The Phnom Penh Post Search

Search form

Logo of Phnom Penh Post newspaper Phnom Penh Post - អ្នក​ភូមិ​បឹង​កក់​ថា ការ​ផ្ទេរ​ទី​កន្លែង​ឃុំ​ខ្លួន​អ្នក​ស្រី​បុប្ជា ជា​សញ្ញា​នៃ​ការ​ដោះ​លែង

អ្នក​ភូមិ​បឹង​កក់​ថា ការ​ផ្ទេរ​ទី​កន្លែង​ឃុំ​ខ្លួន​អ្នក​ស្រី​បុប្ជា ជា​សញ្ញា​នៃ​ការ​ដោះ​លែង

អ្នក​ភូមិ​បឹង​កក់​ថា ការ​ផ្ទេរ​ទី​កន្លែង​ឃុំ​ខ្លួន​អ្នក​ស្រី​បុប្ជា ជា​សញ្ញា​នៃ​ការ​ដោះ​លែង

130513_09
អ្នកស្រីបុប្ជាឱបកូនប្រុសសំណព្វពេលនាំមកឧទ្ធរណ៍ពីខែមីនា

ភ្នំពេញៈ អ្នក​ភូមិ​បឹង​កក់​រំពឹង​ថា ការ​ផ្លាស់​ប្តូរ​ទី​កន្លែង​ឃុំ​ខ្លួន អ្នក​ស្រី​យ៉ោម បុប្ជា ពី​ពន្ធនាគារ​ព្រៃ​ស មក​កាន់​ពន្ធនាគារ PJ កាល​ពី​ថ្ងៃ​សុក្រ ជា​សញ្ញា​វិជ្ជមាន ឈាន​ទៅ​ដោះ​លែង​ស្ត្រី​ជាប់​ឃុំ​រូប​នេះ ក្នុង​ពេល​ឆាប់ៗ។

អ្នក​ស្រី យ៉ោម បុប្ផា អាយុ ២៩ឆ្នាំ ត្រូវ​បាន​សាលា​ដំបូង​រាជធានី​កាត់​ទោស​ឲ្យ​ជាប់​ពន្ធនាគារ​រយៈ​ពេល ៣ឆ្នាំ កាល​ពី​ចុង​ខែ​វិច្ឆិកា​ឆ្នាំ ២០១២ ក្រោម​បទ​ចោទ​ប្រកាន់​ថា​បាន​រួម​គ្នា​ប្រើ​អំពើ​ហិង្សា​ដោយ​ចេតនា​ទៅ​លើ​អ្នក​រត់​ម៉ូតូ​ឌុប​ពីរ​នាក់។ ប៉ុន្តែ​ក្រុម​អ្នក​ភូមិ​បឹង​កក់ និង​អង្គការ​សង្គម​ស៊ីវិល​បាន​ទាមទារ​ឲ្យ​ដោះ​លែង​ដោយ​សំអាង​ថា ការ​ចាប់​ឃុំ​ស្រ្តី​ដែល​មាន​ភាព​សកម្ម​ក្នុង​ការ​ចូល​រួម​តវ៉ា​ការពារ​ផ្ទះ​សម្បែង និង​ដី​ធ្លី​ដែល​ត្រូវ​បាន​គេ​រំលោភ​បំពាន​នេះ​ថា ជា​ការ​បំបាក់​ស្មារតី​ទៅ​លើ​អ្នក​តវ៉ា​។ ជាមួយ​គ្នា​នេះ អង្គការ​លើក​លែង​ទោស​អន្តរជាតិ បាន​ហៅ​អ្នក​ស្រី​បុប្ជា​ថា ជា​អ្នក​ទោស​មនសិការ។ យ៉ាង​ណា​ក៏​ដោយ មាន​ក្រុម​អ្នក​រត់​ម៉ូតូ​ឌុប​មួយ​ក្រុម បាន​គាំទ្រ ការ​ផ្តន្ទាទោស​អ្នក​ស្រី​បុប្ជា។

កាល​ពី​ព្រឹក​ម្សិលមិញ ប្ដី​និង​កូន​ប្រុស​របស់​អ្នក​ស្រី បុប្ផា រួម​ទាំង​អ្នក​តំណាង​មួយ​ចំនួន​នៃ​សកម្មជន​ដី​ធ្លី​បឹង​កក់ ត្រូវ​បាន​មន្ត្រី​នគរបាល​នៅ​មណ្ឌល​ឃុំ​ខ្លួន PJ អនុញ្ញាត​ឲ្យ​មាន​ការ​រៀប​ចំ​ពិធី​ហូប​បាយ​ជុំ​គ្នា​ជាមួយ​ស្ត្រី​ជាប់​ឃុំ​រូប​នេះ។ លោក លួស សាខន ប្ដី​អ្នក​ស្រី បុប្ជា បាន​ឲ្យ​ដឹង​ថា អ្នក​ភូមិ​ជាង ១០០ នាក់​បាន​នាំ​គ្នា​ទៅ PJ ជា​ទី​ដែល​ភរិយា​របស់​លោក​ត្រូវ​បាន​គេ​ផ្ទេរ​ពី​ពន្ធនាគារ​ព្រៃ​ស យក​ទៅ​ឃុំ​ខ្លួន​នៅ​ទី​នោះ​។ លោក​ថ្លែង​ថា៖«ក្រៅ​ពី​ជួប​សួរ​សុខ​ទុក្ខ​ពួក​យើង​ត្រូវ​បាន​អនុញ្ញាត ឲ្យ​រៀបចំ​ហូប​បាយ​ជុំ​គ្នា​នៅ​ទី​នោះ និង​ធ្វើ​ពិធី​ព្រលែង​ចាប​ជា​និមិត្ត​រូប​នៃ​សេរីភាព​ផង​ដែរ»។

