ភ្នំពេញ : ក្រោយពីបង្ហាញស្នាដៃច្នៃម៉ូដសម្លៀកបំពាក់ធ្វើពីក្រណាត់សូត្រ ខ្មែរដែលផ្ដួចផ្ដើមចេញពីគំនិតអ្នកច្នៃម៉ូដកូនកាត់វៀតណាម-បារាំង កាលពីឆ្នាំមុន សម្រាប់ឆ្នាំនេះមជ្ឈមណ្ឌលសិល្បៈ និងសិប្បកម្ម Artisans Angkor បានសម្ពោធនូវម៉ូដសម្លៀកបំពាក់ថ្មីៗដែលធ្វើពីសូត្រសុទ្ធ រួមទាំងគ្រឿងអលង្ការ ចាន ប្រអប់ និងគ្រឿងតាំងលម្អដទៃទៀតជាច្រើនសម្រាប់ឆ្នាំ២០១៤ នេះ។
មជ្ឈមណ្ឌលផលិតវត្ថុសិល្បៈពីសូត្រ ថ្ម ចម្លាក់ឈើ និងគំនូរដើម្បីស្វែងរកប្រាក់ចំណូលចូលរួមចំណែកលើកកម្ពស់ និងអភិវឌ្ឍកម្រិតជីវភាពប្រជាជនតាមរយៈការអប់រំនោះបច្ចុប្បន្ន បានផ្ដល់ការងារដល់មនុស្សប្រមាណជា១៣០០នាក់ក្នុងផ្នែករោងជាង សិប្បកម្ម និងច្នៃម៉ូដរបស់ខ្លួន។
ក្នុងឆ្នាំ២០១៤នេះ មជ្ឈមណ្ឌលសិល្បៈ និងសិប្បកម្មនេះបានបង្ហាញនូវផលិតផលថ្មីមានការរួមបញ្ចូល គ្នាពីក្រណាត់សូត្រខ្មែរ និងម្រ័ក្សណ៍ខ្មុកបង្កើតបានជាគ្រឿងអលង្ការជាច្រើនម៉ូដដែលជា ស្នាដៃរបស់បុគ្គលិកខ្មែរខ្មែរទាំងប្រុសទាំងស្រីពិតៗនៅរោងជាង ឯទឹកដីខេត្តសៀមរាប។
គ្រឿងអលង្ការពិសេសដែលមជ្ឈមណ្ឌល Artisans Angkor បានសហការបង្កើតឡើងជាមួយនឹងអ្នកច្នៃម៉ូដបារាំង អេវ វូទីយែរ (Eve Vautier) នោះគឺការជ្រើសរើសម្រ័ក្សណ៍ខ្មុកដែលជាឈើកម្រយកមកច្នៃជា គ្រឿងអលង្ការយ៉ាងភ្លឺរលោងចែងចំាងរំលេចជាមួយនឹងសូត្រខ្មែរ។ អ្វីដែលពិសេសគឺការប្រើសន្លឹកមាសមកបិទពីលើម្រ័ក្សណ៍ខ្មុកឲ្យឃើញ រឹតតែមានភាពទាក់ទាញទៀតផង។
សម្រាប់គ្រឿងដាក់តាំងលំដាប់ខ្ពស់ មានដូចជា រូបតុក្កតាដំរី និងខ្លាឃ្មុំកែច្នៃពីម្រ័ក្សណ៍ខ្មុកដោយមានការបិទនូវសន្លឹក មាសពិតៗពីលើស្នែងដំរី។
ក្រៅពីនេះ មជ្ឈមណ្ឌលសិល្បៈ និងសិប្បកម្ម Artisans Angkor ក៏មានច្នៃម៉ូដសម្លៀកបំពាក់ កាបូបយួរ និងកាបូបដាក់ iPad ដែលត្រូវបានធ្វើឡើងយ៉ាងផ្ចិតផ្ចង់ពីសូត្រខ្មែរដ៏ទន់ល្មើយងាយស្រួលក្នុងការប្រើប្រាស់។
អ្វី ដែលជាផលិតផលថ្មីបំផុតនោះគឺប្រអប់ដាក់ក្រដាសជូតមាត់ ចាន និងប្រអប់ដាក់អាហារ ឬរបស់របរផ្សេងៗដែលត្រូវបានលាបពណ៌ខ្មៅរំលេចផ្សំជាមួយពណ៌ឆើតៗដទៃ ទៀត អមដោយអក្សរឈ្មោះអ្នកផលិតដែលត្រូវបានសរសេរដោយដៃផ្ទាល់ថែមទៀត ផង។ ប្រអប់ និងចានទាំងនោះមានការធានាអាចប្រើប្រាស់ផ្ទុកអាហារដោយមិន ប៉ះពាល់ដល់សុខភាព។
ផលិតផលឆ្នាំថ្មីនេះផ្សេងទៀតរួមមាន ចង្កៀងគឺមានច្រើនទៀតដូចជាចង្កៀងធ្វើពីប្រាក់ដែលមានក្បូរក្បាច់ រចនាញឹកស្មេ ផ្ទាំងរូបភាព និងចម្លាក់ថ្មីៗជាច្រើនទៀតផងដែរ៕
