The Phnom Penh Post Search

Search form

Logo of Phnom Penh Post newspaper Phnom Penh Post - ឪពុក​មា​កាប់​ត្រី​ទៅ​ត្រូវ​ដៃ​ក្មួយ​ដាច់​ត្រឹម​ក​ដៃ




ឪពុក​មា​កាប់​ត្រី​ទៅ​ត្រូវ​ដៃ​ក្មួយ​ដាច់​ត្រឹម​ក​ដៃ

ឪពុក​មា​កាប់​ត្រី​ទៅ​ត្រូវ​ដៃ​ក្មួយ​ដាច់​ត្រឹម​ក​ដៃ

កំពង់ឆ្នាំងៈ កុមារា​ម្នាក់​ត្រូវ​ពូជី​ដូន​មួយ​កាប់​នឹង​កាំបិត​ក​កុក​ដាច់​ដៃ ឆ្វេង​ត្រឹម​ក​ដៃ ​ខណៈ​នាំ​គ្នា​ទៅ​រក​ចាប់​ត្រី​ក្នុង​បឹង ហើយ​ក្មេង​រងគ្រោះ​បាន​លូក​ដៃ​រាវ​ទៅ​ចាប់​ត្រី​ព្រម​គ្នា​ជាមួយ​ពូ​ដែល ​កាប់​ត្រី​នោះ​ដែរ​នឹង​កាំបិត​កកុក​ក៏​ត្រូវ​ដាច់​ដៃ​ក្មេង​រងគ្រោះ​តែ​ម្តង។

សមត្ថកិច្ច​មូល​ដ្ឋាន​ប្រាប់​ថា ហេតុ​ការណ៍​នេះ​កើត​ឡើង​ថ្ងៃទី៧ ខែមេ​សា ​នៅ​ភូមិ​ពាម​ពពេច ​ឃុំ​កោះ​ថ្កូវ​ ស្រុក​ជល​គិរី​ ខេ​ត្ត​កំពង់ឆ្នាំង​ ភ្លាម​ៗ​នោះ កុមារា​រង​គ្រោះ​ត្រូវ​ក្រុម​គ្រួសារ​ដឹក​ទៅ​រក​ការ​សង្គ្រោះ​មន្ទីរ​ពេទ្យ​ខេត្ត​កំពង់​ឆ្នាំង។

លោក មុំ ហុន អធិការ​នគរបាល​ស្រុក​ជល​គិរី​បាន​ឲ្យដឹង​ថា ក្មេង​រងគ្រោះ​កំពុង​តែ​សម្រាក​ព្យាបាល​នៅ​មន្ទីរ​ពេទ្យ​បង្អែក​ខេត្ត​កំពង់ឆ្នាំង​ដោយសារ​តែ​រងគ្រោះ ត្រូវ​ឪពុក​មា​កាប់​នឹង​កាំបិត​កកុក​ដាច់​ត្រឹម​កដៃ ក្នុង​ពេល​ទៅ​រក​ចាប់​ត្រី​ជាមួយ​គ្នា ខណៈ​ក្មេង​រង​គ្រោះ​ឃើញ​ត្រី​បាន​លូក​ដៃ​ទៅ​ចាប់ តែ​ត្រូវ​ឪពុកមា​ក៏​កាប់ត្រី​នោះ​ដែរ​ព្រមគ្នា បណ្តាល​ឲ្យ​ដាច់​ដៃ​ឆ្វេង​ត្រឹម​កដៃ​តែម្តង។

លោកអធិការ​នគរបាល​ប្រាប់ថា៖ «ខ្ញុំ​មិន​ដឹង​ថា ខាង​គ្រួសារ​អ្នក​បង្ក​គេ​ចេញ​សំណង​ឲ្យ​ខាង​ក្មេង​រង​គ្រោះ​ប៉ុន្មាន​ទេ តែ​តាម​កំណត់​ហេតុ គឺ​ភាគី​ខាង​អ្នក​បង្ក​បាន​ជួយ​ស្ទុះ​ស្ទា​នាំ​យក​ក្មេង​រង​គ្រោះ​ទៅ​មន្ទីរ​ពេទ្យ​ជាមួយ​នឹង​ក្រុម​គ្រួសារ​ក្មេង​រងគ្រោះ​ផង​ដែរ»។

លោក មុំ ហុន បាន​ប្រាប់​ដែរថា មុន​កើត​ហេតុ​ប្រជាជន​ក្នុង​ភូមិ​មាន​ក្មេង​ចាស់​បាន​នាំគ្នា​ទៅ​ចាប់ ត្រី​ក្នុង​បឹង​ឆ្នុក​អណ្តែង ដែល​មាន​ចម្ងាយ​ជិត​៥​គីឡូ​ម៉ែត្រ​ពីភូមិ នៅ​ក្នុង​ភូមិ​ពាម​ពពេច ​ឃុំ​កោះ​ថ្កូវ ស្រុក​ជល​គិរី ខេត្ត​កំពង់​ឆ្នាំង ដោយ​នាំ​គ្នា​ចុះរាវ​ចាប់​ត្រី​នៅ​ជាយៗ​បឹង​និង​មាន​ត្រែង​ដុះ​ច្រើន​ផង ហើយ​គ្រោះ​ថ្នាក់​កាប់​ត្រូវ​គ្នា​នោះ គឺ​ដោយសារ​តែ​បាំង​ដើម​ត្រែង​នេះ​ឯង។

លោក ឲ្យដឹង​បន្ត​ថា ក្មេង​រងគ្រោះមាន​ឈ្មោះ​ ឈុំ​ សុខ​លី អាយុ​១០​ឆ្នាំ ឯឪពុក​មា​អ្នក​បង្ក​ឈ្មោះ វេត ណាត អាយុ​៤៤​ឆ្នាំ ទាំង​២នាក់​រស់​នៅ ភូមិ​-ឃុំ​កើត​ហេតុ​ខាង​លើ​ត្រូវ​ជា​ក្មួយ​ជីដូន​មួយ​ជាមួយ​អ្នក​បង្ក។ ក្រោយ​ពី​ដឹងថា​ខ្លួន​កាប់​ត្រូវ​ក្មួយ​ភ្លាម ក៏​ងងឹត​មុខ​ដួល​សន្លប់​ក្នុង​ទឹក​ហើយ​ទាំង​អ្នក​បង្ក ទាំង​ក្មេង​រងគ្រោះ​ត្រូវ​បាន​គេ​ដឹក​តាម​ទូក​និង​បន្ត​ទៅ​មន្ទីរពេទ្យ ខេត្ត។

ក្រុមគ្រួសារ​កុមារារង​គ្រោះ មិន​អាច​ទាក់​ទង​​សុំ​ការ​បញ្ជាក់​បាន​ទេ៕

អត្ថបទគួរចាប់អារម្មណ៍