ក្រុងញូវយ៉ក: ការសិក្សាថ្មី បានព្រមានថា ការកំណត់របបអាហារ និងតមអាហារអត់ញ៉ាំតែម្ដង អាចបង្កហានិភ័យចំពោះសុខភាពជាងអត្ថប្រយោជន៍សម្រកទម្ងន់។
ខណៈជនជាតិអាមេរិក ៤៥ លាននាក់ នាំគ្នាតមអាហាររៀងរាល់ឆ្នាំ ការសិក្សាមួយបានបង្ហាញថា ការទទួលទានកាឡូរីក្នុងកម្រិតទាបបំផុតអាចបំផ្លាញដល់ប្រព័ន្ធរំលាយអាហារ។
ក្រុមអ្នកនិពន្ធការសិក្សានៅសាកលវិទ្យាល័យ ហេលស៊ីនគី បានសន្និដ្ឋានថា ការទទួលទានអាហារទៀងពេលពិតជាជម្រើសដ៏ចាំបាច់ដើម្បីធានាចំពោះទម្ងន់ខ្លួនប្រកបដោយសុខុមាលភាព និងងាយស្រួលគ្រប់គ្រង។
ក្រុមអ្នកស្រាវជ្រាវ ដែលដឹកនាំដោយអ្នកឯកទេសជីវជាតិអាហារ អ៊ុលឡា កាកកៃនេន បានប្រមូលទិន្នន័យពីយុវជន និងយុវតីជាង ៤៩០០ នាក់។
អ្នកចូលរួមបានឆ្លើយការស្ទង់មតិដែលផ្ដោតលើកត្ដាប៉ះពាល់ដល់ទម្ងន់ និងបម្រែបម្រួលទម្ងន់ខ្លួនពេលពួកគេឈានដល់វ័យ ២៤ ឆ្នាំ និងពេល ១០ ឆ្នាំក្រោយ នៅអាយុ ៣៤ ឆ្នាំ។
អ្នកស្រី កាកកៃនេន និងក្រុមការងារ បានឲ្យដឹងថា កត្ដាចម្បងដ៏សាមញ្ញមួយចំពោះយុវជន និងយុវតី ដែលទទួលជោគជ័យក្នុងការគ្រប់គ្រងទម្ងន់ខ្លួនរយៈពេលយូរ គឺការទទួលទានអាហារពេលជាច្រើន ដែលមិនជាការបង្អត់អាហារខ្លួនឯងឡើយ។
អ្នកស្រី បានលើកឡើងថា៖ «យើងព្យាយាមគ្រប់គ្រងទម្ងន់ខ្លួនដ៏កើនឡើងខ្លាំងដោយការកំណត់របបអាហារ និងបង្អត់អាហារ។ នៅរយៈពេលយូរអង្វែង វាកាន់តែបង្កើនឱកាសឡើងជាតិខ្លាញ់ទៅវិញ»៕HR