.jpg)
តុក្កតាជ័រច្របាច់លេង ជារបស់កម្សាន្តដ៏ពេញនិយមពេលក្មេងតូចងូតទឹក។
ក្រុងហ្សឺណែវ: ក្រុមអ្នកស្រាវជ្រាវស្វ៊ីស និងអាមេរិកបានសិក្សាយ៉ាងស៊ីជម្រៅស្ដីពីបញ្ហាអវិជ្ជមានលើតុក្កតាទាជ័រ និងតុក្កតាជ័រទន់ជាច្រើនទៀតដែលប្រើក្នុងបាសាំងទឹក។
សម្ភារប្លាស្ទិកដែលប្រើក្នុងអាងទឹកបានផ្ដល់ជាជម្រកដ៏ស្ដុកស្ដម្ភសម្រាប់បាក់តេរី និងពពួកផ្សិតដទៃ។ នេះបើយោងតាមការសន្និដ្ឋានរួម ដែលចុះផ្សាយកាលពីថ្ងៃអង្គារ ដោយរដ្ឋាភិបាលស្វ៊ីស។
សេចក្ដីថ្លែងការណ៍របស់រដ្ឋាភិបាលស្វ៊ីស បានបង្ហាញថា៖ «កំណើនបាក់តេរី និងផ្សិតដ៏ច្រើនសន្ធឹកនៅបរិវេណខាងក្នុងប្លាស្ទីក និងទឹកស្លែ នឹងអណ្ដែតចេញមកក្រៅពេលវាត្រូវបានក្មេងៗចាប់ច្របាច់លេង»។
ក្រុមអ្នកស្រាវជ្រាវមកពីវិទ្យាស្ថានសហព័ន្ធស្វ៊ីសផ្នែកវិទ្យាសាស្ដ្រជលជាតិ និងបច្ចេកវិទ្យា EAWAG សាលាពហុបច្ចេកទេសសហព័ន្ធស្វ៊ីស និងសាកលវិទ្យាល័យ អ៊ីលលីណូស បានរកឃើញថា កំណើនអតិសុខុមប្រាណដ៏ក្រាសនេះមិនត្រឹមតោងលើសម្ភារប្លាស្ទិកប៉ុណ្ណោះទេ ប៉ុន្ដែថែមទាំងអ្នកងូតទឹកអាងផងដែរ។
នៅពេលកាត់តុក្កតា ពួកគេរកឃើញកោសិការមេរោគចន្លោះពី ៥ លានទៅ ៧៥ លានក្បាលក្នុងបរិមាណមួយសង់ទីម៉ែត្រការ៉េ ត្រូវបានរកឃើញលើប្លាស្ទិក។ នេះបើយោងតាមរបាយការណ៍សង្ខេប។
អតិសុខុមជីវវិទូ លោក Frederik Hammes បានគូសបញ្ជាក់លើសេចក្ដីថ្លែងការណ៍ថ្ងៃអង្គារនេះថា៖ «វាអាចពង្រឹងដល់ប្រព័ន្ធស៊ាំជំងឺ ដែលអាចជាចំណុចវិជ្ជមាន តែវាក៏អាចកើតជាជំងឺឆ្លង ភ្នែក ត្រចៀក ឬថែមទាំងក្រពះ និងពោះវៀន»៕
