.jpg)
រថយន្តខ្នាតធំ និងយានយន្តប្រើម៉ាស៊ូតផ្ដល់ការបំពុលខ្លាំងជាងគេ។
ក្រុងញូវយ៉ក: គ្មានអ្វីអាថ៌កំបាំងទេ ផ្សែងម៉ាស៊ីនរថយន្ដ និងរោងចក្រនានាដែលយើងស្រូបចូលផ្លូវដង្ហើមរៀងរាល់ថ្ងៃពិតជាបង្កគ្រោះថ្នាក់ដល់ខួរក្បាល និងរាងកាយមនុស្ស។
ការសិក្សាបែបវិទ្យាសាស្ដ្របានបង្ហាញថា អ្នករស់នៅក្នុងទីក្រុង ដែលប្រឈមនឹងការបំពុលបរិយាកាសខ្ពស់ពេញមួយឆាកជីវិត បានបង្កើនហានិភ័យជំងឺបេះដូង ដាច់សរសៃឈាមខួរក្បាល មហារីក និងថែមទាំងបញ្ហាផ្លូវចិត្ដ។
ប៉ុន្ដែពេលនេះ ការស្រាវជ្រាវថ្មី បានបង្ហាញថា ក្រៅពីធ្វើឲ្យមនុស្សធ្លាក់ខ្លួនឈឺ ជាតិពុលក្នុងបរិយាកាសក៏ជាដើមចមធ្វើឲ្យធាត់លើសទម្ងន់ផងដែរ។
ក្រុមអ្នកស្រាវជ្រាវមកពីសាកលវិទ្យាល័យកាលីហ្វ័រនីញ៉ា បានតាមដានកុមារអាមេរិកជាង ២៣០០ នាក់។ ហេតុអ្វីបរិស្ថានកខ្វក់បង្កើនឱកាសធាត់លើសទម្ងន់? ក្រុមអ្នកវិទ្យាសាស្ដ្រជឿថា ការដកដង្ហើមមិនបរិសុទ្ធ ពីផ្សែងរថយន្តរហូតដល់ផ្សែងបារី បង្កឲ្យរលាកលើរាងកាយ។
ដំបូង ភាពកខ្វក់ធ្វើឲ្យរលាកថង់ខ្យល់ក្នុងសួត បង្កើតជាសញ្ញាណស្ដ្រេស ដែលទាក់ទងនឹងការបញ្ចេញអ័រម៉ូន។ វាបានកាត់បន្ថយសមត្ថភាពស្រូបថាមពល (ឬជាតិស្ករគ្លុយកូស) នៃរាងកាយពីចំណីអាហារ ដោយមិនអាចគ្រប់គ្រងកម្រិតជាតិស្ករក្នុងខ្លួន។
ពេលកម្រិតជាតិស្ករបាត់បង់ស្ថិរភាព ចំណង់អាហារចាប់ផ្ដើមប្រែប្រួលមិនទៀងទាត់ ដែលអាចធ្វើឲ្យអ្នកចង់ញាត់អាហារមិនឆ្អែតឆ្អន់។
សូម្បីតែនៅក្នុងរថយន្ដក៏មិនបានការពាររូបអ្នកឡើយ។ បើសំងំនៅទីស្ងាត់ឆ្ងាយពីដងវិថី សារធាតុពុលអាចមានការធ្លាក់ចុះខ្លះ៕
