ភ្នំពេញ : ក្រុមហ៊ុនសូវរិន រីថែល គ្រុប (SOVEREIGN Retail Group) ដែលជាក្រុមហ៊ុននាំចូលម៉ាកផលិតផលម៉ូដសម្លៀកបំពាក់អន្តរជាតិ មួយនៅប្រទេសកម្ពុជា កាលពីថ្ងៃចន្ទ ទី៣០ ខែធ្នូ កន្លងទៅនេះបានរៀបចំសន្និសីទកាសែតមួយ នៅសណ្ឋាគារ Raffles Le Royal ដើម្បីប្រកាសជាផ្លូវការនូវគម្រោងរៀបចំព្រឹត្តិការណ៍បង្ហាញម៉ូដដ៏ធំជាលើកទីពីរ។
បណ្ដា ម៉ូដសម្លៀកបំពាក់អន្តរជាតិជាច្រើនម៉ាកនឹងធ្វើការចូលរួមក្នុង កម្មវិធីបង្ហាញម៉ូដទ្រង់ទ្រាយធំ «ហ្វេសហ្សិន អ៊ីលូមីណេហ្សិន» (Cambodia Fashion Illumination) សម្រាប់រដូវផ្ការីក និងរដូវក្ដៅឆ្នាំ២០១៤ ដែលនឹងប្រព្រឹត្តទៅនៅមជ្ឈមណ្ឌលសន្និបាត និងពិព័រណ៍កោះពេជ្រអគារ ស៊ីធីហល នៅថ្ងៃទី២១ និង២២ ខែកុម្ភៈខាងមុខនេះ។
ក្នុងព្រឹត្តិការណ៍នេះក៏មានការដើរបង្ហាញ ម៉ូដរបស់ម៉ាកផលិតផលសម្លៀកបំពាក់លំដាប់ជាតិ និងអន្តរជាតិចំនួន១៤។ ផលិតផលសម្លៀកបំពាក់អន្តរជាតិទាំង៨ម៉ាកនោះ រួមមាន AXARA (អាហ្សារ៉ា) មកពីទីក្រុងប៉ារីស MANGO (មែងហ្គោ) មកពីអេស្ប៉ាញ E.PSE (អ៊ីភីអេសអ៊ី) VNC (វីអ៊ិនស៊ី) SUBZERO (សាប់ហ្សេរ៉ូ) BONIA (បូននា) មកពីប្រទេសម៉ាឡេស៊ី LEVI'S (លីវ៉ាយ) មកពីអាមេរិក FLAXUS TOKYO (ហ្វ្លេកសឹសតូក្យូ) មកពីប្រទេសជប៉ុន។
ចំណែកឯសម្លៀកបំពាក់៦ម៉ាក ទៀតត្រូវបានរចនាម៉ូដក្នុងប្រទេសកម្ពុជារួមមាន NATACHA VAN (ណាតាឆាវ៉ាន់) [cgbcn] (ស៊ីជីប៊ី ស៊ីអិន) SOKNAN (សុខណាន) RONG (រ៉ុង) SEAM FASHION (សៀម ហ្វេសហ្សិន) និងម៉ាកសម្លៀកបំពាក់ CHIN FDESIGN (ឈិនអេហ្វ ឌីហ្សាញ)។
ក្រុមហ៊ុនសូវរិន រីថែល គ្រុប នឹងពាំនាំនូវព្រឹត្តិការណ៍បង្ហាញម៉ូដដ៏ធំនេះមកប្រារព្ធឡើង ជាលើកទី២ ដែលជាការចាប់ផ្ដើមនូវរដូវកាលថ្មីនៃស្លឹកឈើលាស់ និងរដូវក្ដៅឆ្នាំ២០១៤របស់ម៉ាកសម្លៀកបំពាក់ទាំងអស់ខាងលើនេះ ដូចអ្វីដែលបណ្ដាប្រទេសជឿនលឿនលើសកលលោកតែងតែប្រារព្ធឡើងជារៀងរាល់ឆ្នាំ។
ព្រឹត្តិការណ៍ បង្ហាញម៉ូដនេះប្រារព្ធឡើងក្នុងគោលបំណងដើម្បីស្វែងរកប្រាក់ចំណេញ ចូលរួមចំណែកជួយជំរុញគាំទ្រដល់វិស័យច្នៃម៉ូដសម្លៀកបំពាក់របស់ អ្នករចនាម៉ូដនៅក្នុងប្រទេសកម្ពុជាឲ្យកាន់តែរីកចម្រើនជឿនលឿន ស្របជាមួយនឹងបរិបទថ្មីដែលប្រទេសកម្ពុជានឹងធ្វើសមាហរណកម្មសេដ្ឋកិច្ចក្នុងតំបន់អាស៊ាននៅឆ្នាំ២០១៥ខាងមុខនេះ។
អ្នក រៀបចំកម្មវិធីលោក លី ស៊ូដែន បានឲ្យដឹងថា ព្រឹត្តិការណ៍ឆ្នាំនេះនឹងផ្ដោតសំខាន់ទៅលើភាពច្នៃប្រឌិតរបស់ អ្នករចនាម៉ូដសម្លៀកបំពាក់ក្នុងស្រុកតែម្ដង។ ម៉្យាងវិញទៀតខុសប្លែកពីឆ្នាំមុន ព្រឹត្តិការណ៍នេះនឹងស្វាគមន៍សាធារណជនឲ្យចូលរួមទស្សនា និងស្វែងយល់ពីការវិវឌ្ឍនៃវិស័យច្នៃម៉ូដនៅប្រទេសកម្ពុជា និងរលកនិយមនៃម៉ូដសម្លៀកបំពាក់ម៉ាកល្បីៗលំដាប់អន្តរជាតិផងដែរ។
លោក លី ស៊ូដែន ដែលជាប្រធានគ្រប់គ្រងផ្នែកទីផ្សាររបស់ក្រុមហ៊ុន សូវរិន រីថែល គ្រុប បាននិយាយថា៖ «យើងបានរំលងឆ្នាំ២០១៣ដើម្បីរៀបចំកម្មវិធីនេះ ក៏ព្រោះតែយើងចង់ប្រែក្លាយឲ្យវាក្លាយទៅជាព្រឹត្តិការណ៍ដែលមាន ទ្រង់ទ្រាយកាន់តែធំជាងមុន»។
លោកបានឲ្យដឹងថា សំបុត្រចូលទស្សនាកម្មវិធីនេះចំនួន៨០០សំបុត្រនឹងលក់ចែកចាយ សម្រាប់អ្នកដែលស្ថិតក្នុងវិស័យច្នៃម៉ូដសម្លៀកបំពាក់ ចំណែកឯ២៤០សំបុត្រទៀតនឹងទុកសម្រាប់សាធារណជនទាំងឡាយដែលមាន ចំណាប់អារម្មណ៍ជាវ។
សំបុត្រនេះនឹងត្រូវបានលក់ក្នុងតម្លៃ២០ ដុល្លារអាមេរិកចាប់ពីពេលនេះតទៅរហូតដល់កាលបរិច្ឆេទនៃការរៀបចំ កម្មវិធីតែម្ដង៕
