The Phnom Penh Post Search

Search form

Logo of Phnom Penh Post newspaper Phnom Penh Post - អ្នក​លេង​ល្បែង​ថៃ​ប្រើ​ល្បិច​៧នាក់​ត្រូវ​ចាប់​ខ្លួន​នៅ​ប៉ៃលិន




អ្នក​លេង​ល្បែង​ថៃ​ប្រើ​ល្បិច​៧នាក់​ត្រូវ​ចាប់​ខ្លួន​នៅ​ប៉ៃលិន

អ្នក​លេង​ល្បែង​ថៃ​ប្រើ​ល្បិច​៧នាក់​ត្រូវ​ចាប់​ខ្លួន​នៅ​ប៉ៃលិន

ប៉ៃលិនៈ ជន​សង្ស័យ​ជាតិ​ថៃ​៧នាក់​និង​ខ្មែរ​២នាក់ ត្រូវ​កង​រាជ​អាវុធ​ហត្ថ​ខេត្ត​ប៉ៃលិន​ចាប់​ខ្លួន​ពាក់​ព័ន្ធ​នឹង​ការ​លេង​ល្បែង​បន្លំ​ក្នុង​កាស៊ីណូ​មកុដ​ពេជ្រ នៅ​ស្រុក​សាលា​ក្រៅ កាល​ពី​យប់​ថ្ងៃ​ទី១៣​មីនា និង​បាន​បញ្ជូន​ទៅ​សាលា​ដំបូង​ខេត្ត​ពី​រសៀល​ម្សិលមិញ។

លោក នង វណ្ណនី មន្ត្រី​កង​រាជ​អាវុធហត្ថ​ខេត្ត​ឲ្យ​ដឹង​ពី​ម្សិលមិញ​ថា ជន​ជាតិ​ថៃ​៧​នាក់​និង​ខ្មែរ​២​នាក់ ត្រូវ​កម្លាំង​ប៉េអឹម​ខេត្ត​ចាប់​ខ្លួន​នៅ​រំលង​អ្រធាត្រ​យប់​ថ្ងៃទី​១៣ មីនា ក្នុង​កាស៊ីណូ​មកុដ​ពេជ្រ​នៅភូមិ​ផ្សារ​ព្រំ ឃុំ​ស្ទឹង​កាច់ ស្រុក​សាលា​ក្រៅ​ខេត្ត​ប៉ៃលិន បន្ទាប់​ពី​ម្ចាស់​ក្រុម​ហ៊ុន​កាស៊ីណូ​ប្តឹង​ពាក់​ព័ន្ធ​នឹង​ការ​លេង​ល្បែង​បន្លំ។

លោកបញ្ជាក់ថា៖«ពួកគេត្រូវ​បញ្ជូន​ទៅ​តុលាការ​ដើម្បី​ឲ្យ​ចៅក្រម​ស៊ើប​សួរ​ធ្វើការ​ចោទ​ប្រកាន់​តាម​ផ្លូវ​ច្បាប់ ដោយ​យោង​លើ​បទ​ល្មើស​ជាក់​ស្តែង​យើង​បាន​កសាង​សំណុំ​រឿង​និង​ចោទ​៣ករណី។ ទី១ ពីបទ​រំលោភ​លើសេចក្ដីទុក​ចិត្ត​ ទី២ ​ពីបទ​សម​គំនិត ​និង​ទី៣ ពី​បទ​​ឆ្លង​ដែន​ខុស​ច្បាប់​»។

លោក ​បន្ត​ថា ​ជនសង្ស័យ​ទាំង​៩នាក់​ ត្រូវម្ចាស់​កាស៊ីណូ ប្តឹង​ចោទ​ថា ប្រើ​បច្ចេក​ទេស​ទំនើប ដើម្បី​បន្លំ​លួច​មើល​សន្លឹក​បៀរ ​និង​ចាក់​យក​លុយ​ពីកាស៊ី​ណូ​បាន​យ៉ាង​ច្រើន។ លោក​ថា​ ពួកគេ​មាន​ល្បិច​ខ្ពស់​និង​ចេះ​ប្រើ​បច្ចេកទេស​ទំនើប ដូច​ក្នុង​រឿង​កុន​ហុង​កុង​ដែរ។ ដោយ​ពេល​ចូល​លេង​មាន​វិទ្យុ​ទាក់​ទង​មាន​កាមេរ៉ា​បំពក់​លើ​អាវធំ សម្រាប់​មើល​សន្លឹក​បៀរ​ទុក​បន្លំប្តូរ​យក​សន្លឹក​បៀរ​កាស៊ីណូ​ចេញ។ ពេល​លេង​កាមេរ៉ា​ជន​សង្ស័យ​ថត​និង​បញ្ជូន​សញ្ញា​សារ​ទៅ​ក្រុម​រៀប​ប្តូរ ហើយ​ទើប​បញ្ជូន​សញ្ញា​មក​វិញ ដើម្បី​ឲ្យ​ពួកគេ​ខាង​ក្នុង​ចាក់​តាម​ឲ្យ​ត្រូវ។

