The Phnom Penh Post Search

Search form




Logo of Phnom Penh Post newspaper Phnom Penh Post - ឧទ្ធរណ៍​ជម្រះ​សំណុំ​រឿង​បង្ក​របួស​និង​ឃាតកម្ម​នៅ ស្រុក​ទឹកផុស

ឧទ្ធរណ៍​ជម្រះ​សំណុំ​រឿង​បង្ក​របួស​និង​ឃាតកម្ម​នៅ ស្រុក​ទឹកផុស

ឧទ្ធរណ៍​ជម្រះ​សំណុំ​រឿង​បង្ក​របួស​និង​ឃាតកម្ម​នៅ ស្រុក​ទឹកផុស

20140321_10
ជនជាប់ចោទពីបទបង្ករបួសស្នាមនិងមនុស្សឃាតនៅកំពង់ឆ្នាំង ពេលនាំឡើងតុលាការ សារិទ្ធ

ភំ្នពេញៈ សាលា​ឧទ្ធរណ៍​កាលពី​ព្រឹក​ថ្ងៃ​ព្រហស្បតិ៍​ម្សិលមិញ​បាន​បើក​សវនាការ​ជំនុំ​ជម្រះ​លើ​សំណុំ​រឿង​បុរស​ជាប់​ចោទ​ម្នាក់​ដែល​តុលាការ​ថ្នាក់​ក្រោម​កាត់​ទោស​ដាក់​ពន្ធនាគារ​ជាង ១០​ឆ្នាំ ពី​បទ​បង្ក​របួស​ស្នាម​និង​មនុស្សឃាត ក្នុង​អំឡុង ឆ្នាំ​២០០៩។

លោក យន់ ណារ៉ុង ប្រធាន​ក្រុម​ប្រឹក្សា​ចៅក្រម​ជំនុំ​ជម្រះ​បាន​ថ្លែង​ថា ឈ្មោះ លឹម រីម ភេទ​ប្រុស អាយុ ២៧​ឆ្នាំ នៅ ភូមិ​កោះទាំ ឃុំ​ជៀម ស្រុក​ទឹកផុស ខេត្ត​កំពង់ឆ្នាំង ត្រូវ​ជាប់​ចោទ​ពី​បទ​បង្ក​របួស​ស្នាម និង​មនុស្សឃាត។

តាម​អង្គហេតុ​កាល​ពី​ថ្ងៃ​ទី​២១ ខែ​មេសា ឆ្នាំ​២០០៩ ក្នុង​ជម្លោះ​មួយ​នៅ​នឹង​កន្លែង​រាំ​ធុង​បាស នៅ​ក្នុង ភូមិ​កោះទាំ ឃុំ​ជៀម ស្រុក​ទឹក​ផុស ខេត្ត​កំពង់ឆ្នាំង បណ្តាល​ឲ្យ​យុវជន​ម្នាក់​ស្លាប់​និង​ម្នាក់​ទៀត​រង​របួស។ ក្រោយ​កើត​ហេតុ​សមត្ថកិច្ច​ធ្វើ​ការ​ស្រាវជ្រាវ​និង​បាន​ឃាត់​ខ្លួន​ជន​សង្ស័យ​ម្នាក់​នៅ​ក្នុង​ចំណោម​បក្ខពួក​ចំនួន ៤នាក់។

សំណុំ​រឿង​នេះ​ត្រូវ​សាលា​ដំបូង ខេត្ត​កំពង់ឆ្នាំង បើក​សវនាការ​សម្រេច​ផ្តន្ទាទោស កែវ សារន ដាក់​ពន្ធនាគារ ១០​ឆ្នាំ ៦​ខែ និង​ផ្តន្ទាទោស​កំបាំង​មុខ​ឈ្មោះ ឡាយ ណាង, យឹម យេត និង លឹម រីម ដាក់​ពន្ធនាគារ​ម្នាក់ៗ ១០​ឆ្នាំ ៦​ខែ គិត​ពី​ថ្ងៃ​ចាប់​ខ្លួន​បាន និង​បង្គាប់​ឲ្យ​អ្នក​ទាំង ៤ រួម​គ្នា​សង​សំណង​ទៅ​ជន​រងគ្រោះ​ទាំង​ពីរ​នាក់​ចំនួន ១៧ លាន​រៀល ក្រោម​ការ​ចោទ​ពី​បទ​បង្ក​របួស​ស្នាម​និង​មនុស្ស​ឃាត​តាម​អំណាច​សាលក្រម​ចុះ​ថ្ងៃ ទី​១៣ សីហា ឆ្នាំ​២០១០។ តែ លឹម រីម បាន​ប្តឹង​ទាស់​ទៅ​នឹង​សេចក្តី​សម្រេច​នេះ​ហើយ​តុលាការ ខេត្ត​កំពង់ឆ្នាំង ក៏​បាន​លើក​មក​ជម្រះ​សា​ឡើង​វិញ និង​បាន​សម្រេច​តម្កល់​ការ​វិនិច្ឆ័យ​របស់​ខ្លួន​នោះ​ទុក​ជា​បាន​ការ​ដដែល​តាម​សាលក្រម​ថ្មី​ចុះ​ថ្ងៃ ទី​១៨ ខែ​វិច្ឆិកា ឆ្នាំ​២០១១ តែ​ជន​ជាប់​ចោទ លឹម រីម នៅ​តែ​មិន​សុខ​ចិត្ត​នឹង​បាន​ប្តឹង​ឧទ្ធរណ៍​ទៀត​ហើយ​សាលា​ឧទ្ធរណ៍​បាន​ជំនុំ​ជម្រះ​កំបាំង​មុខ និង​សម្រេច​តម្កល់​សាលក្រម​សាលា​ដំបូង ខេត្ត​កំពង់ឆ្នាំង ទុក​ជា​បាន​ការ តាម​ការ​ប្រកាស​សាលដីកា ចុះ​ថ្ងៃ ទី​១៥ ខែ​កក្កដា ឆ្នាំ​២០១៣ ប៉ុន្តែ ជន​ជាប់​ចោទ​មិន​សុខ​ចិត្ត​ហើយ​បាន​ប្តឹង​ទាស់​មក​ឧទ្ធរណ៍​ទៀត។

