ក្រុងវ៉ាស៊ីងតោន: ក្រុមអ្នកស្រាវជ្រាវបាននិយាយកាលពីថ្ងៃចន្ទថា ការសិក្សាជាច្រើនដែលពិសោធលើសត្វកណ្ដុរបានបង្ហាញ តម្រុយពីការកកើតឱសថអាំងសូលីនថ្មី ដែលអាចជួយអ្នកជំងឺទឹកនោមផ្អែម រាប់លាននាក់ចៀសផុតពីការចាក់ថ្នាំរាល់ថ្ងៃ។
ដោយត្រូវរងចាំការស្រាវជ្រាវជាច្រើនបន្ថែមទៀត មុនពេលឱសថ ដែលផលិតឡើងពីសំណាក់ក្រុមអ្នកស្រាវជ្រាវមកពីសាកលវិទ្យាល័យហាវើដ អាចត្រូវបានពិសោធលើមនុស្ស ឬដាក់លក់លើទីផ្សារ។
ឱសថពិសោធនេះដែលត្រូវបានចុះផ្សាយក្នុងប្រតិបត្ដិវិទ្យាស្ថានវិទ្យាសាស្ដ្រជាតិ បានផ្ទុកសារធាតុអាំងសូលីជាប្រភេទទឹក ដោយស្រោបសម្បកថ្នាំដែលធននឹងអាស៊ីដក្នុងក្រពះ។
សម្បកថ្នាំជាតិប៉ូលីមែរ បានរលាយពេលវាចូលដល់ពោះវៀនតូច អនុញ្ញាតឲ្យទឹកអាំសូលីនរលាយ។
អ្នកនិពន្ធជាន់ខ្ពស់ សាមីរ មីត្រាហ្គូទ្រី ជាសាស្ដ្រាចារ្យជីវវិស្វកម្មនៅសាកលវិទ្យាល័យហាវើដ បាននិយាយថា៖ «ពេលត្រូវបានរំលាយ ជាតិអាំសូលីន ត្រូវជួបឧបសគ្គចម្បងមួយមុនពេលវាអាចបញ្ចេញអានុភាពពង្រីកខ្លួនទៅតាមសរសៃឈាម»។
ការសិក្សា បានបញ្ជាក់ថា ឱសថថ្មីនេះ ងាយស្រួលផលិត និងអាចរក្សាទុករហូតដល់ ២ ខែនៅសីតុណ្ហភាពក្នុងបន្ទប់ដោយគ្មានបញ្ហាចោទ។
ក្រុមអ្នកស្រាវជ្រាវមិនបាននិយាយថា ត្រូវការពេលយូរប៉ុនណាទៀតមុនពេលអាចសាកល្បងលើមនុស្ស តែវាអាចត្រូវការពេលរាប់ឆ្នាំទៀត។
មនុស្សប្រមាណ ៤០ លាននាក់នៅទូទាំងពិភពលោកកើតជំងឺទឹកនោមផ្អែមប្រភេទ ១ ជាស្ថានភាពជំងឺ ដែលតម្រូវឲ្យចាក់ថ្នាំអាំងសូលីនរៀងរាល់ថ្ងៃ ដោយសាររាងកាយមិនអាចផលិតសារធាតុនេះគ្រប់គ្រាន់៕ AFP/HR