The Phnom Penh Post Search

Search form




Logo of Phnom Penh Post newspaper Phnom Penh Post - ជំងឺ​អាល្លែកហ្ស៊ី​ច្រមុះ ​កំពុង​តែ​វាយ​លុក​ខ្លាំង​តាម​បណ្ដា​ប្រទេស​ជុំវិញ​ពិភពលោក​




ជំងឺ​អាល្លែកហ្ស៊ី​ច្រមុះ ​កំពុង​តែ​វាយ​លុក​ខ្លាំង​តាម​បណ្ដា​ប្រទេស​ជុំវិញ​ពិភពលោក​

Content image - Phnom Penh Post
អ្នក​ជំងឺ​អាល្លែក​ហ្ស៊ី​ច្រមុះ​ ដែល​បង្ក​ឡើង​ដោយសារ​កត្តា​បរិស្ថាន​នៅ​ជុំវិញ​ខ្លួន។ Afp

ជំងឺ​អាល្លែកហ្ស៊ី​ច្រមុះ ​កំពុង​តែ​វាយ​លុក​ខ្លាំង​តាម​បណ្ដា​ប្រទេស​ជុំវិញ​ពិភពលោក​

ភ្នំពេញៈ បើទោះ​បីជា​ជំងឺ​អាល្លែកហ្ស៊ី​ច្រមុះ​ មិនបាន​បង្កនូវ​គ្រោះ​ថ្នាក់ខ្លាំង​ដល់​អាយុ​ជីវិត​មនុស្សក្តី តែវា​បាន​បង្ក​ឲ្យមាន​ការ​រំខាន​ និង​បណ្តាល​ឲ្យ​មានភាព​មិន​ស្រួល​ខ្លួន ឬ​ឈឺចាប់​ខ្លាំង​ក្លា​ដល់​ប្រព័ន្ធ​ដង្ហើម​គួរ​ឲ្យ​ព្រួយ​បារម្ភ។

នាឱកាស​អបអរសាទរ​ក្នុង​ទិវាយល់​ដឹងពី​ជំងឺ​អាល្លែកហ្ស៊ី​ច្រមុះ​ពិភព​លោក កាល​ថ្ងៃទី ៦ ខែ​មេសា ឆ្នាំ ២០១៦ កន្លងមក​ ក្រុមហ៊ុន​ GSK បាន​រៀបចំ​កម្មវិធី​សំណេះ​សំណាល និង​ចែករំលែក​នូវ​ចំណេះដឹង​ស្តី​អំពី​ជំងឺ​អាល្លែកហ្ស៊ី​ច្រមុះ ដោយ​ក្រុម​វេជ្ជបណ្ឌិត​ជំនាញ​ឯកទេស​ នៅ​ឯ​សណ្ឋាគារ​ភ្នំពេញ​ ដើម្បី​ចូលរួម​ផ្សព្វផ្សាយ​លើកស្ទួយ​បញ្ហា​សុខុមាល​ភាព​ទៅដល់​ប្រជាជន​ខ្មែរ​បាន​ស្វែង​យល់។

​អាល្លែកហ្ស៊ី​ច្រមុះ​ គឺជា​ជំងឺ​​ស្តែង​ចេញ​ជាប្រតិកម្ម​ក្រោយ​អ្នកជំងឺ​បាន​ប្រឈម​ទៅ​នឹង​មជ្ឈដ្ឋាន​ណាមួយ និង​បង្កឲ្យ​មានអាការ​រសើប ​រមាស់​ត្រង់់​ច្រមុះ កណ្តាស់ ហូរ​សំបោរ និង​ក្អួតទៀតផង​។ ជំងឺ​នេះ​បាន​និង​កំពុង​តែក្លាយ​ជាជំងឺ​គួរឲ្យ​ព្រួយ​បារម្ភមាន​លក្ខណៈ​ទ្រង់ទ្រាយ​ពិភព​លោក​តែម្តង។​

