ឧត្តរមានជ័យៈ មនុស្សជិត៧០នាក់ បានពុលអាហារនៅឯពិធីសែនព្រេនកូនកំលោះក្រមុំមួយកាលពីថ្ងៃចន្ទ ដោយសារអ្នកចម្អិនអាហារខ្វះអនាម័យ។
អធិការក្រុងសំរោង លោកនួន អេត បានឲ្យដឹងថា អ្នកភូមិចំនួន ៦៧នាក់ក្នុងនោះមានក្មេង ៤៩នាក់បានក្អួត និងរាកភ្លាមៗ បន្ទាប់ពីបរិភោគអាហារដែលគេរៀបចំសម្រាប់ពិធីសែនព្រេននោះ។ លោកថ្លែងថា៖ «ខ្ញុំបានចុះទៅពិនិត្យភ្លាមៗ នៅពេលគេរាយការណ៍ថា អ្នកភូមិជាច្រើនបានពុលអាហារ។ ពួកគេ ក្អួត ហើយរាក បន្ទាប់ពីហូបអាហារដែលចម្អិនដោយអ្នកភូមិ»។ លោកឲ្យដឹងថា អ្នកចម្អិនអាហារបានប្រើចានដែកសម្រាប់ទុកសាច់ និងបន្លែដែលគេមិនបានលាងឲ្យស្អាតបន្ទាប់ពីគេប្រើសម្រាប់លាយថ្នាំសម្លាប់សត្វល្អិត។ ទោះជាយ៉ាងណា ក៏អ្នកឈឺទាំងនោះបានត្រឡប់ទៅផ្ទះវិញហើយបន្ទាប់ពីការព្យាបាល៕ NR
