.jpg)
វិធីសាស្ត្រឆក់ចរន្តតិចៗបែបវេជ្ជសាស្ត្រ ជាជម្រើសបន្ទាប់ពីថ្នាំវីយ៉ាក្រា។
ក្រុងរីយោ: ការពិសោធជាច្រើនបានបង្ហាញថា បុរសលិង្គមិនរឹង អាចទទួលបាននូវចំណង់សិចមកវិញក្រោយពីការព្យាបាលឆក់ខ្សែភ្លើងកម្រិតតិចៗប៉ុន្មានសប្ដាហ៍មក។
ក្រុមអ្នកស្រាវជ្រាវសាកលវិទ្យាល័យសហព័ន្ធវិទ្យាសាស្ដ្រសុខាភិបាល ក្នុងក្រុងផូតូ អាឡេហ្រ្គេ ប្រទេសប្រេស៊ីល បានជ្រើសរើសបុរស ២២ នាក់ អាយុចន្លោះពី ៤០ ទៅ ៦៥ ឆ្នាំ ដែលមានបញ្ហាសមត្ថភាព ផ្លូវភេទធ្ងន់ធ្ងរ។
ក្រុមអ្នកស្ម័គ្រចិត្ដទទួល ការព្យាបាល ២ វគ្គ ក្នុងមួយសប្ដាហ៍រយៈពេល ១ ខែ ដោយវគ្គនីមួយៗ មានរយៈពេល ១៥ នាទី។ ឧបករណ៍ចរន្ដឆក់តូច ១ គូត្រូវបានដាក់លើប្រដាប់ភេទ និងបន្ទុកចរន្ដអគ្គិសនីមួយត្រូវបានប្រើសម្រាប់ឆក់បែបវេជ្ជសាស្ត្រ។
ខណៈការព្យាបាលនេះហាក់ដូចជាមិនសមទំនងបន្ដិច តែក្រុមអ្នកស្ម័គ្រចិត្តមានអារម្មណ៍ភ្ញោចតិចៗពេលចរន្ដអគ្គិសនីរត់ឆ្លងកាត់កោសិកា។
ឧបករណ៍អគ្គិសនីដែលត្រូវបានប្រើនេះ មួយមានតម្លៃប្រមាណ ៤០០០ ដុល្លារ។ ការព្យាបាលភ្ញោចអារម្មណ៍នេះត្រូវបានសាកល្បងលើបុរសកើតរោគអសមត្ថភាពផ្លូវភេទ ដែលមិនមានអាការធូរស្បើយពេលប្រើឱសថវីយ៉ាក្រា។
បុរសម្នាក់ក្នុងចំណោម ១០ នាក់ បានកើតរោគអសមត្ថភាពផ្លូវភេទក្នុងគ្រាណាមួយនៃឆាកជីវិតរបស់ពួកគេ។ ការសិក្សាខ្លះបង្ហាញថា បុរសអាយុចាប់ពី ៤០ ឆ្នាំជិត ៣០ ភាគរយរងប៉ះពាល់ពីបញ្ហានេះ។
ថ្វីដ្បិតតែឱសថពេទ្យ ដូចជា វីយ៉ាក្រាមានអានុភាពយ៉ាងណាក៏ដោយ ក៏បុរសប្រមាណ ៣៥ ភាគរយដែលបានប្រើវា មិនបានធូរស្បើយអ្វីឡើយ។ អ្នកជំងឺទាំងនេះអាចប្រើឧបករណ៍បូមលិង្គឲ្យរីកធំ ឬវះកាត់ញាត់សរសៃដែលអាចធ្វើឲ្យលិង្គងើបពេលត្រូវការរួមភេទ៕HR