អ្នក​ភូមិ​រំពឹង​ថា ការ​ផ្ទេរ​អ្នក​ស្រី​បុប្ផា ពី​ពន្ធនាគារ​ព្រៃ​ស ទៅ PJ គឺជា​សញ្ញា​វិជ្ជមាន​មួយ​ឈាន​ទៅ​រក​ការ​ដោះ​លែង​ស្ត្រី​ជាប់​ឃុំ​រូប​នេះ​ក្នុង​ពេល​ឆាប់ៗ​។ អ្នក​ស្រី ហេង មុំ តំណាង​ម្នាក់​ក្នុង​ចំណោម ៥នាក់​ដែល​បាន​ចូល​រួម​នៅ​ក្នុង​ពិធី​ហូប​បាយ​ជុំ​គ្នា​ជាមួយ​អ្នក​ស្រី បុប្ផា និយាយ​ថា អ្នក​ស្រី បុប្ផា ទំនង​ជា​ត្រូវ​ទទួល​បាន​ការ​លើក​លែង​ទោស ពី​ព្រះ​មហាក្សត្រ នៅ​ក្នុង​ថ្ងៃ​ចម្រើន​ព្រះ​ជន្ម​របស់​ព្រះ​អង្គ ដែល​នឹង​ប្រព្រឹត្ត​ធ្វើ​ឡើង​ចាប់​ពី​ថ្ងៃ​ចន្ទ​សប្ដាហ៍​នេះ។ អ្នក​ស្រី​ជឿ​ថា៖ «​រាជ​រដ្ឋាភិបាល​កំពុង​រក​វិធី​ដើម្បី​ដោះ​លែង​គាត់​ឲ្យ​មាន​សេរីភាព​វិញ ព្រោះ​គាត់​ពិត​ជា​មិន​បាន​ប្រព្រឹត្ត​អ្វី​ខុស​ដូច​ការ​ចោទ​ប្រកាន់​នោះ​ទេ គាត់​ជា​ស្ត្រី​ដែល​មាន​ចរិត​ទន់​ភ្លន់ និង​ស្លូត​បូត​»។

ប៉ុន្តែ​បើ​តាម​មន្ត្រី​ពន្ធនាគារ​ម្នាក់​ដែល​បាន​ស្នើ​សុំ​មិន​បញ្ចេញ​ឈ្មោះ បាន​អះ​អាង​ថា ការ​ផ្ទេរ​នេះ ពី​ព្រោះ​តែ​ចំនួន​អ្នក​ទោស និង​ជន​ជាប់​ចោទ​នៅ​មណ្ឌល​កែ​ប្រែ​ម-២​មាន​ការ​កើន​ឡើង។ មន្ត្រី​រូប​នោះ​បន្ត​ថា នៅ​ថ្ងៃ​បុណ្យ​ចម្រើន​ព្រះ​ជន្ម ព្រះ​បាទ​នរោតម្ត សីហមុនី ក្រសួង​យុត្តិធម៌ និង​ក្រសួង​មហា​ផ្ទៃ បាន​ព្រម​ព្រាង​គ្នា​ថា នឹង​មាន​រៀបចំ​ពិធី​លើក​លែង និង​បន្ធូរ​បន្ថយ​ទោស ដល់​អ្នក​ទោស​ជាង ១០០នាក់ ដែល​បាន​អនុវត្ត​ទោស​បាន​២ ភាគ ៣ និង​ដែល​បាន​ផ្លាស់​ប្ដូរ​អត្តចរិត​បាន​ល្អ​ប្រសើរ។ មន្ត្រី​រូប​នោះ​បន្ថែម​ថា​៖«​ទោះ​ជា​បែប​ណា​ក្ដី​ក្នុង​ចំណោម​អ្នក​ទោស និង​ជន​ជាប់​ចោទ​ទាំង​នោះ​ខ្ញុំ​មិន​បាន​ដឹង​ថា​មាន​ឈ្មោះ​អ្នក​ណា​ខ្លះ​នោះ​ទេ»៕

អត្ថបទគួរចាប់អារម្មណ៍