ក្រុងញូវយ៉ក: លទ្ធភាពពិបាកពពោះកាន់តែកើនឡើងខ្លាំង ជាពិសេសប្ដីប្រពន្ធជាច្រើនកំពុងព្យាយាមយកកូននៅវ័យជ្រេនៃឆាកជីវិតខ្លួនឯង។ ការស្រាវជ្រាវបានលើកឡើងថា នៅសហរដ្ឋអាមេរិកករណីអត់កូនប្រមាណ ១ ភាគ ៣ បង្កឡើងដោយបញ្ហាខាងបុរស ហើយនៅចក្រភពអង់គ្លេស ១ ក្នុងចំណោមប្ដីប្រពន្ធ ៧ គូអាចជួបការលំបាកពពោះដែលស្មើនឹងប្រមាណ ៣,៥ លាននាក់។
តើរបបអាហារជួយដល់មេជីវិតបុរសដែរឬទេ?
ការសិក្សាមួយចុះផ្សាយក្នុងព្រឹត្ដិបត្របច្ចុប្បន្នភាពលទ្ធភាពបន្ដពូជរបស់មនុស្សបានរកឃើញថា របបអាហារសម្បូរអាស៊ីដខ្លាញ់អូមេហ្គា ៣ សារធាតុប្រឆាំងជំងឺមួយចំនួន (វីតាមីន E, C បេតាការ៉ូទីន សេឡេស្យូម ស័ង្កសី និងលីកូប៉ែន «សម្បូរនៅក្នុងផ្លែប៉េងប៉ោះ») ហ្វូឡេត វីតាមីន D និងខ្លាញ់កែច្នៃតិច អាចជួយបង្កើនគុណភាពមេជីវិតបុរសឡើងវិញ។
អាហារមួយចំនួន ដូចជា ត្រី សន្ដានងាវ គ្រំ បសុបក្សី ធញ្ញជាតិ បន្លែ ផ្លែឈើ និងទឹកដោះគោខ្លាញ់តិចប្រចាំថ្ងៃក៏មានឥទ្ធិពលវិជ្ជមានចំពោះគុណភាពមេជីវិតផងដែរ។
ផ្ទុយទៅវិញរបបអាហារសម្បូរសាច់កំប៉ុង ទឹកដោះគោខ្លាញ់ កាហ្វេ គ្រឿងស្រវឹង និងសាច់ក្រហមមានឥទ្ធិពលបង្កផលប៉ះពាល់គុណភាពមេជីវិតក្នុងករណីខ្លះ។
ការទទួលទានគ្រឿងស្រវឹង កាហ្វេអ៊ីន សាច់ក្រហម និងគ្រឿងកំប៉ុងច្រើនរបស់មនុស្សប្រុសត្រូវបានបង្ហាញថា រងនូវប៉ះពាល់អវិជ្ជមានលើបម្រែបម្រួលអត្រាមានគភ៌ ឬលទ្ធភាពបង្កកំណើតជាមួយដៃគូ។
ស្ដ្រេសអូស៊ីដេទីវ
ខណៈការស្រាវជ្រាវបង្ហាញមិនទាន់ច្បាស់អំពីលទ្ធផលនៃជីវជាតិអាមេរិកលើគុណភាពមេជីវិត វាទំនងណាស់ថា ការថមថយសមត្ថភាពមានកូនប្រមាណពី ៣០ ទៅ ៨០ ភាគរយករណីក្នុងចំណោមបុរសៗបង្កឡើងដោយសារស្ដ្រេសអូស៊ីដេទីវ។
ស្ដ្រេសអូស៊ីដេទីវ (Oxidative stress) កើតឡើងពេលសមាសធាតុក្រុមអុកស៊ីហ្ស៊ែនប្រតិកម្ម (ROS) មានចំនួនលើសពីសារធាតុប្រឆាំងជំងឺដែលផលិតឡើងដើម្បីគ្រប់គ្រងលើការខូចខាតដែលខ្លួនបង្ក។ ការប្រមូលផ្ដល់ ROS ច្រើនក្នុងកោសិកាមេជីវិតអាចធ្វើឲ្យប្រែប្រួល DNA និងប៉ះពាល់ដល់ចលនាបំផ្លាស់ទី ថាមពល និងចំនួនមេជីវិត បុរសដែលអាចប៉ះពាល់លើសមត្ថភាពបង្កកំណើតរបស់ពួកគេផងដែរ។
បញ្ហាដែលត្រូវបានចាត់ទុកជាអាការស្ដ្រេសអូស៊ីដេទីវ គឺជារបៀបរស់នៅប្រចាំភ្ជាប់នូវទម្លាប់ជក់បារី គ្រឿងស្រវឹង ធាត់ជ្រុល និងស្ដ្រេសឥតល្ហែក្នុងឆាកជីវិត៕ HR