The Phnom Penh Post Search

Search form




Logo of Phnom Penh Post newspaper Phnom Penh Post - ឧទ្ធរណ៍​ជម្រះ​រឿង ហេង ពៅ បញ្ជា​ឲ្យ​បាញ់ ថុង អ៊ុយប៉ាង

ឧទ្ធរណ៍​ជម្រះ​រឿង ហេង ពៅ បញ្ជា​ឲ្យ​បាញ់ ថុង អ៊ុយប៉ាង

ឧទ្ធរណ៍​ជម្រះ​រឿង ហេង ពៅ បញ្ជា​ឲ្យ​បាញ់ ថុង អ៊ុយប៉ាង

20140327_01
លោក ហេង ពៅ (កណ្ដាល) អតីតស្នងការរាជធានីភ្នំពេញ ពេលឡើងសវនាការនៅឯសាលាឧទ្ធរណ៍ កាលពីថ្ងៃម្សិលមិញ ផា លីណា

ភំ្នពេញៈ លោក ហេង ពៅ អតីត​ស្នងការ​រាជធានី​ភ្នំពេញ​និង​បក្ខពួក​កាល​ពី​ម្សិលមិញ​ត្រូវ​សាលា​ឧទ្ធរណ៍​បើក​សវនាការ​ជំនុំ​ជម្រះ​លើ​សំណុំ​រឿង ៤ ដាច់​ពី​គ្នា​ក្នុង​នោះ​ក៏​មាន​សំណុំ​រឿង​បាញ់​ប្រហារ​លោក ថុង អ៊ុយប៉ាង ចាងហ្វាង​កាសែត កោះ​សន្តិភាព ផង​ដែរ។

លោក សេង ស៊ីវុត្ថា ប្រធាន​ក្រុម​ប្រឹក្សា​ជំនុំ​ជម្រះ​សាលា​ឧទ្ធរណ៍​បាន​ថ្លែង​ថា ឈ្មោះ ហេង ពៅ ​ប្រុស) អាយុ ៥៦​ឆ្នាំ អតីត​ស្នងការ​រាជធានី លី រ៉ាស៊ី (ប្រុស) អាយុ ៤៤​ឆ្នាំ អតីត​អនុ​ប្រធាន​ការិយាល័យ ព្រហ្មទណ្ឌ​កម្រិត​ស្រាល​រាជធានី​និង ផេង ផៃ (ប្រុស) អាយុ ៤៣​ឆ្នាំ ត្រូវ​បាន​ចោទ​ប្រកាន់​ពី​បទ​ប៉ុនប៉ង​ឃាតកម្ម​គិត​ទុក​ជា​មុន​និង​អំពើ​សម​គំនិត។ តាម​អង្គ​ហេតុ កាល​ពី​ព្រឹ​កថ្ងៃ​ទី​៨ ខែ​មិថុនា ឆ្នាំ​១៩៩៨ មាន​ជន​ប្រដាប់​អាវុធ ២​នាក់ បាញ់​ប្រហារ​លើ​លោក ថុង អ៊ុយប៉ាង ក្នុង​កម្មវិធី​បុណ្យ​នៅ​វត្ត ទឹក​ថ្លា ត្រូវ​ចំ ២ គ្រាប់​របួស​តែ​អង្គរក្ស​លោក​បាន​បាញ់​ត​ត្រូវ​ជន​ល្មើស ១ គ្រាប់​របួស​ដៃ​ឆ្វេង​និង​ត្រូវ​សមត្ថកិច្ច​រក​ឃើញ​ថា មាន​ការ​ពាក់ព័ន្ធ​នឹង​ឈ្មោះ ហេង វេង លី រ៉ាស៊ី និង ផេង ផៃ ក្រោម​បញ្ជា​ពី​លោក ហេង ពៅ។

