ភ្នំពេញៈ ក្រុមហ៊ុនតូយ៉ូតា (ខេមបូឌា) កាលពីថ្ងៃសៅរ៍ចុងសប្ដាហ៍កន្លងទៅនេះ បានរៀបចំកម្មវិធីប្រកួតប្រជែងថ្នាក់ជាតិ និងពិភពលោក ក្រោមប្រធានបទ «គូរគំនូររថយន្តក្នុងក្ដីស្រមៃសម្រាប់ថ្ងៃអនាគត» នៅបណ្ដោយមហាវិថីសហព័ន្ធរុស្ស៊ី រាជធានីភ្នំពេញ។
ថ្លែងក្នុងកម្មវិធីនោះ លោក គង់ នួន ប្រធានក្រុមហ៊ុន តូយ៉ូតា (ខេមបូឌា) បានឲ្យដឹងពីគោលបំណងនៃការប្រកួតនេះថា៖ «ដើម្បីផ្ដល់ឱកាសឲ្យចៅជំនាន់ក្រោយបានគូរគំនូររថយន្តនៅថ្ងៃអនាគតទៅតាមការស្រមើស្រមៃរបស់ខ្លួន និងជំរុញឲ្យចៅៗមានការចាប់អារម្មណ៍លើបច្ចេកវិទ្យារថយន្ត ក៏ដូចជាលើកកម្ពស់ពីសារៈសំខាន់នៃការស្រមើស្រមៃ»។
លោកថ្លែងទៀតថា៖ «ទាំងនេះគឺជាគោលបំណងរបស់ក្រុមហ៊ុនតូយ៉ូតា ក្នុងការចូលរួមសកម្មភាពសង្គម តាមរយៈការលើកទឹកចិត្តការបង្កើតគំនិតច្នៃប្រឌិតថ្មីៗរបស់កុមារដើម្បីឲ្យសង្គមជាតិកាន់តែមានការរីកចម្រើននិងអភិវឌ្ឍន៍»។
កម្មវិធីប្រកួតគំនូររថយន្តក្នុងក្ដីស្រមៃនេះត្រូវបានផ្ដួចផ្ដើមឡើងតាំងពីឆ្នាំ២០០៤ ដោយក្រុមហ៊ុនតូយ៉ូតាម៉ូទ័រខបភើរេសិន ប្រទេសជប៉ុន ដោយមានការចូលរួមពីសាខាក្រុមហ៊ុនតូយ៉ូតានានាទូទាំងពិភពលោក។
ដោយឡែកសម្រាប់ប្រទេសកម្ពុជា នេះគឺជាលើកទី៣ហើយ ដែលក្រុមហ៊ុនតូយ៉ូតា (ខេមបូឌា) បានផ្ដល់ឱកាសឲ្យកុមារ និងយុវវ័យបានបញ្ចេញសមត្ថភាពផ្នែកច្នៃប្រឌិត គូរចេញនូវរថយន្តក្នុងក្ដីស្រមៃរបស់ខ្លួនលើក្រដាស។
អាយុដែលអាចចូលរួមត្រូវបានបែងចែកជាបីប្រភេទគឺក្រោមអាយុ១០ឆ្នាំ ១០-១២ឆ្នាំ និង១៣-១៥ឆ្នាំ។
ចំពោះកុមារ ឬយុវវ័យដែលមិនបានចូលរួមប្រកួតដោយផ្ទាល់នៅក្រុមហ៊ុនតូយ៉ូតា (ខេមបូឌា) ពួកគេអាចផ្ញើគំនូររថយន្តដែលបានគូរនៅផ្ទះមកចូលរួមប្រកួតឲ្យបានមុនថ្ងៃទី៣១ ខែមករា។
គំនូរដែលទទួលជ័យលាភីថ្នាក់ជាតិ ក្រុមហ៊ុនតូយ៉ូតា (ខេមបូឌា) នឹងធ្វើការប្រកាសនៅខែកុម្ភៈ ហើយបញ្ជូនទៅចូលរួមប្រកួតប្រជែងថ្នាក់ពិភពលោកនៅប្រទេសជប៉ុន។
ចំពោះជ័យលាភីថ្នាក់ពិភពលោកមាន មេដាយមាស មេដាយប្រាក់ មេដាយសំរឹទ្ធ រង្វាន់ចុងក្រោយនិងរង្វាន់ពិសេស។ អ្នកឈ្នះមេដាយនឹងទទួលបានដំណើរទស្សនកិច្ចទៅកាន់ប្រទេសជប៉ុនដើម្បីចូលរួមពិធីប្រគល់រង្វាន់នៅខែសីហា ឆ្នាំ២០១៣ ជាមួយនឹងអាណាព្យាបាលម្នាក់ផងដែរ៕
