The Phnom Penh Post Search

Search form

Logo of Phnom Penh Post newspaper Phnom Penh Post - ថ្នាំ​និង​ការ​ព្យាបាល​ផ្លូវភេទ​ដ៏​ប្រថុយប្រថាន​នៅ​កម្ពុជា

ថ្នាំ​និង​ការ​ព្យាបាល​ផ្លូវភេទ​ដ៏​ប្រថុយប្រថាន​នៅ​កម្ពុជា

ថ្នាំ​និង​ការ​ព្យាបាល​ផ្លូវភេទ​ដ៏​ប្រថុយប្រថាន​នៅ​កម្ពុជា

Content image - Phnom Penh Post

ភ្នំពេញៈ អង្គុយ​លើ​កៅអី​ក្នុង​ហាង​ក្បែរ​ផ្សារ​អូរឫស្សី​បុរស​វ័យ​ហាប្លាយ​បី​នាក់​បាន​លើក​កែវ​ស្រាថ្នាំ​ជល់​គ្នា​។ វា​ជា​ស្រា​ពណ៌​ក្រហមក្រមៅ ដែល​គេ​ដួស​ចេញ​ពី​ក្រឡ​កែវ​ធំ​ៗ​តម្រៀប​គ្នា​ក្នុង​ហាង។

ស្រាថ្នាំ​នេះ​ត្រូវ​បាន​គេ​ជឿ​ថា អាច​បំប៉ន​ថាមពល​និង​បង្កើន​តណ្ហា​របស់​បុរស។

លោក​ទូច​មករា​អាជីវករ​លក់​ស្រាថ្នាំ​ពិសេស​នេះ​បាន​និយាយ​ថា​៖​«ក្នុង​ហាង​បៀរហ្គាដិន​១០ មាន​៤​ហាង​ហើយ​ដែល​លក់​ស្រាថ្នាំ​ប៉ូវ​ផ្លូវភេទ​ទាំងនេះ»។

លោក​បន្ត​ទៀត​ថា​៖ «​កម្រ​ឃើញ​បុរស​ណា​នាំ​សង្សារ​មក​ជាវ​ស្រាថ្នាំ​ពិសេស​នេះ​ណាស់​ព្រោះ​ខ្លាច​ខាងស្រី​គាត់​ខ្មាស​គេ ហើយ​ម៉្យាង​ទៀត​វា​ឲ្យ​នាំ​អ្នក​ដទៃ​គិត​ថា អីយ៉ា មួយ​គូ​នេះ​ច្បាស់​ជា​ប៉ូវ​កម្លាំង​ត្រៀម​ឡើង​គ្រែ​យប់​ហ្នឹង​ហើយ​មើល​ទៅ?​»។

130612_22a
លោក សុង ជា បង្ហាញថ្នាំបុរាណប៉ូវផ្លូវភេទនៅហាងលក់ថ្នាំចិនសែ Scott Howes

ទោះ​បី​ជា​ប្រជាជន​ខ្មែរ​ចាត់​ទុក​បញ្ហា​ផ្លូវភេទ​ជា​អាថ៌កំបាំង​ផ្ទាល់ខ្លួន​ក្ដី ក៏​ទីផ្សារ​ថ្នាំ​សម្រើប​ឱសថ​ប៉ូវ និង​កែ​រោគ​ខ្សោយ​ផ្លូវភេទ​បាន​ដុះដាល​ច្រើន​ទាំង​បែប​បុរាណ និង​វិទ្យាសាស្ត្រ​ផង​ដែរ។

វេជ្ជបណ្ឌិត​ហៀង​ប៊ុនលី​ប្រធាន​ផ្ដល់​ប្រឹក្សា​មកពី​មជ្ឈមណ្ឌល​ស្រាវជ្រាវ​អង្គរ​និង​អង្គការ​អភិវឌ្ឍន៍​ឱសថ​បុរាណ (ACRe DoHM​) មាន​ប្រសាសន៍​ថា​៖ «ទីផ្សារ​លក់​ថ្នាំ​សម្រើប​ពិត​ជា​ធំ​ទូលាយ​មែន»។

