The Phnom Penh Post Search

Search form




Logo of Phnom Penh Post newspaper Phnom Penh Post - ៣ នាក់​ត្រូវ​ឧទ្ធរណ៍​តម្កល់​ទោស ៥ ឆ្នាំ​ពី​បទ​ជួញ​ថ្នាំ​ញៀន

៣ នាក់​ត្រូវ​ឧទ្ធរណ៍​តម្កល់​ទោស ៥ ឆ្នាំ​ពី​បទ​ជួញ​ថ្នាំ​ញៀន

៣ នាក់​ត្រូវ​ឧទ្ធរណ៍​តម្កល់​ទោស ៥ ឆ្នាំ​ពី​បទ​ជួញ​ថ្នាំ​ញៀន

130821_09a
គ្រាប់ថ្នាំញៀនជាច្រើនប្រភេទដែលសមត្ថកិច្ចរាជធានីភ្នំពេញចាប់បានកាលពីពេលកន្លងមក ម៉េង គីមឡុង

ភំ្នពេញៈ សាលា​ឧទ្ធរណ៍ កាល​ពី​ម្សិលមិញ បាន​សម្រេច​តម្កល់​សាលក្រម​សាលា​ដំបូង​រាជធានី ដែល​បាន​ផ្តន្ទាទោស​អតីត​គ្រូ​បង្រៀន​ម្នាក់ និង​គូកន ២ នាក់ ឲ្យ​ជាប់​ទោស​ម្នាក់ៗ ៥ ឆ្នាំ ក្រោម​ការ​ចោទ​ប្រកាន់​ពី​បទ​ជួញ​ដូរ​គ្រឿង​ញៀន​ក្នុង​ឆ្នាំ ២០១១។

ប្រធាន ក្រុម​ប្រឹក្សា​ជំនុំ​ជម្រះ​សាលា​ឧទ្ធរណ៍ លោក អ៊ុំ សារិទ្ធ បាន​ថ្លែង​ថា សាលា​ឧទ្ធរណ៍​បាន​សម្រេច​តម្កល់​សាលក្រម​សាលា​ដំបូង​រាជធានី​ដែល បាន​ផ្តន្ទាទោស​លោក សំ ស៊ីណា ហៅ ពៅ (ប្រុស) អាយុ ៥២ ឆ្នាំ​អតីត​ជា​គ្រូ​បង្រៀន នៅ​ខេត្ត បាត់ដំបង ឈុំ វាសនា ហៅ ទូច (ប្រុស) អាយុ ២៨ ឆ្នាំ និង មឿន លក្ខណា ហៅ ក្តាម (ស្រី) អាយុ ២១ ឆ្នាំ កម្មករ​រោងចក្រ ជាប់​ចោទ​ពី​បទ ជួញ​ដូរ​គ្រឿង​ញៀន ទុក​ជា​បាន​ការ​ដដែល​។

លោក អ៊ុំ សារិទ្ធ បន្ត​ថា៖ «សាលា​ឧទ្ធរណ៍​បាន​សម្រេច​តម្កល់​សាលក្រម​សាលា​ដំបូង​ទុក​នៅ​ដដែល និង​បន្ត​ឃុំ​ខ្លួន​ជន​ជាប់​ចោទ​តាម​នីតិវិធី ហើយ​បើក​សិទ្ធិ​ប្តឹង​សារ​ទុក្ខ ទៅ​តុលាការ​កំពូល តាម​កំណត់​ច្បាប់»។

តាម អង្គហេតុ នៅ​ថ្ងៃ​ទី២៨ ខែ ធ្នូ ឆ្នាំ ២០១១ សមត្ថកិច្ច បាន​ឃាត់​ខ្លួន ឈុំ វាសនា នៅ​ក្នុង​សង្កាត់ ផ្សារ​ថ្មី​ទី ១ ខណ្ឌ ដូនពេញ រឹប​អូស​បាន​ថ្នាំ​ញៀន​ក្រាម​ពណ៌​ស ៣៦ កញ្ចប់​តូច។ បន្ទាប់​ពី​ចាប់​ខ្លួន​វាសនា សមត្ថកិច្ច​ឈាន​ដល់​ចាប់​ខ្លួន សំ ស៊ីណា ហៅ ពៅ និង មឿន លក្ខណា ហៅ ក្តាម នៅ​ផ្ទះ​សំណាក់ ស៊ីយុង បន្ទប់​លេខ ៨ ក្នុង​ខណ្ឌ សែនសុខ ដក​ហូត​បាន​ថ្នាំ​ញៀន​ក្រាម​ពណ៌ ស ៩ កញ្ចប់​តូច និង​ប្រភេទ WY ១០ គ្រាប់ ជញ្ជីង ១ ឧបករណ៍​ថ្នាំ​ញៀន​មួយ​ចំនួន​ទៀត និង​លុយ​រៀល​ជាង​មួយ​លាន​រៀល ពី​បន្ទប់​លេខ ៤ និង​លេខ ៨។

យោង​តាម​សាលក្រម​សាលា​ដំបូង​រាជធានី ចុះ​ថ្ងៃ​ទី ២៦ ខែ ធ្នូ ឆ្នាំ ២០១២ ជន​ជាប់​ចោទ ត្រូវ​បាន​ផ្តន្ទាទោស ដាក់​ពន្ធនាគារ ម្នាក់ៗ ៥ ឆ្នាំ និង​ពិន័យ​ជា​ប្រាក់ ១០ លាន​រៀល ពី​បទ​ជួញ​ដូរ​ថ្នាំ​ញៀន តាម​មាត្រា ៣៣ ថ្មី នៃ​ច្បាប់​ថ្នាំ​ញៀន។

