ប្រសិនបើបានមើលឃើញរូបភាពនេះហើយនោះ លោកអ្នកប្រហែលជាគិតថាចៅហ្វាយនាយក្រុមហ៊ុនមួយនេះបើមិនឆ្កួតទេ ក៏មានសតិកើតរោគចិត្តដែរ។
តើការធ្វើបែបនេះលោកអ្នកគិតថា ចៅហ្វាយម្នាក់នោះជាមនុស្សអាក្រក់ឬយ៉ាងណា? នេះជារូបភាពបុគ្គលិកនៃក្រុមហ៊ុនកែសម្ផស្សមួយស្ថិតនៅក្នុងខេត្តឆុងឈីង ប្រទេសចិនត្រូវបានចៅហ្វាយនាយខ្លួនបង្ខំឲ្យពួកគេលុតជង្គង់និង ប្រើដៃទាំងពីរវារដូចជាសត្វជើងបួននៅមុខសាធារណជនរាប់រយនាក់។
រូបភាពនេះបានកើតឡើងតាំងពីថ្ងៃទី២ ខែឧសភាកន្លងមក។ វាត្រូវបានគេថតរូបភាពនិងវីដេអូហើយបង្ហោះផ្សាយតាមប្លុកផ្ទាល់ខ្លួននានាតាមអ៊ីនធឺណិតដើម្បីចែករំលែកនូវសកម្មភាពបែបបង្ខំបុគ្គលិកខ្លួនដោយគ្មានសតិគិតពិចារណាដោយឲ្យបុគ្គលិកទាំងនោះត្រូវវារដូចជាសត្វធាតុនៅឯប្រទេសចិន។
តាមពិតទៅសូម្បីតែពួកប៉ូលិសនៅតំបន់នោះក៏មានការងឿងឆ្ងល់នូវទង្វើបែបនោះដែរ។ ប៉ុន្តែយ៉ាងណាទង្វើនោះវាគ្រាន់តែជាវិធីសាស្រ្តអនុវត្តនៃការហ្វឹកហាត់របស់ចៅហ្វាយនាយក្រុមហ៊ុនខាងលើចំពោះបុគ្គលិកខ្លួនប៉ុណ្ណោះ ព្រោះគាត់មានបំណងចង់សាកល្បងបុគ្គលិកគាត់ថាតើពួកគេមានភាពអំណត់តស៊ូនូវការដាក់សម្ពាធនេះកម្រិតណា។ តែទោះជាយ៉ាងណាសកម្មភាពនេះវាដូចជាសត្វសុនខដើរត្រូវគេសើចនិងតាមមើលនិងថតរូបទុកបែបនេះវាមិនសមរម្យឡើយសម្រាប់មនុស្ស។ តើពិតជាគ្មានមធ្យោបាយសាកល្បងណាល្អប្រសើរជាងការវារដូចសត្វនេះទេឬ?
គោលបំណងធំនៃការហ្វឹកហាត់បុគ្គលិកខ្លួនរបស់ចៅហ្វាយនាយរូបនេះគឺគាត់ចង់ឲ្យពួកគេមានការអត់ធន់កម្រិតខ្ពស់ ហើយគាត់នឹងផ្តល់ឱកាសសម្រាប់ពួកគេដោយមិនបាច់មានការបណ្តេញចេញពីក្រុមហ៊ុនឡើយប្រសិនជាពួកគេទ្រាំធ្វើបាននោះ។ គួរបញ្ជាក់ថា ទង្វើនេះក៏ត្រូវគេប្រទះឃើញបណ្តាប្រទេសនៅបស្ចិមប្រទេសក៏បានអនុវត្តដែរ។ តាមពិតទៅសកម្មភាពនេះចៅហ្វាយនាយអាចនឹងត្រូវគេចាប់ដាក់គុកឬត្រូវគេប្តឹងទារប្រាក់ជំងឺចិត្តបាន តែបើតាមរបាយការណ៍របស់សារព័ត៌មានចិនមួយឲ្យដឹងថា ករណីនេះក្រុមប៉ូលិសគ្រាន់តែរិះគន់និងផ្តល់ការអប់រំដល់ចៅហា្វយនាយក្រុមហ៊ុនតែប៉ុណ្ណោះចំពោះវិធីសាស្រ្តហ្វឹកហាត់ក្រុមហ៊ុនខាងលើ។ តែនៅសម័យកាលបច្ចុប្បន្ននេះគេក៏ពុំចង់ឲ្យមានការអនុវត្តដូចជាប្រភេទរបបទាសភាពដូចសម័យមុនៗដែរសម្រាប់បុគ្គលិក។
កាលពីសប្តាហ៍មុននេះដែរ គេឃើញមានព័ត៌មានមួយបាននិយាយពីបុគ្គលិកក្រុមហ៊ុនភ្នាក់ងារអចលនទ្រព្យសហរដ្ឋអាមេរិកមួយចង់ឲ្យក្រុមហ៊ុនប្រើស្លាកសញ្ញាយីហោ ខ្លួនចាក់សាក់លើកាយរបស់បុគ្គលិកដើម្បីទទួលបានការដំឡើងប្រាក់ ខែ១៥ភាគរយជាអចិន្រៃ្តយ៍។ វាជារឿងមួយដែលមានលក្ខណៈខ្វះមនសិការបន្តិចសម្រាប់មនុស្ស តែវានៅតែមានការអនុវត្តដដែល។
គេសង្កេតឃើញមានការអធិប្បាយតាមអ៊ីនធឺណិតជាច្រើនសម្រាប់ការប្រើវិធីសាស្រ្តរបស់ចៅហ្វាយនាយចិនដែលអនុវត្តទៅលើបុគ្គលិកខ្លួន។ ដូចជាការអធិប្បាយបានលើកឡើងថា៖«ចៅហា្វយនាយមានលក្ខណៈបែបនេះវាបានបញ្ចប់នូវកិត្តិយសខ្លួនរួចបាត់ទៅហើយ។ ឆន្ទៈល្អរបស់ចៅហ្វាយបែបនេះត្រូវរងការខូចខាតដល់កេរ្តិ៍ឈ្មោះរបស់ក្រុមហ៊ុន។ ចុះហេតុអ្វីបានជាមានប្រភេទចៅហ្វាយនាយមានឥរិយាបថអន់បែបនេះ? ចុះអតិថិជនរបស់ក្រុមហ៊ុនកែសម្ផស្សនេះមានអារម្មណ៍យ៉ាងណាទៅ? ឬមួយវាជារឿងធម្មតាទៅហើយសម្រាប់ការប្រតិបត្តិរបស់ចៅហ្វាយនាយទៅលើបុគ្គលិកនៅចិននោះ?»៕ PR