ក្នុង​សវនាការ​ឧទ្ធរណ៍ លឹម រីម ប្រាប់​តុលាការ​ថា នៅ​ថ្ងៃ​នោះ​គាត់​ផឹក​ស៊ី​ជាមួយ​ឈ្មោះ សារន ហើយ​ក៏​បែក​គ្នា ឯ​រឿង​ឈ្លោះ​វ៉ៃ​តប់​គ្នា​នៅ​ពេល​ល្ងាច​នោះ គាត់​មិន​បាន​ដឹង​ទេ។ ប៉ុន្តែ គាត់​ទៅ​កាន់​ទី​នោះ​ដើម្បី​ចាក់​ធុង​បាស់​ហើយ​ថា គាត់​មិន​បាន​ដេញ​វាយ​ជន​រងគ្រោះ​ទេ តែ សារន ឆ្លើយ​ដាក់។

គាត់​និយាយ​ថា៖ «ខ្ញុំ​មិន​បាន​ប្រព្រឹត្ត និង​រត់​គេច​ខ្លួន​ទេ ហេតុ​នេះ សុំ​ឲ្យ​តុលាការ​មេត្តា​ដោះលែង​ខ្ញុំ​វិញ»។

តែ​បើ​តាម​ចម្លើយ កែវ សារន ដែល​ក្រឡា​បញ្ជី​អាន​ឲ្យ​ដឹង​ថា ក្រុម​ខ្លួន​ទៅ​រាំ​ធុង​បាស​យប់​នោះ​ពេល​ទៅ​នោម បាន​ជួប​ក្រុម​ជន​រងគ្រោះ​មាន​កាន់​ច្រវាក់​នឹង​ដៃ ក៏​សួរ​ថា កាន់​ធ្វើ​អី? ពួក​គេ​ក៏​ឆ្លើយ​តប​ថា យក​មក​វាយ​ពួក​ឯង រួច​ពួក​ខ្លួន​ក៏​យក​ដំបង​ដេញ​វាយ​ជន​រងគ្រោះ ហើយ​ឈ្មោះ រីម និង ណាង យក​ក្បាល​ខ្សែ​ក្រវាត់​វាយ​ត្រូវ​ក្បាល​ជន​រងគ្រោះ និង​វាយ​បន្ថែម​រហូត​ស្លាប់។

ចម្លើយ​សាក្សី​ជា​ចៅអធិការ​វត្ត ដែល​ក្រឡា​បញ្ជី​អាន​ថា លឹម រីម ជា​កូន​សិស្ស លោក​បាន​ទៅ​ចាក់​ធុង​បាស​ទី​នោះ តែ​មិន​បាន​នៅ​កន្លែង​វាយ​គ្នា​នោះ​ទេ ពេល​ទៅ​ដល់​ទី​នោះ សព​ត្រូវ​គេ​យក​ទៅ​បាត់​ហើយ។

លោក ប៉ាន់ គឹមលាន តំណាង​មហា​អយ្យការ​ថ្លែង​ថា រឿង​នេះ​មាន​ភ័ស្តុតាង​និង​សាក្សី គ្រប់​គ្រាន់​ដើម្បី​ដាក់​បន្ទុក​ហើយ​សំអាង​ហេតុ​របស់​សាលា​ឧទ្ធរណ៍​មាន​លក្ខណៈ​ត្រឹម​ត្រូវ​ហេតុ​នេះ លោក​សុំ​តម្កល់​សាលដីកា​នេះ​ទុក​ជា​បាន​ការ​ដដែល។

លោក អ៊ឹម មាច មេធាវី​ជន​ជាប់​ចោទ បាន​សន្និដ្ឋាន​ថា កូន​ក្តី​លោក​នៅ​តែ​ប្រកែក​ថា មិន​បាន​ប្រព្រឹត្ត​នៅ​ពេល​នោះ​គាត់​មិន​បាន​ទៅ​ណា​ទេ នៅ​ក្នុង​ភូមិ​នៅ​មាន​មនុស្ស​ឈ្មោះ រីម ម្នាក់​ទៀត ហេតុ​នេះ​លោក​សុំ​ឲ្យ​តុលាការ​ចាត់​របៀប ដើម្បី​ឲ្យ​មេប៉ុស្តិ៍​និង​មេភូមិ​បញ្ជាក់​ថា មាន​ឈ្មោះ រីម ប៉ុន្មាន ដើម្បី​ឲ្យ​កូន​ក្តី​លោក​អស់​ចិត្ត។

លោក​ចៅក្រម យន់ ណារ៉ុង ថ្លែង​នៅ​មុន​បិទ​សវនាការ​ថា សាល​ដីកា​នេះ​នឹង​ប្រកាស​នៅ​ថ្ងៃ​ទី៩ ខែ​មេសា៕

អត្ថបទគួរចាប់អារម្មណ៍