជើង​ទាំង​សង​ខាង​របស់​យុវជន​អាយុ ១៩ឆ្នាំ ម្នាក់ ដែល​បាន​ដើរ​ជាន់​លើ​វា ក្នុង​ពេល​គាត់​កំពុង​ដើរ​រក​ជីក​ទំពាំង ក្នុង​តំបន់​ព្រៃ​ឫស្សី ក្នុង​ស្រុក សាលា​ក្រៅ ខេត្ត ប៉ៃលិន កាល​ពី​ម្សិលមិញ។

លោក សំ សារ៉េត អភិបាល​រង​ស្រុក សាលាក្រៅ បាន​ឲ្យ​ដឹង​ថា បើ​ទោះ​ជា​បាត់បង់​ជើង​ទាំង​សង​ខាង​ក៏​ដោយ ក៏​ប៉ុន្តែ លោក ធៀន ជិន បាន​រស់​រួច​ផុត​ពី​គ្រោះថ្នាក់​ដល់​ជីវិត​ដែល​បង្ក​ពី​ការ​ផ្ទុះ​មីន​នោះ​ហើយ​គាត់​កំពុង​តែ​ទទួល​ការ​ព្យាបាល​នៅ​មន្ទីរពេទ្យ​ក្នុង​ខេត្ត បាត់ដំបង។

លោក សំ សារ៉េត បាន​ថ្លែង​ថា៖ «ជន​រងគ្រោះ​បាន​ដើរ​ចូល​ទៅ​ក្នុង​ព្រៃ​តែ​ម្នាក់​ឯង ដើម្បី​ស្វែង​រក​ជីក​ទំពាំង។ តែ​សំណាង​មិន​ល្អ គាត់​បាន​ជាន់​ចំ​គ្រាប់​មីន ដែល​បាន​កប់​នៅ​ទី​នោះ តាំង​ពី​សម័យ​ខ្មែរ​ក្រហម»។

អ្នក​ភូមិ​បាន​ឮ សម្រែក​របស់​លោក ធៀន ជិន បន្ទាប់​ពី​ការ​ផ្ទុះ​នោះ ហើយ​បាន​ជួយ​នាំ​គាត់​មក​កាន់​មន្ទីរពេទ្យ​ដើម្បី​សង្គ្រោះ។

លោក សំ សារ៉េត បាន​បន្ថែម​ថា៖ «ខ្ញុំ​ចង់​ផ្ញើ​សារ​ទៅ​អ្នក​ភូមិ​ទាំង​អស់​ឲ្យ​ប្រុង​ប្រយ័ត្ន ហើយ​ធានា​ថា ពួក​គេ​នឹង​ទទួល​បាន​ព័ត៌មាន​អំពី​ទី​កន្លែង​ដែល​ត្រូវ​ទៅ​ក្នុង​ករណី​មាន​គ្រាប់​មីន»។

កាល​ពី​សប្តាហ៍​មុន មនុស្ស ៦ នាក់​បាន​ស្លាប់ ហើយ​ម្នាក់​ពិការ បន្ទាប់​ពី​គាត់​បើក​ត្រាក់ទ័រ​ច្នៃ​កិន​គ្រាប់​មីន​តោន ក្នុង​ស្រុក ជាំក្សាន្ត ខេត្ត ព្រះវិហារ។

មន្ត្រី​ស៊ីម៉ាក់​បាន​អះអាង ប្រាប់​ភ្នំពេញ ប៉ុស្តិ៍ មុន​នេះ​ថា ស៊ីម៉ាក់​បាន​ធ្វើ​ការ​មួយ​ផ្នែក​ផ្អែក​ទៅ​តាម​ការ​កំណត់​អាទិភាព​របស់​អាជ្ញាធរ​មូលដ្ឋាន​និង​អាជ្ញាធរ​មីន​កម្ពុជា ដើម្បី​រំដោះ​ផ្ទៃ​ដី​ដែល​ត្រូវ​ការ​ជា​ចំា​បាច់ និង​ជា​តំបន់​មាន​អាទិភាព​ខ្ពស់ៗ​សម្រាប់​ការ​អភិវឌ្ឍ​ដែរ។

តាម​របាយការណ៍​ស៊ីម៉ាក់ ក្នុង​រយៈ​ពេល ៦ ខែ​ដើម​ឆ្នាំ ២០១៣​នេះ យើង​បាន​ធ្វើ​ការ​រំដោះ​ផ្ទៃ​ដី​ប្រមាណ​ជិត ៤០ គីឡូម៉ែត្រ​ការ៉េ ហើយ​បាន​រុក​រក​និង​កម្ទេច​គ្រាប់​មីន​និង​យុទ្ធភណ្ឌ​មិន​ទាន់​ផ្ទុះ គ្រប់​ប្រភេទ​ជាង ៦ ម៉ឺន​គ្រាប់»។

យោង​តាម​របាយ​ការណ៍​របស់ CMAC នៅ​ក្នុង​រយៈ​ពេល ៦ ខែ​ដើម​ឆ្នាំ ២០១៣ នេះ​គ្រោះថ្នាក់​ដោយ​សារ​គ្រាប់​មិន​ទាន់​ផ្ទុះ​មាន​ចំនួន ៦០ ករណី​បើ​ធៀប​ចំនួន​នេះ​ទៅ​នឹង​ឆ្នាំ​២០១២ ក្នុង​រយៈ​ពេល​ដូច​គ្នា គឺ​មាន​ការ​ថយ​ចុះ​គួរ​ឲ្យ​កត់​សម្គាល់៕ TK

អត្ថបទគួរចាប់អារម្មណ៍