សំណុំ​រឿង​នេះ​សាលា​ដំបូង​រាជធានី បាន​ផ្តន្ទាទោស លី រ៉ាស៊ី ហេង វេង និង ផេង ផៃ នៅ​ថ្ងៃ ទី​១០ ខែ​ធ្នូ ឆ្នាំ​២០០៩ ដាក់​ពន្ធនាគារ​ម្នាក់ៗ ១៨​ឆ្នាំ និង​ដាក់​ឃុំ ហេង ពៅ ចំនួន ១៦​ឆ្នាំ ពី​បទ​សម​គំនិត​និង​បង្គាប់​ឲ្យ​អ្នក​ទាំង ៤ សង​ទៅ​ជន​រងគ្រោះ ១៧ ម៉ឺន​ដុល្លារ និង ៥ ម៉ឺន​ដុល្លារ ទៅ​ឈ្មោះ យឹម ឈឿន។ តែ​ជន​ទាំង​បី​នាក់​បាន​ប្តឹង​ឧទ្ធរណ៍។

ក្នុង​សវនាការ ហេង ពៅ ប្រាប់​ថា រឿង​នេះ​ឈ្មោះ សេង គ្រឿង ជា​ជាតិ វៀតណាម និង​ជា​អង្គរក្ស ហុក ឡង់ឌី ជា​អ្នក​បាញ់​លោក ថុង អ៊ុយប៉ាង ហើយ​ថា ហេង វេង ត្រូវ​របួស​ដៃ​ខាង​ស្តាំ​ដោយ​រាល​កៃ​កាំភ្លើង​នៅ​ផ្ទះ​ជាមួយ​ក្មួយ ហើយ​គាត់ លី រ៉ាស៊ី និង ផេង ផៃ នាំ ហេង វេង ទៅ​ព្យាបាល​នៅ វៀតណាម។ ហេង ពៅ ថា៖ «សាក្សី​ទាំង​នោះ​សុទ្ធ​តែ​ជា​អ្នក​មាន​ទំនាស់​នឹង​ខ្ញុំ​ទើប​ឆ្លើយ​ដាក់​បន្ទុក​ខ្ញុំ។ រឿង​នេះ ជា​រឿង​លោក ហុក ឡង់ឌី។ ថុង អ៊ុយប៉ាង សរសេរ​ថា ហុក ឡង់ឌី ដឹក​ឈើ​បង្កប់​កញ្ឆា​ចេញ​តាម កំពង់សោម។ បើ​ខ្ញុំ​មាន​ទំនាស់ នឹង​គាត់​ខ្ញុំ​មិន​ឲ្យ ហេង វេង ទៅ​បាញ់​ទេ ព្រោះ​ពួកគេ​ស្គាល់​គ្នា ខ្ញុំ​មិន​បាន​ប្រព្រឹត្ត​ទេ សុំ​ឲ្យ​តុលាការ​ជួយ​រក​យុត្តិធម៌»។

ចំណែក លី រ៉ាស៊ី និង ផេង ផៃ បាន​បដិសេធ​ថា ពួក​គេ​មិន​បាន​ប្រព្រឹត្ត​និង​ស្គាល់​ជន​រងគ្រោះ​ទេ តែ​សារភាព​ថា បាន​នាំ ហេង វេង ទៅ​ព្យាបាល​នៅ វៀតណាម និង​សុំ​ឲ្យ​ការ​លើក​លែង​ទោស។

លោក តាន់ សេណារ៉ុង តំណាង​មហា​អយ្យការ​ថ្លែង​ថា លោក​ឯកភាព​លើ​អង្គហេតុ តែ​សុំ​ឲ្យ​ក្រុម​ប្រឹក្សា​វែក​ញែក​ឲ្យ​បាន​ច្បាស់​ហើយ​សម្រេច​ផ្តន្ទាទោស​ទៅ​តាម​ច្បាប់​ចុះ។