លោក នង វណ្ណនី ឱ្យដឹងថា ជន​សង្ស័យ​ទាំង៩​នាក់​នោះ​មាន​ថៃ​៧​នាក់​(ស្រី​៣​នាក់)​ជន​ជាតិ​ខ្មែរ២ នាក់ ម្នាក់​ជា​បុគ្គលិក​ក្នុង​កាស៊ីណូ​និង​ម្នាក់​ទៀត​ជា​អ្នក​លក់​បាយ​នៅ​មុខ​កាស៊ីណូ​ហើយ​ក៏​ជា​អ្នក​យក​បៀរ​ចូល​ក្នុង​កាស៊ីណូ​ទៅ​ឲ្យ​ជន​ជាតិ ថៃ​ដើម្បី​ប្តូរ។

ជនជាតិថៃ៧នាក់ ឈ្មោះហ្វីន ធីប ភេទ​ស្រី អាយុ​២៤​ឆ្នាំ នៅ​ក្រុង​បាងកក ណាត់ តះ​ភុន ភេទប្រុស អាយុ​២៤​ឆ្នាំ នៅ​ក្រុង​បាងកក, សាន់ យ៉ា​ ភេទ​ប្រុស​ អាយុ​៤៥​ឆ្នាំ នៅ​ខេត្ដ​ឈៀង​ម៉ៃ សាក់ ថង​យ៉ាំ​ ភេទ​ប្រុស​ អាយុ​៣៤​ឆ្នាំ​ នៅ​ខេត្ដ​ឈុន​ប៊ូរី​ ព្រី ធា​ ភេទ​ប្រុស​អាយុ​៤៦​ឆ្នាំ នៅ​ក្រុង​បាងកក វ៉ាន់ នីដា ប្រុស អាយុ​២៣​ឆ្នាំ នៅ​ក្រុង​បាងកក វិ ផា​រ៉ាក់ ភេទ​ប្រុស អាយុ​២៣​ឆ្នាំ​នៅ​ខេត្ដ​ប្រាក​ធូម​ផានី។ ឯឈ្មោះ សុ​ ខៃ​ ភេទ​ប្រុស​ អាយុ​៣១​ឆ្នាំ​ ជាបុគ្គលិក​កាស៊ីណូ​មកុដ​ពេជ្រ និង មាស ធា​ ភេទ​ប្រុស​ អាយុ​៣៥​ឆ្នាំ រស់​នៅ​ភូមិ​ផ្សារ​ព្រំ ឃុំ​ស្ទឹង​កាច់​ ស្រុក​សាលា​ក្រៅ​ ខេត្ត​ប៉ៃលិន ។

លោកបញ្ជាក់ថា សមត្ថកិច្ច​រឹប​អូស​បាន​មាន​អាវ​ធំ​បំពាក់​កាមេរ៉ា​ជាប់​អាវ២ កាបូប​ស្ពាយ​ចំនួន៥ មាន​បំពាក់​កាមេរ៉ា កាស​ស្ដាប់​៥​គ្រឿង ទូរស័ព្ទ​ដៃ៧​គ្រឿង កាក់​លុយ​សម្រាប់​ចាក់​គិត​ជា​ប្រាក់​ថៃ ២.២៣០.០០០ បាត ក្រដាស​ប្រាក់​ថៃ ៦៦០​បាត​ ប្រាក់​ខ្មែរ​៣៧.០០០​រៀល និង​ប្រាក់​ដុល្លារ​ចំនួន​ ៣ ដុល្លារ៕

អត្ថបទគួរចាប់អារម្មណ៍