The Phnom Penh Post Search

Search form

Logo of Phnom Penh Post newspaper Phnom Penh Post - តស៊ូ​១៣​ឆ្នាំ​ទំរាំ​បាន​បុត្រ​ស្នង​ត្រកូល

តស៊ូ​១៣​ឆ្នាំ​ទំរាំ​បាន​បុត្រ​ស្នង​ត្រកូល

តស៊ូ​១៣​ឆ្នាំ​ទំរាំ​បាន​បុត្រ​ស្នង​ត្រកូល

131218_20a
អ្នកស្រី ឈុន វណ្ណា រៀបការ១៣ឆ្នាំទើបតែមានបុត្រក្នុងផ្ទៃ និងអ្នកស្រី អ៊ាវ ចិន្តា រៀបការ១៥ឆ្នាំទើបមានគភ៌ ឈឹម ស្រីនាង

ភ្នំពេញ : អ្នកស្រី ឈុន វណ្ណា បាន​រៀប​អាពាហ៍ពិពាហ៍​ជាមួយ​លោក ឆាយ ផាន់ណាង តាំងពី​ឆ្នាំ​២០០០​មក​ម្ល៉េះ ប៉ុន្តែ​អស់​រយៈពេល​១៣​ឆ្នាំ​មក​ហើយ ប្ដី​ប្រពន្ធ​គូ​នេះ​នៅ​តែ​មិន​ទាន់​មាន បុត្រាបុត្រី​បន្ត​ពូជពង្ស​នឹង​គេ​។ រយៈ​ដែល​ពោរពេញ​ដោយ​ក្ដី​អស់​សង្ឃឹម​លាយឡំ​នឹង​ភាព​នឿយណាយ​ដោយសារ​តែ ដំណើរ​ឡើង​ចុះ​ទៅ​ព្យាបាល​ទាំង​នៅក្នុង និង​ក្រៅ​ប្រទេស​នេះ សឹង​តែ​ធ្វើឲ្យ​អ្នកស្រី ឈុន វណ្ណា និង​ស្វាមី​បំភ្លេច​ក្ដីស្រមៃ​ចង់​បាន​កូន​នឹង​គេ​ហើយ ប៉ុន្តែ​ជីវិត​គូស្នេហ៍​នេះ​ប្រែ​ជា​មាន​សង្ឃឹម​វិញ​បន្ទាប់ពី​ពួកគាត់ បាន​ទៅ​ពិនិត្យ និង​ព្យាបាល​នៅ​បន្ទប់​ពិគ្រោះ​ព្យាបាល​សុខទៀង​ដែល​មាន​ឯកទេស​ខាង​ព្យាបាល​បញ្ហា​គ្មាន​កូន​ក្រោយពី​ត​រៀបការ​ជាច្រើន​ឆ្នាំ​។

ស្ថិត​ក្នុង​វ័យ​៣៤​ឆ្នាំ​អ្នកស្រី ឈុន វណ្ណា បាន​រៀបរាប់​ពី​ស្ថានភាព​គ្មាន​កូន​នេះ​ថា៖ «នៅពេល​ការ​ហើយ​ភ្លាមៗ​គឺ​អត់​ទាន់​ចង់​បាន​កូន​ទេ ចេះ​តែ​លេប​ថ្នាំ​ការពារ ដល់​ពេល​រកស៊ី​រាង​គ្រាន់​បើ​បន្តិច​ទៅ​ក៏​គិត​ថា​ចង់​បាន​កូន ខ្ញុំ​ក៏​ឈប់​លេប​ថ្នាំ តែ​នៅ​តែ​អត់​បាន ហើយ​ក៏​ទៅ​ពេទ្យ​ពិនិត្យ​គេ​ឲ្យ​ប្រើ​ថ្នាំ ប៉ុន្តែ​នៅ​តែ​មិន​បាន​សម្រេច។ ខ្ញុំ​ក៏​ទៅ​វៀតណាម​ពីរ​បី​ដង តែ​នៅ​តែ​មិន​បាន​សម្រេច ហើយ​ណា​មួយ​ចំណាយ​ថវិកា​អស់​ច្រើន​ក៏​អស់សង្ឃឹម​ឈប់​ចង់​ព្យាយាម ទៀត»។

អ្នកស្រី​បាន​ថ្លែង​បន្ត​ទៀត​ថា៖ «ក្នុង​ឆ្នាំ​២០១៣​នេះ​មាន​មិត្តភក្តិ​របស់​ខ្ញុំ​ប្រាប់​ឲ្យ​ខ្ញុំ​ទៅ ពិនិត្យ​នៅ​បន្ទប់​ពិគ្រោះ​ព្យាបាល សុខ ទៀង ពីព្រោះ​គាត់​ក៏​មាន​បញ្ហា​អត់​កូន​ដែរ​។ គេ​ព្យាបាល​បាន​ជោគជ័យ​អ៊ីចឹង​ហើយ​ខ្ញុំ​ក៏​សម្រេច​ចិត្ត​ទៅ​ព្យាបាល​នឹង​គេ​ដែរ​»។

យោងតាម​អ្នកស្រី វណ្ណា ពេល​ដែល​ទៅ​ពិនិត្យ​ដំបូង​គាត់​ត្រូវ​ឆ្លងកាត់​ការ​ធ្វើ​តេស្ត​ឈាម និង​ការ​ពិនិត្យ​មេជីវិត​មុន​នឹង​ផ្ដល់​ថ្នាំ​លេប និង​ថ្នាំ​ចាក់​ត្រគាក។

