ភ្នំពេញៈ នៅក្រោមពន្លឺភ្លើងជះបំភ្លឺផ្ទៃមុខនារីដែលកំពុងគេងបិទភ្នែក យុវជន អៀម វិបុល កំពុងឈ្ងោក តម្រង់កែវភ្នែកទាំងដៃកាន់តង្កៀបចាប់រោមភ្នែកសិប្បនិម្មិតម្ដងមួយសរសៃៗភ្ជាប់នឹងរឹមភ្នែកអតិថិជនយ៉ាងផ្ចិតផ្ចង់។
ដំណើរការតរោមភ្នែកស្ដង់ដាជប៉ុននេះមិនមានការសន្ទនាពាក្យពេចន៍ឡើយ ដោយសារតែបុគ្គលិកដ៏សង្ហារូបនេះកើតមកអភ័ព្វជាមួយពិការភាពផ្នែកសំឡេង។ យ៉ាងណាមិញលទ្ធផលនៃការបំពេញសេវាកម្មតរោមភ្នែកដ៏យកចិត្តទុកដាក់នេះធ្វើឲ្យអតិថិជនញញឹមពេញចិត្តពេញថ្លើមតែម្ដង។
ខុសប្លែកពីហាងសាឡនទូទៅដែលជ្រើសរើសបុគ្គលិកមានញាណពេញលេញ ដើម្បីងាយស្រួលក្នុងការបង្ហាត់បង្ហាញ និងទំនាក់ទំនងភ្ញៀវហាង ប៊ិ សាឡន (Bi Salon) បានផ្ដល់ឱកាសដល់ជនពិការគថ្លង់ ក្រេបជញ្ជក់ចំណេះដឹងផ្នែកសម្ផស្ស និងក្លាយជាបុគ្គលិកផ្ដល់សេវាកម្មឆ្នើមដល់ភ្ញៀវថែមទៀតផង។
ភ្ញៀវដែលមកកាន់សាឡននេះមានទាំងអ្នកលំដាប់ខ្ពស់ អ្នកធ្វើការ សិស្ស និងតារាល្បីៗដូចជា កញ្ញា ឌុច លីដា និងពិធីការិនី ជីមមី ហើយ ៩០ ភាគរយនៃអតិថិជនមិនទាក់ទើរនឹងជ្រើសរើសសេវាកម្មពីបុគ្គលិកគថ្លង់ ដោយសារតែសមត្ថភាព និងទឹកដៃដ៏យកចិត្តទុកដាក់របស់ពួកគេគួបផ្សំនឹងទឹកចិត្តអាណិតអាសូរផងដែរ។
នេះរឹតតែជាកម្លាំងចិត្តដែលនាំឲ្យម្ចាស់ហាង ប៊ិ សាឡន ខ្នះខ្នែងជំរុញជនពិការមានការតស៊ូក្នុងជីវិតឲ្យទទួលបាននូវជំនាញមួយពិតប្រាកដ ហើយអាចប្រកបរបរចិញ្ចឹមជីវិតខ្លួនឯងដូចជាមនុស្សទូទៅក្នុងសង្គមដែរ។
អ្នកនាង កឹម ខេមរា ម្ចាស់ហាង ប៊ិ សាឡន បានរៀបរាប់ពីមូលហេតុនៃការផ្ដល់ឱកាសដល់បុគ្គលិកគថ្លង់ចូលបម្រើការថា៖ «ដំបូងឡើយហាងខ្ញុំតែងតែព្យាយាមរកអ្នកដែលគាត់មានបញ្ហាក្នុងគ្រួសារដូចជាមានអំពើហិង្សាក្នុងគ្រួសារ ទទួលរងការរំលោភបំពានជាដើម ដោយមានការសហការជាមួយអង្គការ PSE និងអង្គការផ្សេងៗទៀត ហើយក៏មិនដែលនឹកគិតយកគាត់ជាជនពិការឲ្យមកធ្វើការដូចគ្នា។ ប៉ុន្តែនៅពេលដែលអង្គការគាត់បានផ្តល់យោបល់ទាក់ទងនឹងរឿងនេះ ខ្ញុំក៏បានគិតមើលទៅឃើញថាល្អ។ អង្គការគាត់ក៏បានសន្យាថានឹងរកអ្នកជំនាញបកប្រែភាសាគថ្លង់នោះ។ ខ្ញុំក៏បានសម្រេចចិត្តទទួលពួកគាត់ពីអង្គការមកបង្ហាត់បង្រៀន និងឲ្យគាត់ចូលធ្វើការនៅក្នុងហាង ប៊ិ សាឡន ខ្ញុំតែម្តងទៅ»។
ជាអ្នកជំនាញផ្នែកអាយធី និងធ្លាប់ទៅបន្តការសិក្សាផ្នែកភាសានៅប្រទេស ជប៉ុន រយៈពេលមួយឆ្នាំរូបនេះបានឲ្យដឹងថា ដោយសារឱកាសសម្រាប់ជនពិការក្នុងវិស័យសម្ផស្សមានស្ដួចស្ដើង ដូច្នេះបុគ្គលិកពិការគថ្លង់មានការតស៊ូ និងព្យាយាមធ្វើមិនឲ្យខុសច្រើនដងឡើយ។
