.jpg)
ពេលសីតុណ្ហភាពត្រជាក់ រាងកាយនឹងដុតកាឡូរីកាន់តែរហ័សដើម្បីបង្កើនកម្ដៅ។
ក្រុងតូក្យូ: ការស្រាវជ្រាវថ្មីមួយបានបង្ហាញថា ជំនួសវគ្គសិក្សាយោគៈក្ដៅប្រចាំសប្ដាហ៍មកជាការហែលទឹកត្រជាក់ៗរយៈពេលយូរ អាចធ្វើឲ្យអ្នកសម្រកទម្ងន់បានយ៉ាងងាយ។
ការសិក្សាថ្មីមកពីសាកលវិទ្យាល័យក្រុងតូក្យូ បានបង្ហាញថា ស្ថិតក្នុងបរិយាកាសសីតុណ្ហភាពត្រជាក់រយៈពេលយូរអាចបង្កើនសមត្ថភាពរាងកាយគ្រប់គ្រងស្ករក្នុងឈាម និងបង្កើនការរំលាយអាហារកាន់តែប្រសើរ។
សហគមន៍លំហាត់ប្រាណធ្លាប់មានការខ្វែងគំនិតគ្នាលើចម្ងល់សីតុណ្ហភាពកម្រិតណាស័ក្ដិសមសម្រាប់ការហាត់ប្រាណ។ មនុស្សជាច្រើនបានគាំទ្រដល់វិធីសាស្ដ្រនានា ដែលប្រើសីតុណ្ហភាពខ្ពស់ដើម្បីបង្ខំញើសឲ្យចេញពីរាងកាយ ខណៈអ្នកខ្លះទៀត ដូចជា អគ្តពលិកម្ចាស់ពានអូឡាំពិក Michael Phelps បានអះអាងថា បរិស្ថានត្រជាក់ជំរុញឲ្យរាងកាយងាយបំផ្លាញកាឡូរីកាន់តែរហ័ស។
ការស្រាវជ្រាវកន្លងមក បានកំណត់ខ្លាញ់រាងកាយ ២ ប្រភេទ គឺត្នោត និងស។ ខ្លាញ់ពណ៌ត្នោត ត្រូវបានរកឃើញច្រើនក្នុងទារកទើបប្រសូត ដែលប្រើវាដើម្បីគ្រប់គ្រងសីតុណ្ហភាពរាងកាយ។ ខ្លាញ់ប្រភេទនេះ មានភារៈដុតបំផ្លាញកាឡូរីដើម្បីបង្កើតកម្ដៅ និងមិនបង្កហានិភ័យចំពោះសុខភាពឡើយ។ ពេលដល់ពេញវ័យ ខ្លាញ់ត្នោតត្រូវបានជំនួសដោយខ្លាញ់ស ដែលរុំរឹតសរីរាង្គផ្សេង។
តែបច្ចុប្បន្ន មនុស្សពេញវ័យផ្ទុកខ្លាញ់ស ទាំងមិនចាំបាច់ប្រើកម្លាំងរុករកអាហារ។ ការផ្ទុកខ្លាញ់សច្រើនលើសកំណត់ពាក់ព័ន្ធនឹងជំងឺធាត់ជ្រូកដែលអាចបង្កជាជំងឺបេះដូង ទឹកនោមផ្អែម និងមហារីកដទៃទៀត៕ HR''
