The Phnom Penh Post Search

Search form




Logo of Phnom Penh Post newspaper Phnom Penh Post - ឧទ្ធរណ៍​តម្កល់​ទោស​ដាក់​គុក ១២​ឆ្នាំ ដដែល​លើ​ជន​ជាប់​ចោទ​ពី​បទ​ឃាតកម្ម​ម្នាក់

ឧទ្ធរណ៍​តម្កល់​ទោស​ដាក់​គុក ១២​ឆ្នាំ ដដែល​លើ​ជន​ជាប់​ចោទ​ពី​បទ​ឃាតកម្ម​ម្នាក់

ឧទ្ធរណ៍​តម្កល់​ទោស​ដាក់​គុក ១២​ឆ្នាំ ដដែល​លើ​ជន​ជាប់​ចោទ​ពី​បទ​ឃាតកម្ម​ម្នាក់

20140328_10b
ជនជាប់ចោទផល្លី ផល្លា ពេលនាំឡើងសវនាការឧទ្ធរណ៍ ម៉ៃ វីរៈ

ភំ្នពេញៈ សាលា​ឧទ្ធរណ៍​កាល​ពី​ថ្ងៃ​ព្រហស្បតិ៍​នៅ​តែ​តម្កល់​ទោស​បុរស​ម្នាក់​ដែល​ត្រូវ​តុលាការ​ថ្នាក់​ក្រោម​កាត់​ឲ្យ​ជាប់​ទោស ១២​ឆ្នាំ ក្រោម​ការ​ចោទ​ពី​បទ​ឃាតកម្ម និង​ការ​មិន​រាង​ចាល​ទុក​ដដែល។

លោក ងួន អ៊ីម ប្រធាន​ក្រុម​ប្រឹក្សា​ជំនុំ​ជម្រះ​សាលា​ឧទ្ធរណ៍​បាន​ថ្លែង​ថា សាលា​ឧទ្ធរណ៍​សម្រេច​តម្កល់​សាលក្រម​សាលា​ដំបូង​រាជធានី​ក្នុង​ការ​ផ្តន្តាទោស​ឈ្មោះ ផល្លី ផល្លា ភេទ​ប្រុស អាយុ ២២​ឆ្នាំ មាន​លំនៅ​ក្នុង ក្រុម​ទី៦ ភូមិ​ទួលគោក សង្កាត់​ទួលសង្កែ ខណ្ឌ​ឫស្សីកែវ ជាប់​ចោទ​ពី​បទ​ឃាតកម្ម​និង​បទ​មិន​រាង​ចាល ទុក​ដដែល​និង​បន្ត​ឃុំ​ខ្លួន​ជន​ជាប់​ចោទ​តាម​នីតិវិធី។

លោក​បញ្ជាក់​ថា៖ « សាលា​ឧទ្ធរណ៍​មិន​អាច​បន្ធូរ​បន្ថយ​ទោស​បាន​ទេ ព្រោះ​សាលា​ដំបូង​រាជធានី​បាន​បន្ធូរ​បន្ថយ​រួច​ហើយ បើ​ប្អូន​មិន​សុខ​ចិត្ត​អាច​ប្តឹង​សារទុក្ខ ក្នុង​រយៈ​ពេល ១​ខែ បាន»។

តាម​អង្គហេតុ​កាល​ពី​ថ្ងៃ ទី​១៦ ខែ​ធ្នូ ឆ្នាំ​២០១២ នៅ​វេលា​ម៉ោង ២ និង ៤០ នាទី​ជន​រងគ្រោះ​ឈ្មោះ សុទ្ធ សាហារ៉ា (ប្រុស) អាយុ ១៨​ឆ្នាំ និង​មិត្តភក្តិ​បាន​នាំ​គ្នា​ទៅ​ទិញ​ថ្នាំ​ញៀន​នៅ​ម្តុំ​បង្គោល​អង់តែន ទួលគោក ក៏​បាន​ជួប​ឈ្មោះ ផល្លី ផល្លា ស្ទាក់​ផ្លូវ​សុំ​លុយ​ពេល​សុំ​មិន​បាន​ក៏​ទាញ​ដំបង​ដេញ​វាយ​ជន​រងគ្រោះ​ចំ​ជើង​ដួល ហើយ​ក៏​វាយ​បន្ថែម​រហូត​ដល់​ស្លាប់។

ករណី​នេះ​ត្រូវ​បាន​សាលា​ដំបូង​រាជធានី​បើក​សវនាការ​ជំនុំ​ជម្រះ​និង​សម្រេច​ផ្តន្ទាទោស ផល្លី ផល្លា ដាក់​ពន្ធនាគារ ១២​ឆ្នាំ ដោយ​កែប្រែ​ពី​បទ​ឃាតកម្ម​គិត​ទុក​ជា​មុន​តាម​មាត្រា ២០០ មក​ជា​បទ​ឃាតកម្ម​តាម​មាត្រា ១៩៩ នៃ​ក្រម​ព្រហ្មទណ្ឌ និង​បទ​មិន​រាង​ចាល​តាម​មាត្រា​មួយ​ចំនួន​នៃ​ក្រម​ព្រហ្មទណ្ឌ​កម្ពុជា។

ក្នុង​សវនាការ​ឧទ្ធរណ៍​នា​ពេល​កន្លង​មក ផល្លី ផល្លា បាន​ប្រាប់​ថា នៅ​ពេល​នោះ​ជន​រងគ្រោះ​មាន​គ្នា ២​នាក់ ហើយ​គាត់​គ្រាន់​តែ​ការពារ​ខ្លួន​ដោយ​ជ្រុល​ដៃ​ក៏​វាយ​ជន​រងគ្រោះ​ស្លាប់។ ខ្ញុំ​វាយ​ជើង​ពេល​ដួល​ក៏​វាយ​បន្ថែម​រហូត​ដល់​ស្លាប់ ខ្ញុំ​ធ្លាប់​ជាប់​គុក​ម្តង​ពី​បទ​លួច​គាស់​ផ្ទះ​គេ។

ផល្លា និយាយ​ថា៖ «ខ្ញុំ​ពិត​ជា​បាន​វាយ​សម្លាប់​ជន​រងគ្រោះ​មែន ហើយ​ការ​ប្តឹង​ឧទ្ធរណ៍​សុំ​ឲ្យ​បន្ធូរ​បន្ថយ​ទោស»។

លោក គិន វិបុល មេធាវី​ការពារ​ជន​ជាប់​ចោទ​បាន​ថ្លែង​ថា កូន​ក្តី​លោក​ជាប់​ចោទ​ពី បទ​ឃាតកម្ម​និង​បទ​មិន​រាង​ចាល​តែ​កូន​ក្តី​លោក​បាន​ទទួល​ស្គាល់​ថា ខ្លួន​បាន​ប្រព្រឹត្ត​កំហុស ហើយ​កូន​ក្តី​លោក​ក៏​ធ្លាប់​ជាប់​ពន្ធនាគារ ២​ឆ្នាំ ៦​ខែ ពី​បទ​គាស់​ផ្ទះ​គេ គាត់​ប្តឹង​ឧទ្ធរណ៍​ដើម្បី​សុំ​ឲ្យ​តុលាការ​បន្ធូរ​បន្ថយ​ទោស និង​ទទួល​បាន​នូវ​ស្ថាន​សម្រាល​តែ​ប៉ុណ្ណោះ៕

អត្ថបទគួរចាប់អារម្មណ៍