The Phnom Penh Post Search

Search form




Logo of Phnom Penh Post newspaper Phnom Penh Post - ឪពុក​ម្តាយ ថោង សារ៉ាត់ ត្រូវ​តុលាការ​ចាប់​ឃុំ​នៅ​ពន្ធនាគារ​វិញ

ឪពុក​ម្តាយ ថោង សារ៉ាត់ ត្រូវ​តុលាការ​ចាប់​ឃុំ​នៅ​ពន្ធនាគារ​វិញ

ឪពុក ម្ដាយ ថោង សារ៉ាត់ ត្រូវ​បាន​ចាប់​បញ្ជូន​មក​សាលា​ដំបូង​រាជធានី​ភ្នំពេញ​វិញ កាល​ពី​ថ្ងៃ​ម្សិល​មិញ បន្ទាប់​ពី​ព្យាយាម​ចេញ​ទៅ​ប្រទេស​វៀតណាម។
ឪពុក ម្ដាយ ថោង សារ៉ាត់ ត្រូវ​បាន​ចាប់​បញ្ជូន​មក​សាលា​ដំបូង​រាជធានី​ភ្នំពេញ​វិញ កាល​ពី​ថ្ងៃ​ម្សិល​មិញ បន្ទាប់​ពី​ព្យាយាម​ចេញ​ទៅ​ប្រទេស​វៀតណាម។ ហេង ជីវ័ន

ឪពុក​ម្តាយ ថោង សារ៉ាត់ ត្រូវ​តុលាការ​ចាប់​ឃុំ​នៅ​ពន្ធនាគារ​វិញ

ភ្នំពេញៈ ចៅក្រម​សាលា​ដំបូង​រាជធានី​ភ្នំពេញ បាន​សម្រេច​បញ្ជូន​ខ្លួន ឪពុក​ម្តាយ​លោក​ឧកញ៉ា ថោង សារ៉ាត់ ដែល​រង​ការ​ចោទ​ពីបទ​រក្សា​អាវុធ​ខុស​ច្បាប់​ទៅ​ឃុំ​ក្នុង​ពន្ធនាគារ​ព្រៃ​ស​វិញ បន្ទាប់ពី​រក​ឃើញ​ថា អ្នក​ទាំង​ពីរ​បំពាន​លើ​កាតព្វកិច្ច​នៃ​ការដាក់​ឲ្យ​នៅ​ក្រោម​ការ​ពិនិត្យ​របស់​តុលាការ​នៅ​ក្រៅ​ឃុំ។

លោក ថោង ចំរើន និង​អ្នក​ស្រី កែវ សារី ត្រូវ​ជា​ឪពុក​ម្តាយ​លោក ឧកញ៉ា ថោង សារ៉ាត់ ត្រូវ​ប៉ូលិស​ឃាត់​ខ្លួន នៅ​ម៉ោង ១០ យប់ ថ្ងៃ ទី១៥ ខែ​កុម្ភៈ នៅ​ត្រើយ​ខាង​កើត​នៃ​កំពង់​ចម្លង​អ្នក​លឿង ម្តុំ​ស្ពាន​ស្ទឹង​ស្លូត ក្នុង ស្រុក​ពាមរក៍ ខេត្ត​ព្រៃវែង ខណៈ​ដែល​អ្នក​ទាំង​ពីរ​និង​មនុស្ស​មួយ​ចំនួន​ធ្វើ​ដំណើរ​ក្នុង​រថយន្ត​ពេទ្យ​សាមុយ ដើម្បី​ឆ្លងដែន​ទៅ​ព្យាបាល​ជំងឺ​នៅ​ឯ​ប្រទេស​វៀតណាម។

ជន​ជាប់​ចោទ​ទាំង​ពីរ ត្រូវ​បញ្ជូន​ខ្លួន​មក​សាកសួរ​នៅ​សាលា​ដំបូង​រាជធានី​នៅ​ម៉ោង ១០ ព្រឹក​ខណៈ​ដែល​លោក ថោង ចំរើន ត្រូវ​បាន​គេ​មើល​ថា សុខភាព​ខ្សោយ​ខ្លាំង​ហើយ​ការ​សាក​សួរ​ត្រូវ​បាន​បញ្ចប់​នៅ​ម៉ោង ១២:៣០ នាទី​រសៀល។ យ៉ាង​ណា​ក៏​ជន​ជាប់​ចោទ​ទាំង​ពីរ មិន​បាន​ឆ្លើយ​នឹង​សំណួរ​របស់​អ្នក​យក​ព័ត៌មាន​នៅ​ទី​នោះ​ទេ។