អ្នកស្រី​បាន​ឲ្យ​ដឹង​ថា៖ «ពេទ្យ​ឲ្យ​ថ្នាំ​ញ៉ាំ​រយៈពេល​មួយ​ខែ ក្រោយ​មក​ចាក់​ថ្នាំ​ត្រគាក​ពីរ​បី​អំពូល ក្នុង​ខែ​ហ្នឹង​ក៏​មាន (គភ៌)​តែ​ម្តង។ ខ្ញុំ​ព្យាបាល​រយៈពេល​២​ខែ​ទើប​បាន​ជោគជ័យ»។

អ្នកស្រី បាន​រំឭក​ថា៖ «មុន​ពេល​ដែល​ព្យាបាល​គឺ​ខ្ញុំ​អស់​សង្ឃឹម​យ៉ាង​ខ្លាំង​ហើយ​ខ្មាសគេ​ទៀត ជាពិសេស​គ្រួសារ​ខ្ញុំ​(ស្វាមី)​នៅពេល​ដែល​គាត់​ទៅ​ណា​មក​ណា​គឺ​មិត្តភក្តិ​តែងតែ​បង្អាប់​ថា​អន់​ជាង​មាន់​ទៅ​ទៀត​។ តែ​ឥឡូវ​នេះ​ខ្ញុំ​មាន​សង្ឃឹម​វិញ​ហើយ​គឺ​ខ្ញុំ​មាន​អារម្មណ៍​សប្បាយ ចិត្ត​ខ្លាំង​មែនទែន​ទោះ​ជា​គេ​យក​ពេជ្រ​មក​ដូរ​ក៏​មិន​ដូរ​ដែរ»។

ក្នុង ករណី​របស់​អ្នកស្រី វណ្ណា អ្នក​គ្រូពេទ្យ សុខ ទៀង បាន​ពន្យល់​ថា​៖ «បងស្រី វណ្ណា គឺ​យើង​ព្យាបាល​ដោយ​ឲ្យ​គាត់​លេប​ថ្នាំ​ប៉ុណ្ណោះ​។ ខ្ញុំ​កំណត់​ថ្ងៃ​កំណត់​ពេល​ឲ្យ​ប្ដីប្រពន្ធ​គាត់​នៅ​ជាមួយ​គ្នា​អ៊ីចឹង ទៅ គួបផ្សំ​នឹង​ពេល​ដែល​គាត់​ចង់​បាន​កូន​ពេក អាច​ធ្វើឲ្យ​ឱកាស​នោះ​វា​ប្រែប្រួល​បាន​ជោគជ័យ​តែ​ម្តង ក៏​ប៉ុន្តែ​ករណី​នេះ​មិនមែន​មនុស្ស​ទូទៅ​មាន​សំណាង​ដូច​គ្នា អាច​មាន​កូន​នោះ​ទេ​គឺ​វា​ទាក់ទង​នឹង​ពេលវេលា សុខភាព​យើង​គួបផ្សំ​គ្នា​ផង​ដែរ»។

អ្នកគ្រូ​ពេទ្យ សុខ ទៀង បាន​ឲ្យ​ដឹង​ថា​បញ្ហា​គ្មាន​កូន​ក៏​អាច​បណ្តាល​មកពី​បុរស​ដែល​គាត់​ចូលចិត្ត​ញ៉ាំ​ស្រា ជក់ បារី ជាពិសេស​គឺ​ការ​ស្ទីមសូណា​ដែល​ប៉ះពាល់​ខ្លំាង​ដល់​ការ​បង្ក​កំណើត​តែ ម្តង​ដោយសារ​តែ​ទំហំ​នៃ​កម្ដៅ​អាច​ធ្វើឲ្យ​មេជីវិត​ប្រុស​ចុះ ខ្សោយ។

អ្នកគ្រូពេទ្យ​ក៏​បាន​ណែនាំ​ឲ្យ​ស្ត្រី​ទាំងឡាយ​ធ្វើការ​ពិនិត្យ សុខភាព​ជា​រៀងរាល់​៦​ខែ​ម្ដង ដើម្បី​ចំណាយ​តិច ជា​ជាង​ការ​ទុក​ឲ្យ​បញ្ហា​សុខភាព​ធ្ងន់ធ្ងរ។

ចាប់​តាំងពី​បើក​ដំបូង កន្លែង​ព្យាបាល​អ្នក​គ្រូពេទ្យ​បាន​ទទួល​ព្យាបាល​ចំនួន​១០៨០​គ្រួសារ​ហើយ ទំាង​អ្នក​លំបាក​មាន​កូន និង​អ្នក​មាន​បញ្ហា​រោគស្រ្តី​ទូទៅ ក្នុង​នោះ​មាន​២១៦​គ្រួសារ​ដែល​ទទួល​បាន​ជោគជ័យ​ក្នុង​ការ​ព្យាបាល​ឲ្យ មាន​បុត្រ​ដូច​បំណង​ប្រាថ្នា។

បន្ទប់​ពិគ្រោះ​ព្យាបាល សុខ ទៀង សិ្ថត​នៅ​ផ្ទះ ២១Eo ផ្លូវ​១៧៨ ជាប់​របង​វិទ្យាល័យ​ព្រះស៊ីសុវត្ថិ។ ទូរស័ព្ទ​លេខ ០១២ ៣៥៥ ៣០៨៕

អត្ថបទគួរចាប់អារម្មណ៍