សាស្រ្តាចារ្យ​ គឹម ឡាង ជាវេជ្ជ​បណ្ឌិត​ជំនាញ​អាល្លែកហ្ស៊ី​ច្រមុះ​ បានបង្ហើប​ឲ្យ​ដឹងពី​អត្រាអ្នក​កើតជំងឺ​ និង​កត្តា​សំខាន់ៗ​នៃការ​កើត​ជំងឺនេះ​ថា៖ «មិនថា ស្ថិតនៅ​ក្នុង​ប្រទេស​ជាអ្នក​មាន ឬ​ជា​អ្នកក្រក្រី​នោះឡើយ គឺថា​វា​សុទ្ធតែ​អាច​កើត​មានឡើង​ចំពោះ​មនុស្ស​គ្រប់​ស្រទាប់​នៅ​លើ​ពិភពលោក។មានអត្រា​ប្រមាណជា​ ១០ ទៅ​ ២០ ភាគរយ​ក្នុង​ចំណោម ១០០ នាក់​។ ការ​កើត​ជំងឺ​អាល្លែកហ្ស៊ី​ច្រមុះ​មានកត្តា​ជំរុញ​បីសំខាន់​គឺទី ១ ជា​កត្តាតំណ​ពូជ​កើត​មកពី​ហ្ស៊ែន​ឬមេបា​ធ្លាប់មាន​កើតជំងឺ​នេះ កត្តាទី ២ គឺបរិស្ថាន​ និងទី ៣ ជា​កត្តា​​បណ្តាល​មកពី​សារធាតុ ឬក៏​វត្ថុ​ដែល​នាំឲ្យ​អ្នក​ជំងឺ​មាន​ប្រតិកម្ម​ច្រមុះ​តែម្តង»។

Content image - Phnom Penh Post
ក្រុម​វេជ្ជបណ្ឌិត​ជំនាញ​ឯកទេស​អាល្លែក​ហ្ស៊ី​ច្រមុះ​ ក្នុង​កម្ម​វិធី​។ ប៉ាន់ រិទ្ធា​

​ចំណែកលោក​ ថុង ម៉េងឡុង​ វេជ្ជ​បណ្ឌិត​ជំនាញ​អាល្លែកហ្ស៊ី​ច្រមុះ​នៅ​មន្ទីរ​ពេទ្យ​ព្រះអង្គឌួង​ ក៏បង្ហាញ​ពី​ផលប៉ះពាល់​ ដែល​បង្កដោយ​សារជំងឺ​អាល្លែកហ្ស៊ី​ច្រមុះ​នេះដែរថា៖ «​ការកើត​ជំងឺ​នេះ​ក្នុង​ដំណាក់កាល​ធ្ងន់វាអាច​នឹងកើត​ជំងឺ​ដទៃទៀត​លើប្រព័ន្ធ​ដង្ហើម​ និង​ច្រមុះ​ដូចជា​ ជំងឺ​ឫសដូង​ច្រមុះ រលាក​សួត រលាក​បំពង់ក​រ៉ាំរ៉ៃ និង​ជំងឺហឺត​ជាដើម»។

លោក​បញ្ជាក់​ដោយ​ការ​សង្កត់ធ្ងន់​ថែមទៀត​ថា​៖ «ប្រសិន​បើអ្នក​ជំងឺកើត​ជំងឺ​ ហឺតផង និង​អាល្លែកហ្ស៊ី​ច្រមុះផង​នោះ វានឹង​ជំរុញឲ្យអត្រា​នៃ​ជំងឺហឺត​នឹង​កើន​ឡើង​ចំនួនទ្វេ​ដង ឬបី​ដង​ឯណោះ​ ដែល​ជា​ឥទ្ធិពល​ប៉ះពាល់​ដល់​សុខ​ភាព​ខ្លាំង​ក្លា​ណាស់»។

គួរបញ្ជាក់​ដែរថា GSK គឺជា​ក្រុមហ៊ុន​ឱសថដែល​បាន​ចូលរួម​នៅក្នុង​ការ​លុបបំបាត់​នូវជំងឺ​សំខាន់ៗ​ដូចជា​ជំងឺ​គ្រុនស្វិត​ដៃជើង និង​បាន​បង្កើតនូវ​វ៉ាក់សាំង ដើម្បី​បង្ការ​ជំងឺមហា​រីកមាត់​ស្បូនស្រ្តី​នៅ​ប្រទេស​កម្ពុជា​ផងដែរ៕

អត្ថបទគួរចាប់អារម្មណ៍