នៅ​ក្នុង​សវនាការ ឧទ្ធរណ៍​នា​ពេល​កន្លង​មក សំ ស៊ីណា បាន​ប្រាប់​តុលាការ​ថា ខ្លួន​មាន​ថ្នាំ​ញៀន​តែ​នៅ​ក្នុង​បន្ទប់​លេខ ៨ ប៉ុណ្ណោះ​។

ស៊ីណា បញ្ជាក់​ថា៖ «ថ្នាំ​ញៀន​នៅ​ក្នុង​បន្ទប់​លេខ ៤ មិន​មែន​ជា​របស់​ខ្ញុំ​ទេ តែ​សមត្ថកិច្ច​បែរ​យក​មក​បូក​ដាក់​បន្ទុក​លើ​ខ្ញុំ​។ ថ្នាំ​ញៀន​បូក​ដាក់​បន្ទុក​លើ​ខ្ញុំ ចុះ​លុយ ២ ម៉ឺន ១ ពាន់​ដុល្លារ និង ៥ លាន​រៀល​ទៀត ម៉េច​មិន​បូក​ទម្លាក់​ឲ្យ​ខ្ញុំ​ផង។ អ្នក​ជួល​បន្ទប់​លេខ ៤ មាន​គ្នា ៥ នាក់ ថែម​ទាំង​មាន​រូបថត​ទៀត តែ​សមត្ថកិច្ច​មិន​បាន​យក​មក​កាត់​ទោស​ទេ»។

ជន​ជាប់​ចោទ​រូប​នេះ​បាន​បន្ត​ថា៖ «ខណៈ​ឆែកឆេរ​បន្ទប់​នោះ​មិន​មាន​ព្រះ​រាជអាជ្ញា​ចូល​រួម​ទេ ហើយ​សមត្ថកិច្ច​បាន​យក​លុយ​នោះ​ចែក​គ្នា​នៅ​ចំពោះ​មុខ​ខ្ញុំ»។

យ៉ាង​ណា​ក្តី ឈុំ វាសនា បាន​សារភាព​ថា ខ្លួន​បាន​ទិញ​ថ្នាំ​ញៀន​ពី​ឈ្មោះ ធា យក​ទៅ​លក់​បន្ត​ទៀត។ ចំណែក មឿ លក្ខណា បាន​ប្រាប់​ថា នាង​មក​ដេក​ជាមួយ ស៊ីណា ហើយ ស៊ីណា ប្រើ​ឲ្យ​នាង​យក​ថ្នាំ​ញៀន​ទៅ​ឲ្យ​គេ តែ​នាង​មិន​បាន​ដឹង​អី​ទេ។

ប៉ុន្តែ​ចៅក្រម​បញ្ជាក់​ថា៖ «មុន​ដេក​ជាមួយ​គ្នា អ្នក​ឯង ជក់​ថ្នាំ​ញៀន​ជាមួយ​គ្នា​មិន​ត្រូវ​និយាយ​ថា មិន​ដឹង​អី​ទេ»។

លោក ឈាវ ហួលាយ មេធាវី​ការពារ​ជន​ជាប់​ចោទ ថ្លែង​ថា កូន​ក្តី​របស់​លោក ធ្លាប់​ជួល​បន្ទប់​លេខ ៤ ស្នាក់នៅ ក្រោយ​មក​មាន​គេ​មក​ជួល​បន្ត ទើប​គាត់​ទៅ​ជួល​បន្ទប់​លេខ ៨ វិញ។ នៅ​ពេល​សមត្ថកិច្ច​ឆែក ឃើញ​ថ្នាំញៀន បែរ​ជា​យក​មក​ដាក់​បន្ទុក​លើ​កូន​ក្តី​របស់​លោក ដែល​ការ​ធ្វើ​បែប​នេះ​វា​អយុត្តិធម៌​ណាស់។ មាន​រូបថត ៥ នាក់​ទៀត នៅ​កន្លែង​ទទួល​ភ្ញៀវ នៃ​ផ្ទះ​សំណាក់ ជា​អ្នក​ស្នាក់នៅ​បន្ទប់​លេខ ៤ ប៉ុន្តែ​សមត្ថកិច្ច​មិន​បាន​យក​មក​ផ្តន្ទាទោស​ទេ។

លោក​មេធាវី បាន​បន្ត​ទៀត​ថា តំណាង​មហា​អយ្យការ បាន​ស្នើ​សុំ​ឲ្យ​ក្រុម​ប្រឹក្សា​ជំនុំ​ជម្រះ ពន្យារ​ពេល ដើម្បី​កោះ​ហៅ​ម្ចាស់​ផ្ទះ​សំណាក់ និង​សមត្ថកិច្ច​មក​ចូល​រួម​សវនាការ តែ​តុលាការ នៅ​តែ​ប្រកាស​សាលដីកា។ លោក​បាន​បញ្ជាក់​ថា៖ «ខ្ញុំ​មិន​ទាន់​បាន​ជួប​កូន​ក្តី​នៅ​ឡើយ​តែ​ប្រហែល​ជា​ពួក​គាត់​ប្តឹង​សារទុក្ខ»៕

អត្ថបទគួរចាប់អារម្មណ៍