លោក ពុធ ធាវី មេធាវី​របស់​លោក ថុង អ៊ុយប៉ាង បាន​សន្និដ្ឋាន​ថា លោក ហេង ពៅ ថា​រាលកៃ​កាំភ្លើង​តែ​គ្មាន​ភ័ស្តុតាង ឬ​សាក្សី​បញ្ជាក់​ថា រាលកៃ​នៅ​កន្លែង​ណា​ទេ ហើយ​នេះ​ជា​ការ​បញ្ជា​ពី​ប្រពន្ធ​ដែល​អ្នក​ជាប់​ពាក់​ព័ន្ធ​ត្រូវ​មាន​ទោស​ដូច​គ្នា លោក​សុំ​ឲ្យ​តុលាការ​តម្កល់​សាលក្រម​នេះ​ទុក​នៅ​ដដែល។

លោក កៅ ស៊ូផា មេធាវី​ការពារ​លោក ហេង ពៅ បាន​ថ្លែង​ថា គ្មាន​ភ័ស្តុតាង​ឬ​សាក្សី​ណា​បង្ហាញ​ថា កូន​ក្តី​លោក​ជា​អ្នក​បញ្ជា​ទេ ហេតុ​នេះ​សុំ​តុលាការ​លើក​លែង​បទ​ចោទ។

ចំណែក សំណុំ​រឿង ទី២ លោក ហេង ពៅ ត្រូវ​តុលាការ​កាត់​ឲ្យ​ជាប់​ទោស ១៤​ឆ្នាំ ហើយ ងិន សុធាវី ជា​ប្រពន្ធ (ក្រៅ​ឃុំ) ត្រូវ​ដាក់​ពន្ធនាគារ ២០​ឆ្នាំ ពី​បទ​រក្សា​ទុក​ក្រដាស​ប្រាក់​ក្លែង​ក្លាយ ១០០ ដុល្លារ​ចំនួន ៣០០ សន្លឹក​ក្នុង ឆ្នាំ​២០០៦។ ឯ​សំណុំ​រឿង ទី៣ លោក ហេង ពៅ ត្រូវ​តុលាការ​ផ្តន្ទាទោស ៥​ឆ្នាំ ពី​បទ​បង្ខាំង​មនុស្ស​ខុស​ច្បាប់​ក្នុង ឆ្នាំ​២០០៣ ដែល​មាន​ជន​រងគ្រោះ​ឈ្មោះ ចាន់ សៀក។ ចំពោះ សំណុំ​រឿង ទី៤ លោក ហេង ពៅ ត្រូវ​សាលា​ដំបូង​រាជធានី​ផ្តន្ទាទោស​ឃុំ​ខ្លួន ៧​ឆ្នាំ និង​ឃុំ​ខ្លួន លី រ៉ាស៊ី នៅ​ពន្ធនាគារ ៦​ឆ្នាំ ពី​បទ​បង្ខាំង​មនុស្ស​ដោយ​ខុស​ច្បាប់​ក្នុង ឆ្នាំ​២០០៥ ដែល​មាន​ជន​រងគ្រោះ ហេង គឹមលាង។ តែ​សំណុំ​រឿង​ទាំង​នេះ​ត្រូវ​លោក ហេង ពៅ ប្តឹង​ឧទ្ធរណ៍​ហើយ​បាន​ច្រាន​ចោល​បទ​ចោទ​ប្រកាន់ និង​សុំ​ឲ្យ​ក្រុម​ប្រឹក្សា​ជំនុំ​ជម្រះ​សាលា​ឧទ្ធរណ៍​ជួយ​រក​យុត្តិធម៌​ទាំង​អស់។

បន្ទាប់​ការ​សួរ​ដេញ​ដោល​ចប់ លោក​ចៅក្រម សេង ស៊ីវុត្ថា ប្រកាស​ថា សាលដីកា​លើ​សំណុំ​រឿង​ទាំង​នេះ​នឹង​ប្រកាស​នៅ​ថ្ងៃ ទី​៧ ខែ​មេសា ខាង​មុខ​នេះ៕

អត្ថបទគួរចាប់អារម្មណ៍