លោក​ចៅក្រម លី សុខលេង បដិសេធ​អធិប្បាយ​ដោយ​អះអាង​ថា ជាប់​រវល់។ ប៉ុន្តែ តាម​ដីកា​បង្គាប់​ឲ្យ​ឃុំ​ខ្លួន​ដែល​ធ្វើ​ឡើង​នៅ​ថ្ងៃ ទី១៦ ខែ​កុម្ភៈ នេះ លោក​ចៅក្រម​បាន​បង្គាប់​ឲ្យ​សមត្ថកិច្ច​នៃ​កម្លាំង​សាធារណៈ​នាំ​ខ្លួន លោក ថោង ចំរើន និង​អ្នក​ស្រី កែវ សារី ទៅ​ពន្ធនាគារ​ឬ​មណ្ឌល​កែប្រែ «ម១» និង​បង្គាប់​ឲ្យ​ប្រធាន​ពន្ធនាគារ ទទួល​ឃុំ​ខ្លួន​រហូត​ដល់​មាន​បទ​បញ្ជា​ថ្មី។

ព្រះ​រាជអាជ្ញា​អម​សាលា​ដំបូង កញ្ញា វ៉ា សក្តា បាន​ឲ្យ​ដឹង​ថា ការ​សម្រេច​នេះ គឺ​មក​ពី​ជន​ជាប់​ចោទ​បំពាន​លើ​កាតព្វកិច្ច​ខ្លួន៖ «គាត់ (ថោង ចំរើន និង កែវ សារី) បាន​បំពាន​លើ​កាតព្វកិច្ច​ដែល​ចៅក្រម​បង្គាប់ គាត់​ជាប់​កាតព្វកិច្ច​ក្រោម​ការ​ត្រួត​ពិនិត្យ​នៅ​ក្រៅ​ឃុំ ប៉ុន្តែ គាត់​អត់​អនុវត្ត​តាម​គឺ​ដោយ​សារ​ពាក់ព័ន្ធ​ចំណុច​ហ្នឹង»។

ឪពុក​ម្តាយ​លោក ថោង សារ៉ាត់ ពេល​នាំ​ខ្លួន​មក​តុលាការ។
ឪពុក​ម្តាយ​លោក ថោង សារ៉ាត់ ពេល​នាំ​ខ្លួន​មក​តុលាការ។ ហេង ជីវ័ន

លោក ស៊ី សត្យា មេធាវី​ការពារ​ក្តី បាន​ឲ្យ​ដឹង​ថា ដំបូង​កូន​ក្តី​លោក មាន​បំណង​ធ្វើ​ដំណើរ​ទៅ​ព្យាបាល​ជំងឺ (លោក ថោង ចំរើន) នៅ​ប្រទេស​វៀតណាម មែន ប៉ុន្តែ​បាន​សម្រេច​បក​ក្រោយ​វិញ បន្ទាប់​ពី​បង​ប្អូន​ទាក់ទង​និង​រៀបចំ​បន្ទប់​ព្យាបាល​នៅ​មន្ទីរពេទ្យ​កាល់ម៉ែត​នៅ​ភ្នំពេញ។ លោក​ថា៖ «ពេល​ឃាត់​ខ្លួន គឺ​គាត់​ត្រឡប់​មក​វិញ​ហើយ ដោយ​សារ​បង​ប្អូន​គាត់​ថា នៅ​កាល់ម៉ែត ក៏​គេ​អាច​ព្យាបាល​ឲ្យ​បាន​ដែរ​ទៅ​លើ​ស្ថានភាព​សុខភាព​គាត់ បើ​បន្ត​ឃុំ ឬ​ពន្យារ​ពេល​សវនាការ​ទៀត គាត់​អាច​នឹង​ស្លាប់​បាន»។

បើ​តាម​បុគ្គលិក​ផ្នែក​ទីផ្សារ​នៃ​ក្រុមហ៊ុន​បុរី ៩៩៩ កញ្ញា វ៉ាន់ សុធារ៉ា លោក ថោង ចំរើន មាន​ជំងឺ​បេះដូង ថ្លើម និង​ជំងឺ​លើស​ឈាម​យូរ​មក​ហើយ ដែល​ជា​ញឹក​ញាប់​គាត់​ត្រូវ​ទៅ​ពិនិត្យ​សុខភាព នៅ​ប្រទេស​វៀតណាម ដោយ​គ្រូ​ពេទ្យ​ប្រចាំ​កាយ។