លោក​បន្ត​ថា​អតិថិជន​ភាគច្រើន​គឺជា​បុរស​វ័យ​៤០​ឆ្នាំ​ប្លាយ​ឡើង​ទៅ​តែ​ម្តង។

ក្នុង​ជំនួប​នៅ​ការិយាល័យ ឯ​ខណ្ឌ​មានជ័យ​ជាយ​រាជធានី​ភ្នំពេញ លោក​បាន​ធ្វើការ​ណែនាំ​ទាក់ទិន​នឹង​ផលិតផល​ជំនួយ​ផ្លូវភេទ​មួយ​ចំនួន​ដែល​មាន​លក់​នៅ​តាម​ឱសថស្ថាន ផ្សារ និង​ផ្សារ​ទំនើប​នានា។ នោះ​គឺ​ថ្នាំ​មកពី​ចិន​ឈ្មោះថា ប្លេកឃីង (Black King) ដែល​មាន​រូប​សត្វ​ស្វាឪ​ពណ៌​ខ្មៅ និង​នារី​ស្លៀក​រូប​ខ្លី​ពណ៌​ក្រហម​យ៉ាង​សិចស៊ី។ នៅ​ក្នុង​កញ្ចប់​ថ្នាំ​ក៏​មាន​រូប​អាសអាភាស និង​ការ​ផ្សព្វផ្សាយ​ថា វា​អាច​បង្កើន​បរិមាណ​ទឹកកាម ធ្វើ​ឲ្យ​លិង្គ​រឹង និង​រួមភេទ​បាន​យូរ។

លោក​វេជ្ជបណ្ឌិត​ពន្យល់​ថា​៖​«យើង​ត្រូវ​ប្រយ័ត្ន​ព្រោះ​ថ្នាំ​ខ្លះ​គ្មាន​ការ​អនុញ្ញាត​ត្រឹមត្រូវ​ទេ ហើយ​វា​អាច​ផ្ទុក​សារធាតុ​គីមី​ដែល​គ្រោះថ្នាក់​ដល់​សុខភាព​ផង​ដែរ»។

លោក​បាន​ដាស់តឿន​ថា ដើម្បី​ប្រាក់​មាន​ក្រុមហ៊ុន​ខ្លះ​ផលិត​ថ្នាំ​ក្លែងក្លាយ​ដែល​ផ្ទុក​សារធាតុគីមី​ផ្សេង។

យោងតាម​ទស្សនៈ​របស់​លោក បញ្ហា​អ្វី​ៗ​អាច​ត្រូវ​បាន​ពន្យល់​តាមរយៈ​ធាតុ​ទាំង​៤ គឺ​ទឹក​ដី ភ្លើង និង​ខ្យល់។

លោក​បាន​ពន្យល់​ថា​៖​«ការ​ចុះ​ខ្សោយ​ផ្លូវភេទ ទាមទារ​ធាតុ​ភ្លើង។ សាច់​ឆ្កែ និង​ពស់ អាច​បង្កើន​កម្ដៅ​រាងកាយ ហើយ​លិង្គ​សត្វ​ជ្រូក​ពពែ គោ និង​ក្របី ក៏​អាច​ប៉ូវ​សុខភាព​ផ្លូវភេទ​បាន​ដែរ»។

តាម​រូបមន្ត​ពី​បុរាណ​ដែល​គេ​ជឿ​ត​ៗ​គ្នា​មក​កុយ​រមាស​ក៏​ត្រូវ​បាន​ចាត់​ទុក​ជា​ឱសថ​ជំនួយ​ផ្លូវភេទ​ដ៏​ពិសេស​ដែរ។

លោក​វេជ្ជបណ្ឌិត​បន្ត​ថា​៖​«សត្វ​រមាស​វា​ស៊ី​អាហារ​ដែល​អាច​ឲ្យ​វា​ផលិត​អ័រម៉ូន​ម៉្យាង​ជំនួយ​ដល់​ផ្លូវភេទ។ ថ្វីដ្បិត​តែ​មិន​មាន​ការ​សិក្សា​ពី​ប្រសិទ្ធភាព​កុយ​រមាស​ចំពោះ​សុខភាព​ផ្លូវភេទ​ក៏​ពិត​មែន ប៉ុន្តែ​ខ្ញុំ​ជឿ​ថា​វា​ជា​ការ​ពិត។ តែ​នេះ​មិនមែន​មាន​ន័យថា ខ្ញុំ​ជំរុញ​ឲ្យ​មាន​ការ​ចាប់​រមាស​យក​មក​ធ្វើ​ថ្នាំ​ឡើយ»។