ម្ចាស់ហាងវ័យ ៣១ ឆ្នាំរូបនេះបានកត់សម្គាល់ទៀតថា៖ «ពួកគាត់រៀនឆាប់ចេះ ហើយស្មោះត្រង់ជាងមនុស្សទូទៅទៅទៀត។ ខ្ញុំក៏បានគិតថាពួកគាត់អាចទៅមុខបន្តបាន ហើយក៏ជាគំរូល្អដល់អ្នកដែលគាត់ជនពិការដូចគ្នាឲ្យមានការតស៊ូនៅពេលដែលបុគ្គលិកក្នុងហាងរបស់ខ្ញុំបានក្លាយជាម្ចាស់ហាងសាឡនមួយដែលមានមនុស្សទទួលស្គាល់ពីស្នាដៃ និងគុណភាព»។
អង្គុយយ៉ាងសុភាពរាបសានៅក្បែរអ្នកនាង កឹម ខេមរា យុវជន អៀម វិបុល អាយុ ២០ ឆ្នាំ និងយុវតី ឈុន ហ៊ាង អាយុ ២៥ ឆ្នាំក៏បានបង្ហាញពីបទពិសោធននៅហាង ប៊ិ សាឡន តាមរយៈភាសាកាយវិការដោយមានអ្នកជំនាញចាំបកប្រែគឺកញ្ញា ស្រី មុំ បរិយាយយ៉ាងដូច្នេះថា៖ «ដំបូងខ្ញុំគឺជាសិស្សដែលបានរៀននៅអង្គការ។ បន្ទាប់មកខាងអង្គការរបស់ខ្ញុំក៏បានសួរថា ចង់រៀនកាត់ដេរ បោកគក់ ឬសាឡន ខ្ញុំក៏បានជ្រើសរើសយកផ្នែកសាឡន ព្រោះតែស្រឡាញ់។ នៅពេលនេះខ្ញុំមានជំនាញហើយ ហើយខ្ញុំក៏ចូលចិត្តធ្វើការនៅទីនេះ និងមានភាពកក់ក្តៅផងដែរ»។ សម្រាប់ពេលនេះខ្ញុំចង់បន្តធ្វើការនៅទីនេះសិន។ ប្រហែលជា ៣ ទៅ ៤ ឆ្នាំទៀតខ្ញុំសម្រេចចិត្តថានឹងទៅហាងមួយផ្ទាល់ខ្លួននៅឯស្រុកកំណើត»។
ដៃគូសហការបញ្ជូនជនពិការគថ្លង់ឲ្យមករៀនផ្នែកសម្ផស្សនៅហាង ប៊ិ សាឡាន មានអង្គការជប៉ុន Nippon Foundation អង្គការ PSE និងអង្គការ DDP ហើយបុគ្គលិកជាជនពិការនៅហាងមានចំនួន ៧ នាក់សុទ្ធសឹងតែមកពីតាមបណ្តាខេត្ត។
ប៊ិ សាឡន មានសេវាកម្មកាត់សក់ ធ្វើសក់ លាបពណ៌សក់ ផ្លុំចេញជាម៉ូដ កក់សក់ និងអ៊ុតសក់មានតម្លៃចាប់ពី ៥ ដុល្លារឡើងទៅ។ ចំពោះផ្នែកក្រចក លាបពណ៌ក្រចក ២ ដុល្លារ និងកាត់សាច់ក្រចក ៣ ដុល្លារមានលាងទឹកអំបិល និងថ្នាំផ្សេងទៀតធ្វើតាមស្តង់ដាររបស់ជប៉ុន។ សេវាកម្មអ៊ុតរោមភ្នែក និងតរោមភ្នែកចាប់ពី ២៥ ដុល្លារ និងម៉ាស្សាមុខចាប់ពី ១៥ ដុល្លារជាមួយផលិតផលពីកូរ៉េ ជប៉ុន និងសហរដ្ឋអាមេរិក។ ហាងសាឡនក៏នឹងបន្ថែមសេវាកម្មស្ប៉ាដែលប្រើរបស់ធម្មជាតិនៅក្នុងប្រទេសនាពេលឆាប់ៗខាងមុខផងដែរ។
អ្នកនាង កឹម ខេមរា ដែលធ្លាប់មានបទពិសោធក្នុងការធ្វើការនៅហាងសាឡនធំមួយរបស់ជប៉ុនក៏បានប្រាប់ពីគោលបំណងក្នុងថ្ងៃអនាគតដូចគ្នាថា៖ «ខ្ញុំចង់ធ្វើជាមូលនិធិដើម្បីប្រមូលជំនួយចំនួន ១៥ ០០០ ដុល្លារ ពីវេបសាយរបស់ជប៉ុនមកជួយដល់ជនពិការទាំងអស់ ហើយចំនួនលុយទាំងនេះមិនគ្រប់ក្នុងការជួយដល់ពួកគាត់នោះ ប៉ុន្តែវាគ្រាន់តែជាស្ពានមួយដែលអាចនាំខ្ញុំទៅដល់គោលដៅតែប៉ុណ្ណោះ។ ចំណែកឯហាង ប៊ិសាឡន ទើបតែមាន ២ សាខា ខ្ញុំនឹងពង្រីកបន្ថែម ដើម្បីឲ្យគ្រប់ចំនួនបុគ្គលិកគថ្លង់របស់ខ្ញុំមានទីផ្សារការងារកាន់តែច្រើន ហើយបើអាចធ្វើបានខ្ញុំនឹងជួយឲ្យពួកគាត់បើកហាងសាឡនដោយខ្លួនឯង ១ យ៉ាងជោគជ័យនៅពេលដែលពួកគាត់ចង់ឈប់ធ្វើការនៅហាងរបស់ខ្ញុំ»។
ហាង ប៊ិ សាឡន ស្ថិតនៅផ្ទះលេខ 4A1 ផ្លូវ ៣៩៨ សង្កាត់បឹងកេងកង ១ ទាក់ទងទូរស័ព្ទ ០១០ ៣២ ៤៥ ២៤ និង ០៧០ ៣២ ៤៥ ៥២៤៕
វីដេអូ៖