The Phnom Penh Post Search

Search form




Logo of Phnom Penh Post newspaper Phnom Penh Post - ឧទ្ធរណ៍​នឹង​សម្រេច​បត្យាប័ន​សេដ្ឋី​រុស្ស៊ី​នៅ​ថ្ងៃ​ចនុ្ទ

ឧទ្ធរណ៍​នឹង​សម្រេច​បត្យាប័ន​សេដ្ឋី​រុស្ស៊ី​នៅ​ថ្ងៃ​ចនុ្ទ

ឧទ្ធរណ៍​នឹង​សម្រេច​បត្យាប័ន​សេដ្ឋី​រុស្ស៊ី​នៅ​ថ្ងៃ​ចនុ្ទ

140110_09a
សេដ្ឋីរុស្ស៊ីលោក Polonsky ចូលខ្លួនដើម្បីបំភ្លឺនៅសាលាឧទ្ធរណ៍កាលពីម្សិលមិញ ហេង ជីវ័ន

ភ្នំពេញៈ មហា​សេដ្ឋី​រុស្ស៊ី​ខាង​អចលន​ទ្រព្យ​ឈ្មោះ Sergei Polonsky កាល​ពី​ថ្ងៃ​ព្រហស្បតិ៍​បាន​ទៅ​បង្ហាញ​នៅ​សាលា​ឧទ្ធរណ៍​សម្រាប់​សវនាការ​ធ្វើ​បត្យាប័ន​ដែល​ការ​សម្រេច​របស់​តុលាការ​នេះ​នឹង​ត្រូវ​បាន​ប្រកាស​នៅ​ថ្ងៃ​ចន្ទ​សប្ដាហ៍​ក្រោយ។

នៅ​ក្នុង​សវនាការ​បិទ​ទ្វារ​រយៈ​ពេល​ជិត​ពីរ​ម៉ោង​លោក Polonsky ដែល​ពាក់​អាវ​ធំ និង​អម​ដោយ​ក្រុម​ប្រឹក្សា​ការពារ​ក្ដី​ចំនួន​បី​រូប និង​មិត្តភក្តិ​ជនជាតិ​រុស្ស៊ី​មួយ​ចំនួន​របស់​គាត់​នោះ​បាន​ដើរ​ចេញ​ពី​រថយន្ត​នគរបាល​ឆ្ពោះ​ទៅ​កាន់​បន្ទប់​តុលាការ។

ព្រះ​រាជអាជ្ញា​រង​សាលា​ឧទ្ធរណ៍ លោក ហ៊ាន រិទ្ធិ បាន​ប្រាប់​កាសែត ភ្នំពេញ ប៉ុស្តិ៍ បន្ទាប់​ពី​សវនាការ​នេះ​ថា ក្រុម​ប្រឹក្សា​ចៅក្រម​នឹង​ប្រកាស​ការ​សម្រេច​នេះ​នៅ​ថ្ងៃ ទី១៣ ខែ មករា។

លោក បែន សុនសម័យ មេធាវី​ការពារ​ក្ដី​មួយ​រូប​របស់​លោក Polonsky បាន​ថ្លែង​នៅ​ក្រៅ​បន្ទប់​តុលាការ​ថា ប៉ូលិស​រុស្ស៊ី​បាន​ដាក់​ការ​ចោទ​ប្រកាន់​លើ​ឈ្មោះ Polonsky គឺ​មិន​មែន​តុលាការ​ទេ ហើយ​អះអាង​ថា Polonsky មិន​បាន​ធ្វើ​អ្វី​មួយ​ខុស​នៅ​រុស្ស៊ី​ទេ។

លោក​មាន​ប្រសាសន៍​ថា៖ «គាត់​មិន​បាន​ប្រព្រឹត្ត​បទ​ឧក្រិដ្ឋ​ណា​មួយ​ទេ វា​ជា​ការ​សង្ស័យ​របស់​ប៉ូលិស ហើយ​គាត់​មិន​មែន​ជា​ឧក្រិដ្ឋជន​ទេ។ គាត់​ជា​វិនិយោគិន​ម្នាក់ ហើយ​ក៏​គ្មាន​អតិថិជន​ណា​ដាក់​ពាក្យ​ប្ដឹង​គាត់​ឡើយ»។

លោក​បាន​បន្ត​ថា៖ «តុលាការ​រុស្ស៊ី​មិន​ចោទ​ប្រកាន់​ទេ តែ​ប៉ូលិស​ជា​អ្នក​ចោទ​ប្រកាន់ ហើយ​វា​ជា​ការ​កាច់​កុង​គ្នា។ យើង​ចង់​ឲ្យ​គាត់​ស្នាក់នៅ​កម្ពុជា​ដើម្បី​ធ្វើ​ការ​បណ្ដាក់​ទុន​ចំនួន មួយ​ពាន់​លាន​ដុល្លារ​អភិវឌ្ឍ​នៅ​លើ​កោះ​ចំនួន ៨»។

លោក Polonsky ដែល​ជា​ម្ចាស់​កោះ ដែក​គោល នៅ​សមុទ្រ ក្រុង ព្រះ​សីហនុ បាន​និយាយ ថា គាត់​ត្រូវ​បាន​អាជ្ញាធរ​កម្ពុជា​ចាប់​ខ្លួន​កាល​ពី​ដើម​ឆ្នាំ​មុន​បន្ទាប់​ពី​គាត់​បាន​ប្រើ​អំពើ​ហិង្សា​ទៅ​លើ​អ្នក​បើក​ទូក​ចំនួន ៦នាក់។ គាត់​ត្រូវ​បាន​តុលាការ​ធ្វើ​ការ​ចោទ​ប្រកាន់​ពីបទ​ប្រើ​អំពើ​ហិង្សា​ដោយ​ចេតនា និង​ការ​ឃុំ​ខ្លួន​ខុស​ច្បាប់។

តុលាការ​បាន​ដោះលែង​គាត់​ឲ្យ​នៅ ក្រៅ​ឃុំ​បន្ទាប់​ពី​បាន​ជាប់​គុក​រយៈ​ពេល​ពីរ​បី​ខែ ហើយ​បាន​ចាប់​ខ្លួន​គាត់​ម្ដង​ទៀត​បន្ទាប់​ពី​អាជ្ញាធរ​រុស្ស៊ី​បាន​ស្នើ​ឲ្យ​ធ្វើ​បត្យាប័ន​រូប​គាត់។

ចៅក្រម​តុលាការ​ខេត្ត ព្រះ​សីហនុ លោក ស្វាយ តុញ បាន​មាន​ប្រសាសន៍​ថា លោក​មិន​ទាន់​បាន​កំណត់​កាលបរិច្ឆេទ​សម្រាប់​សវនាការ​នៃ​ករណី​របស់​លោក Polonsky នៅ​ឡើយ​ទេ ព្រោះ​លោក​រវល់​រឿង​ក្ដី​ជាច្រើន​នៅ​ក្នុង​ដៃ។

លោក​ចៅក្រម ស្វាយ តុញ​បាន​ថ្លែង​ថា៖ «ខ្ញុំ​ទើប​តែ​បាន​ទទួល​ករណី​មួយ​នេះ​ពី​ប្រធាន​តុលាការ​ដូច្នេះ​ខ្ញុំ នឹង​ត្រូវ​ពិនិត្យ​មើល​ជា​មុន​សិន»៕ PN

អត្ថបទគួរចាប់អារម្មណ៍