.jpg)
ការរួមរស់ជាប្ដីប្រពន្ធយូរអង្វែង មានផលល្អដល់បេះដូង។ AFP
ក្រុងប៉ារីស: ក្រុមអ្នកស្រាវជ្រាវបានឲ្យដឹងពីថ្ងៃអង្គារថា ការរួមរស់លើវិថីជីវិតដល់ចាស់ព្រឹទ្ធចាស់ព្រេងអាចជួយទប់ទល់នឹងជំងឺបេះដូង និងជំងឺដាច់សរសៃឈាមខួរក្បាល។
ពួកគេបានរាយការណ៍ក្នុងព្រឹត្តិបត្រវេជ្ជសាស្ដ្របេះដូងថា ការស្ទង់មតិនៃការស្រាវជ្រាវដែលធ្វើឡើងលើរយៈពេលជាង ២០ ឆ្នាំ ចំពោះមនុស្សជាង ២ លាននាក់ អាយុចន្លោះពី ៤២ ទៅ ៧៧ ឆ្នាំ បានរកឃើញថា អាពាហ៍ពិពាហ៍យូរអង្វែងពិតជាអាចកាត់បន្ថយហានិភ័យជំងឺទាំង ២ នេះ។
ការសិក្សាបានតាមដានលើប្រជាជនមកពីតំបន់ខុសៗគ្នានៅអឺរ៉ុប អាមេរិកខាងជើង មជ្ឈិមបូព៌ា និងអាស៊ី ដោយបានទទួលលទ្ធផលកាន់តែជាក់ច្បាស់។
ការសិក្សាបានរកឃើញថា បើធៀបនឹងអ្នករស់នៅជីវិតប្ដីប្រពន្ធ អ្នកលែងលះ មេម៉ាយ ឬមិនធ្លាប់រៀបការមានអត្រា ៤២ ភាគរយដែលទំនងអាចអភិវឌ្ឍជាជំងឺបេះដូង ហើយ ១៦ ភាគរយ អាចប្រឈមជំងឺសរសៃឈាមបេះដូង។
ហានិភ័យមរណភាពអាចកើនឡើងខ្ពស់ចំពោះអ្នកអត់មានគូ ដោយ៤២ ភាគរយប្រឈមជំងឺសរសៃឈាមបេះដូង និង ៥៥ ភាគរយអាចកើតជំងឺដាច់សរសៃឈាមខួរក្បាល។
ក្រុមស្រាវជ្រាវនោះដឹកនាំដោយវេជ្ជបណ្ឌិត ឈុន វ៉ៃវុង ដែលជាអ្នកស្រាវជ្រាវមកពីផ្នែកបេះដូងនៃមន្ទីរពេទ្យ Royal Stoke Hospital ប្រទេសអង់គ្លេស។
ប៉ុន្ដែការសិក្សាជាច្រើនមិនបានបញ្ជាក់អំពីប្ដីប្រពន្ធក្រៅចំណងអាពាហ៍ពិពាហ៍ ឬសម្ព័ន្ធភាពសិចភេទដូចគ្នាថា តើវាមានប្រយោជន៍ដូចគ្នាឬយ៉ាងណានោះទេ៕
