The Phnom Penh Post Search

Search form




Logo of Phnom Penh Post newspaper Phnom Penh Post - ទំនោរ​និយម​ចិញ្ចើម​ក្រាស់ ធ្វើ​ឲ្យ​ស្ត្រី​បែរ​ដាំ​រោម​ចិញ្ចើម




ទំនោរ​និយម​ចិញ្ចើម​ក្រាស់ ធ្វើ​ឲ្យ​ស្ត្រី​បែរ​ដាំ​រោម​ចិញ្ចើម

ទំនោរ​និយម​ចិញ្ចើម​ក្រាស់ ធ្វើ​ឲ្យ​ស្ត្រី​បែរ​ដាំ​រោម​ចិញ្ចើម

120905_23b
Content image - Phnom Penh Post
នាង យូណា តារាចម្រៀងកូរ៉េ និងនាង គីម កាដាសៀន តារាទូរទស្សន៍អាមេរិក មានរោមចិញ្ចើមក្រាស់

ក្រុងឡុងដ៍ៈ ការ​កែ​កុន​សម្រស់​ឲ្យ​ទាន់​សម័យ​កាល ពិត​ជា​មិន​មែន​ជា​រឿង​ងាយ​ស្រួល​ឡើយ។

កាលពី​យុវភាព ក្លែរ កាល់វើវែល បាន​ដក​រោម​ចិញ្ចើម​របស់​ខ្លួន​ជា​ញឹកញយ​ដើម្បី​ទទួល​បាន​នូវ​ចិញ្ចើម​តូច ​ខ្វង់​ ខណៈ​ដែល​សម័យ​នោះ​ តារា​ភាព​យន្ត​ល្បីៗ​សុទ្ធ​តែ​មាន​ចិញ្ចើម​ស្ដើង​ឆ្មារ​ដូច្នេះ។

ប៉ុន្តែ ​ឥឡូវ​ទន្តពេទ្យ​វ័យ​៣០​ឆ្នាំ​រូប​នេះ បាន​ប្រឈម​នឹង​បញ្ហា​រោម​ចិញ្ចើម​ដ៏​ស្ដើង ដោយ​សារ​តែ​រោម​ថ្មី​លែង​ដុះ ក្រោយ​ពី​តែ​ការ​ដក​រាប់សិប​ដង​ផ្ទួនៗ​គ្នា។

នាង ក្លែរ បាន​និយាយ​ថា៖ «កាលពី​នៅ​ក្មេង​ ខ្ញុំ​ដក​រោម​ចិញ្ចើម​ញឹកញាប់​ណាស់។ ខ្ញុំ​ទើប​តែ​ដឹង​ពី​លទ្ធផល​នៃ​ការ​ដក​រោម​ចិញ្ចើម​នា​ពេល​នេះ​ទេ»។

នាង បាន​បន្ត​ថា៖ «តាម​ការ​ពិត រោម​ ឬ​សក់​របស់​យើង​មាន​កម្រិត​ក្នុង​ការ​ដុះ​ឡើង​វិញ​។ បើ​យើង​ដក​វា​ផ្ទួនៗ​គ្នា​រាប់រយ​ដង វា​នឹង​លែង​ដុះ​រហូត»។

បញ្ហា​ដែល​ ធ្វើ​ឲ្យ​នាង​រឹត​តែ​ពិបាក​ចិត្ត​នោះ​គឺ បច្ចុប្បន្ន​នេះ​គេ​លែង​និយម​ចិញ្ចើម​តូច​ខ្វង់​ដូច​ទសវត្សរ៍​មុន​ទៀត​ហើយ ដូច្នេះ​នាង ក្លែរ ត្រូវ​បង្ខំ​ចិត្ត​ចំណាយ​ប្រាក់​ជិត​៥​ពាន់​ដុល្លារ ដើម្បី​កែ​កុន​ឲ្យ​រោម​ចិញ្ចើម​របស់​ខ្លួន​ដុះ​ក្រាស់​ឡើង​វិញ។

