ភ្នំពេញៈ សាលាឧទ្ធរណ៍បានបើកជំនុំជម្រះសំណុំរឿងបុរសជនជាតិ នូវែលសេឡង់ ម្នាក់ពីថ្ងៃពុធជាប់ចោទពីបទរំលោភសេពសន្ថវៈលើនារី ៥នាក់ ក្រោយពីគាត់ប្តឹងទាស់នឹងការសម្រេចរបស់តុលាការថ្នាក់ក្រោមដែលដាក់គុក ២០ឆ្នាំ បន្ទាប់ពីបណ្តឹងសារទុក្ខគាត់ត្រូវតុលាការកំពូលសម្រេចបង្វិលមកឲ្យសាលាឧទ្ធរណ៍ជំនុំជម្រះឡើងវិញនិងកំណត់ទោសតាមច្បាប់ថ្មី។
លោក ប៉ុល សំអឿន ប្រធានក្រុមប្រឹក្សាសាលាឧទ្ធរណ៍ថ្លែងថា លោក Graham Robert cleghorn អាយុ ៦៧ឆ្នាំ ជនជាតិ នូវែលសេឡង់ ជាប់ចោទពីបទរំលោភសេពសន្ថវៈលើនារីចំនួន ៥ នាក់នៅ ខេត្តសៀមរាប ហើយត្រូវតុលាការកំពូលបង្វិលសំណុំរឿងមកសាលាឧទ្ធរណ៍ដោយឲ្យបន្តរក្សាអង្គហេតុតែឲ្យពិចារណាកែទណ្ឌកម្មមកតាមច្បាប់ថ្មីនៃក្រមព្រហ្មទណ្ឌវិញ។
លោកថ្លែងថា៖ «តុលាការកំពូលសម្រេចបង្វិលមកសាលាឧទ្ធរណ៍ដាក់ទណ្ឌកម្មជនជាប់ចោទជាថ្មី ព្រោះក្រមព្រហ្មទណ្ឌចាស់ឲ្យដាក់គុកពី ១០ ទៅ ២០ ឆ្នាំតែច្បាប់ថ្មីឲ្យដាក់គុកតែពី ៧ ឆ្នាំទៅ ១៥ ឆ្នាំ»។
តាមអង្គហេតុ Graham Robert cleghorn ត្រូវនារី ៥នាក់ ប្តឹងហើយនគរបាលប្រឆាំងការជួញដូរមនុស្ស ខេត្តសៀមរាប បានចាប់ខ្លួននៅថ្ងៃ ទី២៣ ខែតុលា ឆ្នាំ២០០៣ នៅជាយក្រុង សៀមរាប ពីបទលួងលោមរំលោភជាប្រព័ន្ធលើនារី ៥នាក់ ជាអ្នកបម្រើនៅផ្ទះគាត់ដែលមានអាយុពី ១៥ ដល់ ១៩ឆ្នាំ ជាថ្នូរនឹងប្រាក់ម្នាក់ ២០ ដុល្លារក្នុង ១ ខែចន្លោះពី ឆ្នាំ២០០១ ដល់ ២០០៣។ ក្នុងពេលចាប់ខ្លួនគាត់ សមត្ថកិច្ចឆែករកឃើញកាំភ្លើងខ្លីម៉ាកឡុក ១ ដើមផងដែរ។ឮ
សំណុំរឿងលោក Graham Robert cleghorn នេះ នៅចុង ឆ្នាំ២០០៤ សាលាដំបូង ខេត្តសៀមរាប សម្រេចផ្តន្ទាទោសដាក់គុកគាត់ ២០ឆ្នាំ ចោទពីបទរំលោភសេពសន្ថវៈនិងប្រើប្រាស់អាវុធខុសច្បាប់ និងឲ្យសងជំងឺចិត្តជនរងគ្រោះ ១០ ម៉ឺនដុល្លារ។ ប៉ុន្តែ ការសម្រេចរបស់តុលាការជនជាប់ចោទបានប្តឹងទាស់រហូតដល់តុលាការថ្នាក់កំពូល។
ក្នុងសវនាការពីម្សិលមិញលោក Graham Robert cleghorn និយាយថា គាត់ជាប់ឃុំ ១០ ឆ្នាំ ៦ ខែហើយ គាត់មិនអាចទ្រាំនឹងជំងឺពិបាកដកដង្ហើមនៅក្នុងគុកបានទៀតទេ។ គាត់ថា៖ «ខ្ញុំចាស់និងមានជំងឺប្រចាំកាយ ១០ ឆ្នាំនៅក្នុងគុកខុសគ្នាពីនៅ ១០ ឆ្នាំក្រៅគុក។ ខ្ញុំចង់ស្លាប់នៅប្រទេសកំណើតខ្ញុំ។ ខ្ញុំគ្មានលុយខ្ញុំដើររើសសម្បកកំប៉ុងដែលអ្នកទោសបោះចោលដើម្បីលក់យកលុយទិញថ្នាំ។ ខ្ញុំសូមតុលាការបន្ធូរបន្ថយទោសព្រោះខ្ញុំដឹងថា មួយឆ្នាំទៀតខ្ញុំអាចត្រូវស្លាប់ក្នុងគុក»។
លោក ឌុន វិបុល មេធាវីការពារសិទ្ធិជនជាប់ចោទបានថ្លែងថា ការចង្អុលបង្ហាញរបស់តុលាការកំពូលគឺដូចគ្នានឹងកូនក្តីលោកសុំឲ្យតុលាការអនុវត្តតាមច្បាប់ថ្មីដែរ ណាគាត់បានទទួលទោសជាង ១០ ឆ្នាំហើយដែរ។ ដូច្នេះសូមតុលាការពិចារណាឲ្យគាត់ឆាប់រួចទោសផង។
ក្រោយការសួរដេញដោលប្រធានចៅក្រមជំនុំជម្រះបានលើកការប្រកាសសាលដីការឿងនេះទៅថ្ងៃ ទី៧ ខែឧសភា ខាងមុខ៕