ចំណែក​លោក​មេធាវី ម៉ន កែវ​សុវិន ឲ្យ​ដឹង​ដែរ​ថា ក្រុម​មេធាវី​លោក​មិន​បាន​ដឹង​ពី​ការ​ចេញ​ដំណើរ​របស់​កូន​ក្តី​ទៅ​កាន់​ប្រទេស​វៀតណាម កាល​ពី​យប់​ថ្ងៃ​អាទិត្យ​នោះ​ទេ ខណៈ​កំពុង​រៀបចំ​ដាក់​ពាក្យ​ស្នើ​ឲ្យ​កូន​ក្តី​ទៅ​ព្យាបាល​នៅ​វៀតណាម នៅ​ព្រឹក​ថ្ងៃ​ចន្ទ។

លោក​បន្ត​ថា៖ «យើង​អត់​បាន​ដឹង​ថា ពួក​គាត់​ចេញ​ទៅ​ទេ ដល់​ពេល​ចាប់​ខ្លួន​បាន​នៅ​យប់​ម៉ោង ១០ ទើប​ដឹង ដល់​អ៊ីចឹង គម្រោង​ដាក់​ពាក្យ​ស្នើ​ទៅ​ព្យាបាល​នេះ​ត្រូវ​ផ្អាក តែ​យ៉ាង​ណា​ក៏​យើង​នឹង​ពិនិត្យ​ស្នើ​នៅ​ក្រៅ​ឃុំ​ម្តង​ទៀត និង​សុំ​ទៅ​ព្យាបាល​ជំងឺ​នៅ​វៀតណាម»។

កាល​ពី​ថ្ងៃ ទី៧ ខែ​កុម្ភៈ លោក ថោង ចំរើន និង​អ្នក​ស្រី កែវ សារី ត្រូវ​បាន​ដោះ​លែង​ឲ្យ​នៅ​ក្រៅ​ឃុំ​ជា​បណ្តោះ​អាសន្ន ស្ថិត​ក្រោម​ការ​ត្រួត​ពិនិត្យ​របស់​តុលាការ ដោយ​សំអាង​ហេតុ​បញ្ហា​សុខភាព បន្ទាប់​ពី​អ្នក​ទាំង​ពីរ ត្រូវ​តុលាការ​សម្រេច​ឃុំ​ខ្លួន​ចោទ​ពីបទ​រក្សា​អាវុធ​ខុស​ច្បាប់​កាលពី​ថ្ងៃ ទី៧ ខែ​ធ្នូ ឆ្នាំ​២០១៤ ចំណែក​កូន​ប្រុស​គឺ​លោក ថោង សារ៉ាត់ ដែល​កំពុង​លាក់​ខ្លួន និង​អង្គរក្ស​មួយ​ចំនួន រង​ការ​ចោទ​ពីបទ​ឃាតកម្ម​គិត​ទុក​ជា​មុន ពាក់ព័ន្ធ​ទៅ​នឹង​ការ​បាញ់​សម្លាប់​លោក​ឧកញ៉ា អ៊ឹង ម៉េងជឺ កាល​ពី​ថ្ងៃ ទី២២ ខែ​វិច្ឆិកា ឆ្នាំ​២០១៤។

ជុំវិញ​ចំណាត់​ការ​របស់​តុលាការ​ជា​ថ្មី​នេះ ត្រូវ​បាន​សាធារណជន​មួយ​ចំនួន មើល​ឃើញ​ថា បាន​ធ្វើ​ឡើង​ដោយ​សារ​តែ​រង​ការ​រិះគន់​ចំៗ របស់​លោក ស ខេង រដ្ឋ​មន្ត្រី​ក្រសួង​មហាផ្ទៃ​កាលពី​ថ្ងៃ ទី១២ ខែ​កុម្ភៈ មុន​នេះ ទៅ​លើ​ស្ថាប័ន​តុលាការ ដែល​ជា​ញឹក​ញាប់​បាន​ដោះលែង​អ្នក​ទោស បើ​ទោះ​ជា​សមត្ថកិច្ច រក​ឃើញ​ភ័ស្តុតាង​ដាក់​បន្ទុក​គ្រប់​គ្រាន់​យ៉ាង​ណា​ក្តី៕

អត្ថបទគួរចាប់អារម្មណ៍