ដូច​គ្នា នឹង​ការ​ព្យាបាល​សក់​ទំពែក​របស់​បុរស​ដែរ ការ​ដាំ​រោម​ចិញ្ចើម​ត្រូវ​បាន​វេជ្ជបណ្ឌិត​ឯក​ទេស​ប្រើ​សក់​ផ្នែក​ខាង​ ក្រោយ​នៃ​ក្បាល។

យោង​តាម​សមាគម​កែ​សម្ផស្ស​អង់គ្លេស អត្រា​ស្ត្រី​ស្វែង​រក​សេវា​ដាំ​សក់ និង​រោម​ចិញ្ចើម​មាន​ការ​កើន​ឡើង​គួរ​ឲ្យ​កត់​សម្គាល់ ដោយ​សារ​តែ​សម័យ​កាល​បច្ចុប្បន្ន​តារា​ល្បីៗ​ភាគ​ច្រើន​មាន​សក់​ច្រើន និង​ចិញ្ចើម​ក្រាស់​ ខុស​ពី​អតីតកាល។ តារា​ទូរទស្សន៍ គីម កាដាសៀន ព្រះនាង​ម្ចាស់ ខេត មីតដលធិន និង​តារា​ស្រី​កូរ៉េ​សុទ្ធ​តែ​មាន​ចិញ្ចើម​ក្រាស់។

បន្ទាប់​ពី​ឆ្លង​កាត់​ ការ​ដាំ​រោម​ចិញ្ចើម​រយៈ​ពេល​៦​ម៉ោង​ នាង​ ក្លែរ ក៏​ទទួល​បាន​នូវ​ចិញ្ចើម​ដែល​ក្រាស់​ជាង​មុន ដូច​ក្ដី​ប្រាថ្នា​របស់​នាង។

ទន្តពេទ្យ​ស្រី​រូប​នេះ បាន​និយាយ​ថា៖ «នារី​ធំធាត់​សម័យ​ស្របាល​ខ្ញុំ​សុទ្ធ​តែ​ប្រឈម​នឹង​បញ្ហា​នេះ»។

ចំពោះ ​ដំណាក់​កាល​ក្នុង​ការ​ដាំ​រោម​ចិញ្ចើម​វិញ គឺ​បន្ទាប់​ពី​យក​សក់​ចេញ​ពី​ផ្នែក​ខាង​ក្រោយ​នៃ​ក្បាល​រួច វេជ្ជបណ្ឌិត​បាន​ព្យាយាម​ចែក​សក់​៥០០​សរសៃ​នោះ​ឲ្យ​ទៅ​ជា​សរសៃ​ឆ្មារៗ​ដាច់​ ដោយ​ឡែក​ពីគ្នា តាម​រយៈ​ការ​ឆ្លុះ​ឧបករណ៍​មីក្រូស្កូប។

សក់​ដែល​មាន​ឫស នោះ​ត្រូវ​បាន​ដាំ​ចូល​ក្នុង​រន្ធ តូចៗ​នៅ​លើ​ស្បែក តាម​រយៈ​ការ​ប្រើប្រាស់​ម្ជុល​ដ៏​តូច​ម្យ៉ាង។ ប៉ុន្តែ​អ្វី​ដែល​គួរ​ឲ្យ​កត់​សម្គាល់​នោះគឺ រោម​ចិញ្ចើម​ដែល​ត្រូវ​បាន​ដាំ​ថ្មី វា​ឆាប់​វែង​លឿន​ណាស់ ដូច្នេះ​នាង ក្លែរ​ ត្រូវ​តែ​ឧស្សាហ៍​កាត់​តម្រឹម​វា​យ៉ាង​ផ្ចិតផ្ចង់​ជា​រៀង​រាល់​១ ឬ​២​សប្ដាហ៍៕

អត្ថបទគួរចាប់អារម្មណ៍