ក្រុងញូវយ៉ក: ការសិក្សាមួយបានបង្ហាញថា ទទួលទានទឹកក្រូច ១ កែវរៀងរាល់ថ្ងៃ អាចកាត់បន្ថយហានិភ័យជំងឺវង្វេងវង្វាន់តាមវ័យ។
ក្រុមអ្នកស្រាវជ្រាវបានតាមដានមនុស្សប្រុសជិត ២៨ ០០០ នាក់រយៈពេល ២ ទសវត្សរ៍ ដើម្បីសិក្សាពីប្រសិទ្ធភាពនៃការទទួលទានបន្លែ និងផ្លែឈើចំពោះថាមពលខួរក្បាល។
ពួកគេបានរកឃើញថា បុរសដែលទទួលទានទឹកក្រូច ១ កែវតូច កាត់បន្ថយបញ្ហានៃការចងចាំ ៤៧ ភាគរយ ដោយអនុវត្ដតាមការណែនាំ ឬគោរពតាមគោលការណ៍ស្រដៀងគ្នានេះ។
ជំងឺភ្លេចភ្លាំង និងវង្វេងវង្វាន់អាចជាសញ្ញាណនៃការធ្លាក់ចុះសមត្ថភាពខួរក្បាល ដែលអាចឈានដល់បញ្ហាបាត់ការចងចាំទាំងស្រុង។
មនុស្សប្រមាណ ៤៦,៨ លាននាក់ កំពុងរស់នៅជាមួយជំងឺវង្វែងក្នុងទូទាំងពិភពលោក។ គ្មានវិធីព្យាបាលជំងឺបញ្ហានេះឡើយ តែក្រុមអ្នកវិទ្យាសាស្ដ្រ បាននិងកំពុងព្យាយាមស្វែងរកលទ្ធភាពព្យាបាលអ្នកជំងឺបាត់ការចងចាំអស់រយៈពេលជាច្រើនឆ្នាំមកហើយ។
ភ័ស្ដុតាងថ្មីនេះបានបង្ហាញពីសារៈ- សំខាន់នៃរបបអាហារសុខភាព ដែលអាចទប់ទល់នឹងការធ្លាក់ចុះសមត្ថភាពខួរក្បាល ពេលឈានដល់វ័យចាស់។
វេជ្ជបណ្ឌិត ហាណា ហ្គាឌេន័រ អ្នកស្រាវជ្រាវមកពីសាកលវិទ្យាល័យ ម៉ៃអាមី បាននិយាយថា៖ «ផ្លែឈើ និងបន្លែសម្បូរវីតាមីន និងជីវជាតិអាហារ រួមទាំង សារធាតុប្រឆាំងជំងឺ ដែលអាចជួយការពារខួរក្បាល»។
អត្ថប្រយោជន៍ចំពោះសុខភាពទាំងនេះ អាចការពារខួរក្បាលពីការកកើតម៉ូលេគុលអវិជ្ជមាន និងរក្សាការផ្គត់ផ្គង់ឈាមទៅកាន់ខួរក្បាល៕HR