រីឯ​លោក​ប៉ែន​ស៊ុនណា​ប្រធាន​អង្គការ​ACRe DoHM បាន​លើក​ឡើង​ថា​៖ «បុរស​ៗ​ដែល​គាត់​ស្គាល់​ថ្នាំ​សម្រើប​វីយ៉ាក្រា គាត់​នឹង​រក​ទិញ​វា​នៅ​ឱសថស្ថាន។ គាត់​មិន​ប្រើ​ថ្នាំ​បុរាណ​ទេ»។

ក្រៅ​ពី​ហាង​លក់​ឱសថ នៅ​មាន​កន្លែង​ចាក់​ម្ជុល​វិទ្យាសាស្រ្ត​មួយ​ចំនួន រាប់​ទាំង​ហាង​នៅ​ម្ដុំ​ស្ពាន​ក្បាលថ្នល់ ដែល​អះអាង​ថា អាច​ព្យាបាល​បញ្ហា​ផ្លូវភេទ ដោយ​ការ​ប្រើ​ម្ជុល​តម្ពក់​ចាក់​ចូល​ជីពចរ​នៅ​ចន្លោះ​ពង​ស្វាស​និង​រន្ធ​គូទ​គួរ​ឲ្យ​ព្រឺ​ផង​ដែរ។

លោក​តាកាដា​តាដាណូរី​បម្រើ​ការងារ​នៅ​មូលនិធិ​Nippon​ដែល​ជា​អង្គការ​ក្រៅ​រដ្ឋាភិបាល​មួយ​សហការ​នឹង​មជ្ឈមណ្ឌល​ជាតិ​ផ្នែក​ឱសថ​បុរាណ​បាន​និយាយ​ថា​ម្ជុល​វិទ្យាសាស្រ្ត​ត្រូវ​បាន​ប្រើប្រាស់​ទូទៅ​ដើម្បី​ព្យាបាល​ផ្លូវភេទ។

លោក​បាន​ថ្លែង​ថា​៖​«ខ្ញុំ​ធ្លាប់​ប្រើ​ម្ជុល​វិទ្យាសាស្ត្រ​ព្យាបាល​បញ្ហា​ផ្លូវភេទ​បុរស​ស្ត្រី ដែល​ភាគច្រើន​កើតឡើង​ដោយសារ​ស្ត្រេស និង​អារម្មណ៍​ភ័យខ្លាច»។

រូប​លោក​ក៏​ធ្លាប់​ឮ​ថា នៅ​ប្រទេស​កម្ពុជា​មាន​កន្លែង​ព្យាបាល​ផ្លូវភេទ ដោយ​ប្រើ​ម្ជុល​វិទ្យាសាស្ត្រ​មាន​តម្ពក់​មក​ចាក់​ទម្លុះ​ស្បែក​ចន្លោះ​រន្ធ​គូទ និង​ពងស្វាស​ដែរ។

លោក​បាន​បញ្ជាក់​ថា​៖​«ការ​កាច់​មុខម្ជុល​ឲ្យ​បាក់ ហើយ​ទុក​តម្ពក់​ឲ្យ​កប់​ចោល​ក្នុង​សាច់ គឺជា​ទង្វើ​គ្រោះថ្នាក់ និង​ខុស​ច្បាប់​នៅ​ប្រទេស​ជប៉ុន»។

លោក​ពន្យល់​ថា តម្ពក់​ម្ជុល​អាច​រត់​នៅ​ក្នុង​សាច់ ហើយ​ចម្លង​មេរោគ។ ចំពោះ​រូប​លោក ការ​ព្យាបាល​ផ្លូវភេទ​ដោយ​ម្ជុល​វិទ្យាសាស្ត្រ​គឺ​ធ្វើ​ឡើង​នៅ​លើ​ខ្នង។ តែ​លោក​សារភាព​ថា​៖​«វា​មិន​សូវ​ជា​ជួយ​ច្រើន​ណាស់ណា​ទេ»៕ PR

អត្ថបទគួរចាប់អារម្មណ៍