ក្រុងហាណូយ: សាច់ត្រូវ បានច្នៃជាមុខម្ហូបផ្សេងៗ រីឯឈាមស្រស់លាយត្រាំស្រាក្លែមប៉ូវកម្លាំង។ សត្វពស់ព្រៃគឺជាអាហារដ៏ពេញនិយម ក្នុងសង្គមវៀតណាម។
ប្រមាញ់ពីព្រៃនៅភាគខាងជើងប្រទេស សាច់ពស់ត្រូវបានជនជាតិវៀតណាមខ្លះជឿថា វាបានជួយបញ្ចុះកម្ដៅក្នុងរាងកាយ កែអាការឈឺក្បាល និងសម្រួលដល់ប្រព័ន្ធរំលាយអាហារថែមទៀត។
មេចុងភៅ ឌីញ ធានឌុង ដែលធ្វើការនៅភោជនីយដ្ឋានមួយក្នុងខេត្ដយេនបៃ ធ្វើដំណើរប៉ុន្មានម៉ោងពីភាគពាយព្យ ក្រុងហាណូយ បាននិយាយថា ហាងរបស់លោក មានមុខម្ហូបចំហុយ ឬឆាជាមួយស្លឹកគ្រៃ និងម្ទេស ព្រមទាំងបន្ថែមស្រាអង្ករលាយឈាមពស់ដ៏ក្រហមខាប់ថែមទៀត។
ដៃម្ខាងកាន់ក្បាលពស់ជាប់ លោក ឌិញ ធានឌុង យកកាំបិតចោះត្រង់កពស់ រួចច្របាច់កសត្វល្មូននេះសម្រក់ឈាមដាក់កែវស្រាស។
មេចុងភៅ វ័យ ៣២ ឆ្នាំ រូបនេះ បានប្រាប់ថា៖ «សត្វពស់មានគុណប្រយោជន៍ទាំងអស់ លើកលែងតែក្បាល និងស្រការបស់វាតែប៉ុណ្ណោះ»។
ពលរដ្ឋវៀតណាមជឿថា សម្រាប់ស្រាពិសេសនេះ មានតែបុរសអាយុលើស ៥០ ប៉ុណ្ណោះគួរតែផឹកស្រាឈាមពស់ ឬយុវជនស្ទាវៗ ដែលជួបបទពិសោធឈឺឆ្អឹងខ្នង ឬអសមត្ថភាពផ្លូវភេទ។ នេះបើយោងតាមម្ចាស់ភោជនីយដ្ឋាន លោក ដួង ឌុកដុក។
ជាអ្នកចាប់ពស់ លោក ដាង ង៉ុកខាញ់ អាយុ ៣៥ ឆ្នាំ ដែលមានរបរដើរទាក់ពស់ពីព្រៃតាំងពីកុមារភាព បាននិយាយថា ការទទួលទានសាច់ពស់មានអត្ថប្រយោជន៍ច្រើន។
បន្ថែមលើគុណប្រយោជន៍ដែលម្នាក់ៗជឿថា វាប៉ូវសមត្ថភាពផ្លូវភេទនោះ អ្នកប្រកបរបរចាប់ពស់ ៣ ទសវត្សរ៍រូបនេះបានប្រាប់ផងដែរថា៖ «សាច់ពស់ពិតជាអាហារដ៏ល្អ។ វាមានរសជាតិឆ្ងាញ់ ល្អចំពោះសុខភាព និងឆ្អឹងឆ្អែងរបស់លោកអ្នក»។
ប៉ុន្ដែអ្នកជំនាញសត្វព្រៃ អ្នកនាង អ៊ីយ៉ូណា ដាំងល័រ មកពីអង្គការ Four Paws International បាននិយាយថា ការសម្លាប់សត្វពស់ព្រៃ នឹងរំខានដល់ប្រព័ន្ធចម្រុះនៃព្រៃ ពិតជារឿងមិនគួរឲ្យចាំបាច់មែន ពីព្រោះពិភពលោកយើងផលិតអាហារគ្រប់គ្រាន់សម្រាប់បរិភោគហើយ។
អ្នកជំនាញសត្វព្រៃរូបនេះថ្លែងថា៖ «ដំណើរការនៃការច្នៃសត្វពស់ព្រៃទៅជាអាហារ ឬផ្សំជាមួយភេសជ្ជៈពិតជាគួរឲ្យសង្វេគណាស់ ហើយវាត្រូវបានធ្វើឡើងក្នុងគោលបំណងមិនសមទំនង»៕